36. रुपो सा

म्या दिन, यीशु नी हेजा आफाई चेलाकू, पतरस, याकूब, एठा यूहन्ना के हेजा सेंग्गोन सावे। (इनी यूहन्ना जीमू गा चेला डीका कोरो बाऊ होय डीचनी यीशु के बपतिस्मा जीके डा।) दिकु प्रार्थना गा घल्जी म्या उंचा टुक्की लिंजेन ओले।

जब यीशु प्रार्थना दडा लक्के डा मेटे दियागा चेहरा सूर्य गा रोंगो उजालाएन मेना। दियागा कपळे उजाला गा रोंगो पुलूमजे मेना, जैसा पृथ्वी लिंजेन जेका डाकी होना देटे भी बळातिंजटे पुलूम।

मेटे मूसा एठा एलिय्याह परमेश्वर गा कोनेटे मंडी मिठाच ओटजे मेना। इनी कोरो पृथ्वी लिंजेन इनी टेमो टे घोनेच साल पेला थंदळ लक्कू डादिकुनी यीशु टे दियागा गुजू गा बारेन बातो डावे, चोयाकी डीच झल्लोका यरूशलेम गेन गुजूवा।

जब मूसा एठा एलिय्याह यीशु टे बातो लक्के डा मेटे पतरस नी यीशु टे मंडीके, “आलेगा घल्जी इनी डाऊ भला होय। आले आफाईकु मंडप के आरोएवा, म्या अमा घल्जी, म्या मूसा गा घल्जी, एठा एलिय्याह गा घल्जी।” पेनो पतरस बान हाडाई डा कि डीच मंडी लक्के होय।

जब पतरस बातो लक्के डा, मेटे चमकातिंजू बादळा इटान हेंडो दिकु लिंजेन उगुरजे। डाबोलटे दिकुनी बादळा तालाटे म्या आवाज के हेजे लठ्ठाका आजुम्के। डीचनी मंडीके, “इनिज इंजा कोण होय दियाटे इंज प्यार दडावा मेना। इंज दियाटे कुशो के मेना। दियागा आजुमे।” दिकु आफाई भी चेलाकू हिघराएन एठा ओटे लिंजेन गिटेन।

मेटे यीशु नी दिकुके कोम्बाराके एठा मंडीके, “हिघरा बाकी। बिडे।” जब दिकुनी उफुन भी कोनेन डोके, मेटे जो भी देटेन डा डीच बस यीशु डा।

यीशु एठा दिकु आफाई चेलाकू डी टुक्की टे डाबोलटे इटान हेन। मेटे यीशु नी दिकुटे मंडीके, “आए जो येटे डाएन दियागा चर्चा जेकाटे बाकी दडा। इंज जल्दी का गुजूवा एठा डाबोलटे जिटाऊवा। डेगा बादोन, आपे कुरकू के घाले साकतावा होय।”