38. यीशु के उठायेच्बा मेना होय

हर साल, यहूदी कुरकू फसह गा तिवार ममानातिंज डा। इनी बारेन म्या म्या तिवार डा कि चोटोका साल गा पेला परमेश्वर नी दिकुगा जुनाकु के मिस्र गा गुलामी टे आराकेकु डा। अंदाजो आफाई साल गा बादोन यीशु नी सेबाई रुपो टे प्रचार दडा एठा शिक्षा जिऊ सुरुके। यीशु नी हेजा चेलाकू के घाल्के कि डीच दिकुगा सेंग्गोन यरूशलेम गेन फसह गा तिवार के ममानातिंज चाहतावा होय, एठा इनी भी कि डीचके डेनेन गोजेच्बा।

यीशु गा चेलाकु गेन म्या यहूदा जीमू गा कोरो डा। यहूदा कलमके चेलाकू गा डामा गा झोरा दोडो गा पाओना डा, पेनो अक्सर डीच डी झोरा तालाटे डामा कोलागे लक्के डा। यीशु एठा चेलाकू गा यरूशलेम गेन आदिरू गा बादोन यहूदा यहूदी अगुवाकु गा मेरान ओले। डीचनी डामा गा बेदला गेन यीशु के दिकुगा टीन उठा गा मंडी डोके। दियेन मालूम डा कि यहूदी अगुवाकु मनेनेज बान डा कि यीशु का मसीह डा। डीच हाडाई डा कि दिकु डीचके गोगेच चाहता डा।

महायाजक गा मंडी लिंजेन अगुवाकु नी यीशु के दिकुगा टीन उठा गा घल्जी यहूदा के तीसो चाँदी गा चिक्खा जीके। इनी डीका रोंगो टे डाएन जैसा कि परमेश्वर गा कोनेटे मंडी मिंकू नी मंडीके डा कि डाऊवा। यहूदा मनातिंजे एठा डामा साटे ओले मेना। डीच यीशु के जेलेन केखेट गेन मदत दडा गा घल्जी तुनिका अक्सर गा गघाटा लज्जे।

यरूशलेम गेन, यीशु नी हेजा चेलाकू गा सेंग्गोन फसह गा तिवार मनातिंज्के। फसह गा आटा गा दौरान, यीशु नी सोकळा साटे टुक्काके। डीचनी मंडीके, “इनिके सेगे एठा जोमे। इनी इंजा कोम्बोर होय जो इंज आपेगा घल्जी जेवा मेना। इनिके इंजा यादो गेन डाकी।” इनी रोंगो टे, यीशु नी मंडीके कि डीच दिकुगा घल्जी गुजूवा, मतलब दिकुगा घल्जी डीच हेजा कोम्बोर के बलि पेळेजेवा।

डाबोलटे यीशु नी म्या अंगूर गा रेस्सो गा गिल्ला सावे एठा मंडीके, “इनिके नुए। इनी उनाई वादा गा इंजा पचना होय जो कि इंज उखळीके ताकि परमेश्वर आपेगा पापो के मापोकी। हर बल्लान इनिके नुनू टेमो इंजा यादो गेन इनिके डाए जो इंज आए डाए लक्के मेना।”

मेटे यीशु नी हेजा चेलाकू टे मंडीके, “आपे तालाटे म्या कोरो इंज्के उठाकेमी।” चेलाकू बिचार जे, एठा कोकाम्बारा लज्जे कि जे येनोगो कामय डाएवा। यीशु नी मंडीके, “इंज्के उठामिंकू कोरो डीच होय डीचके इंज इनी सोकळा गा तुकळा जेवा मेना” मेटे डीचनी डी सोकळा यहूदा के जीके।

डी सोकळा के जिऊ गा बादोन, यहूदा गेन शैतान मोएन मेना। यहूदा ओटटे यीशु के केखेट गा घल्जी यहूदी अगुवाकु गा मदत दडा के ओले मेना। इनी राटो गा टेमो।

