37. यीशु लाजर के गोएन मिठाच जाटे जीटाएच्बा होय

लाजर जीमू गा म्या कोरो डा। दियागा बारी कोंजाई किंज डा दियागा मरियम एठा मार्था डा। दिकु सेबाईकु यीशु गा मेरा गा सोप्तीकु डा। म्या दिन, जेकानी यीशु के घाल्के कि लाजर भेबाव बीमारके डा। जब यीशु नी इनी आजुम्के मेटे डीचनी मंडीके, “इनी बीमारी लाजर गा गुजू गा सेंग्गोन स्यागु बाने। येनेगा बाजाए, इनी कुरकू के परमेश्वर गा आदर दडा गा घल्जी प्रेरित डाके।”

यीशु हेजा सोप्तीकु टे प्यार दडा डा, पेनो देटेन डीच डा डेन डीचनी बारी दिन टाएन राह डोके। डी बारी दिन गा बादोन, डीचनी हेजा चेलाकु टे मंडीके, “हेजे, डाबोलटे यहूदीया जिल्हा गेन बो।” चेलाकुनी जवाब जीके, “पेनो हे गुरु, नका थोडाका टेमो पेला डे गा कुरकू आमके गोगेज चाहतावा डा!” यीशु नी मंडीके, “आलेगा सोप्ती लाजर गिटेन होय, एठा इंजेन डीचके बिबीट होना होय।

यीशु गा चेलाकु नी जवाब जीके, “हे प्रभु, अगर लाजर गिटिच लक्के होय, मेटे डीच सजाऊवा।” मेटे यीशु नी दिकुटे सपा रुपो टे मंडीके, “लाजर गोएन मेना होय। इंज कुशो के मेना कि इंज डेन बाऊ डा, ताकि आपे इंजा लिंजेन विश्वास डाकि होना।”

जब यीशु लाजर गा गाँव गेन आदिरजे मेटे लाजर के गोएन गा उफुन दिन डाएन डा। मार्था यीशु टे मिलातिंजू गा घल्जी बल्लान हेन एठा मंडीके, “हे प्रभु, अगर आम येनेन टाकूमी धारे इंजा डाई बान गुजू डा। पेनो इंज विश्वास दडावा मेना कि जो चोच्काभी आम परमेश्वर टे डीच आमके जेवा।”

यीशु नी जवाब जीके, “डाबोलटे जिटाऊ इंज मेना। जो जेका इंजा लिंजेन विश्वास दडावा होय अगर गोएन भी मका तोभी जीवन बिबातातिंज्बा। जो जेका इंजा लिंजेन विश्वास दडावा होय डीच चोलाका गुजू बाने। चोच आम येने लिंजेन विश्वास दडावा होय?” मार्था नी जवाब जीके, “हे प्रभु इंज विश्वास दडावा मेना कि आम परमेश्वर गा कोंटे मसीह होय।”

मेटे मरियम हेन। डीचनी यीशु गा नंगा गेन बोचोएन डो मंडीके, “हे प्रभु, अगर आम येटेन टाकुमी धारे इंजा डाई बान गुजू डा।” यीशु नी दियाटे कोम्बाराके, “आमनी लाजर के तोटे जगान डोकेनेच?” दिकुनी डीचके घाल्के, “कब्र गेन। हेजे एठा डोगेच।” मेटे यीशु जाम लज्जे।

डीच कब्र म्या गुफा डा दियागा दराजो लिंजेन म्या घोटा के उगुरके डा। जब यीशु कब्र गेन आदिरजे मेटे डीचनी दिकुटे मंडीके, “घोटा के म्याधेळेनकी।” पेनो मार्था नी मंडीके, “दियागा गोएन गा उफुन दिन डाएन होय। देटे सळातिंज सुकिंज हेजेवा।”

यीशु नी जवाब जीके, “चोच इंज्नी आपेटे बान मंडीडुका डा कि अगर आपे इंजा लिंजेन विश्वास डाए टासो मेटे परमेश्वर गा शक्ति के डोगेवा?” इनिघल्जी दिकुनी घोटा के म्याधेळेनके।

मेटे यीशु नी मठान स्वर्ग गा कोनेन धोटे मंडीटे, “हे बाटे, इंजा आजुमा गा घल्जी इंज अमा धन्यवाद दडावा मेना। इंज मालूम होय कि आम हमेशा इंजा आजुम्बा होय, पेनो इंज्नी इनी येटे जगा नटेंगेनके इनी सेबाई कुरकू गा मदत दडा गा घल्जी मंडीके ताकि इंकू विश्वास डाए कि आमनी इंज्के कुल्लेमी होय।” मेटे यीशु नी आवाज येंडाके, “हे लाजर, बल्लान ओडे बला!”

इनिघल्जी लाजर बल्लान हेन! डीच आएभी कफन गेन उगुरके डा।यीशु नी दियाटे मंडीके, “इनी कफन के ओट गेन मदत डाए एठा डीचके आजाडेच।” इनी चमत्कार गा वाजाटे घोनेच्का यहूदी कुरकू नी यीशु लिंजेन विश्वास डाके।

पेनो यहूदी कुरकू गा धार्मिक अगुवाकु यीशु टे जुलू लज्जे, इनिघल्जी दिकु योजना आरुगा घल्जी म्या सेंग्गोन गोलाएन कि टोनोगो यीशु एठा लाजर के गोच्केच होना।