कुकूल गा बादोन, यीशु एठा दियागा चेलाकू जैतून टुक्की गेन ओले मेना। यीशु नी मंडीके, “आपे सेबाईकु टाइंज गा राटो इंज्के आराकोम्बा। इनी ओल्के मेना होय, ‘इंज ताठ्याकु के मुंडाकुवा एठा सेबाई मेंडाकू इंगान-हुगान सेनेवा।’”

पतरस नी जवाब जीके, “भला कि बाकि गा सेबाई कुरकू आमके आराकेमी, इंज बान आरा!” मेटे यीशु नी पतरस टे मंडीके, “शैतान आपे सेबाईकु सा चाहतावा होय, इंज्नी अमा घल्जी प्रार्थना डाके होय कि आम विश्वास टे चुकायु बाकी होना। फिरभी, टाइंज गस राटो, कोंम्बा गा आवाज टे पेला आम आफाई बार बान मेंबा कि आम इंज्के बान हडाई होय।”

पतरस नी मेटे यीशु टे मंडीके, “भला कि इंज गोयु, इंज चोलाकाभी बान मेंटो बान मंडी!” बाकी गा सबाई चेलाकू नी भी इनिका मंडीके।

मेटे यीशु नी हेजा चेलाकू गा गतसमनी जीमू गा जगा गेन ओले। यीशु नी हेजा चेलाकू टे प्रार्थना दडा गा घल्जी मंडीके ताकि शैतान दिकुगा अंदाजों बाकी सा। मेटे यीशु खुद प्रार्थना दडा गा घल्जी ओले मेना।”

यीशु नी आफाई बार प्रार्थना डाके, “हे इंजा बाटे, अगर डाऊ धारे मेटे कृपा डाटे इनी कासु गा गिल्ला नुनू गा घल्जी इंज्के बाकी जिऊ। पेनो आगे कुरकू गा पापो मापोऊ गा घल्जी तुनिका कोरा बाऊ होय, मेटे अमाका इच्छा मुरायु।” यीशु बेभाव नराजो के डा एठा दियागा पसीना पचना गा ठेम्बो गा रोंगो डा। डीचके शक्ति जिऊ गा घल्जी परमेश्वर नी म्या स्वर्गदूत के कुल्केनेच।

हर बार प्रार्थना गा बादोन, यीशु हेजा चेलाकू गा मेरान हेन, पेनो दिकु गिटेन डा। जब यीशु अफाई बार हिराके मेटे यीशु नी मंडीके, “बिटजू! इंजा उठा मिठाच येटेन होय।”

यहूदी अगुवाकू, सैनिककु, एठा म्या खाट गर्दी गा सेंग्गोन यहूदा हेन। दिकुनी तलवार एठा लठ्ठानौर सावे मेना डा। यहूदा नी यीशु गा मेरान हेंडो दियाटे मंडीके, “हे गुरु, नमस्कार,” एठा दियागा जोका जोफे। डीचनी गिरफ्तारु मिठाच कोरो के यहूदी अगुवाकु लिंजेन ओट गा घल्जी येनोगो डाके डा। मेटे यीशु नी मंडीके, “हे यहूदा, चोच आम म्या चुम्बन टे इंज्के उठा लक्के होय?”

जब दिकु सैनिक यीशु के उठा लक्के डा, मेटे पतरस नी हेजा तलवार ओटके एठा महायाजक गा म्या सेवक गा लुटूर गेटके। यीशु नी मंडीके, “तालवार के लेंक्कीन की! इंज इंजा बाटे टे इंजा बचातिंजू दडा गा घल्जी स्वर्गदूतकु गा म्या सेना गा घल्जी विनती दडावा मेना। पेनो इंज्के इंजा बाटे गा बातो ममानातिंज्बा होय।” मेटे यीशु नी डी कोरो गा लुटुर के सजाके। मेटे सेबाई चेलाकू सळुपजे।