39. यीशु लिंजेन मुकद्दमा सेंदराएवा होय

नका इनी आधा राटो गा टेमो डा। दिकु सैनिक यीशु के महायाजक गा उरान सालेच, चोयाकी डीच यीशु टे सवाल दडा चाहता डा। पतरस लेंक्कीटे दिकुगा टाऊटे सेने लक्के डा। जब सैनिक यीशु के उरा गेन साईंय्ये, मेटे पतरस बल्लान रुकातिंजटे खुद के सिंगेल टे चचाटा लज्जे डा।

उरा गा तालान, यहूदी अगुवाकु नी यीशु लिंजेन मुकद्दमा सेंदराके। दिकु दियागा खिलाफ बेन लाबाळ बातो के मंडी गा घल्जी घोनेच का लाबाळ गवाहकु के साटे हेन। हलाकि, दिकुगा बातो इनिज-दियाटे राजी बाऊ डा, इनिघल्जी यहूदी अगुवाकु इनी साबित डुका बाने कि डीच तुनिका बातो गा दोषी डा। यीशु नी चोच्का बान मंडीडुका।

आखरी गेन, महायाजक नी सीधा यीशु गा कोने धोटे मंडीके, “आलेके घाले कि चोच आमका जीटा परमेश्वर गा कोंटे मसीह होय?”

यीशु नी मंडीके, “इंज मेना, एठा आपे इंज्के परमेश्वर गा सेंग्गोन सुबांके मेना एठा स्वर्ग टे हेजे लठ्ठाका भी डोगेवा।” महायाजक नी आपना कपळे चिराके चोयाकी जो यीशु नी मंडीके डीच डी बातो लिंजेन भेबाव खीजो डा। डीच अलग्गो अगुवाकु लिंजेन चिल्लातिंज्के, “अलेके इनी घागल गा घल्जी तुनिका एठा गवाह गा जरुरत बाऊ होय कि इनी कोरो नी चोच डाके होय! आपेनी खुद का डीचके इनी मंडी लठ्ठाका मेना होय कि डीच परमेश्वर गा कोंटे होय। दियागा बारेन आपेगा चोच निर्णय होय?”

सेबाई यहूदी अगुवाकु नी महायाजक के जवाब जीके, “डीच घोगेज गा लायको होय!” मेटे दिकुनी यीशु गा मेट लिंजेन पट्टी टोलके, दिया लिंजेन उलीच बेच्के, डीचके मुंडाकेनेच, एठा दियागा मजाक उळातिंज्के।

एठा पतरस, जब डी उरा गा बल्लान राह दोडो लक्के डा। मेटे म्या भागनी तराई नी डीचके डोकेनेच। डीचनी दिकुटे मंडीके, “आमभी यीशु गा सेंग्गोन डा!” पतरस नी बान मेंके।बादोन तुनिका अलग्गो तराई नी इनी बातो मंडीके, एठा पतरस नी डाबोलटे बान मेंके। आखरी गेन, अदा कुरकू नी मंडीके, “आले हाडाई होय कि आम यीशु गा सेंग्गोन डा चोयाकी आपिंज बर्खिंज गलील जिल्हाटे मेना।”

मेटे पतरस नी मंडीके, “अगर इंज इनी कोरो हाडाई धारे मेटे परमेश्वर इंज्के श्रापो जिली!” तुरुटो का पतरस गा इनी खिजाटे कसोम जोमगा बादोन, म्या कोम्बा नी राके। यीशु नी टाऊ धोटे पतरस के डोकेनेच।

पतरस देटे ओले मेना एठा हुकूट-हुकूट टे जाम लज्जे। डीका टेमो, यीशु के उठामिठाच यहूदा नी डोके कि यहूदी अगुवाकु नी यीशु के गुजू गा दण्डो जीके होय। यहूदा भेबाव दुखेन मेना एठा ओलेडो खुदका गोएन।

नका डी देशो गा राज्यपाल पिलातुस डा। डीच रोम गा घल्जी कामय दडा डा। यहूदी अगुवाकु यीशु के दियागा मेरान साटे हेन। दिकु चाहता डा कि पिलातुस डीचके गुजू गा दण्डो जिकी एठा डीचके गोच्केच। मेटे पिलातुस नी यीशु टे कोम्बाराके, “चोच आम यहूदी कुरकू गा राजा होय?”

यीशु नी जवाब जीके, “आमनी सच्चोका मंडीके होय। पेनो इंजा राज्य येटेन पृथ्वी गा बाऊ होय। अगर डाऊ धारे इंजा भाग्य इंजा घल्जी लड़ाई डाएवा। इंज पृथ्वी लिंजेन परमेश्वर गा बारेन सच्चो घागल गा घल्जी हेन मेन। हर म्या कोरो जो सच्चो टे प्यार दडावा होय डीच इंजागा अजुम्बा होय।” पिलातुस नी मंडीके, “मेटे सच्चो चोच होय?”

यीशु गा सेंग्गोन बातो बातो दडा गा बादोन, पिलातुस नी बल्लान गोंजा गा मेरान ओलेडो मंडीके, “इंजेन येनोगो तुनिका वाजा बान मालूम कि इनी कोरो के घोगेज गा लायको होय।” पेनो यहूदी अगुवाकु एठा गर्दी नी चिल्लातिंजटे मंडीके, डीचके क्रूस लिंजेन पेळेच्केच!” पिलातुस नी जवाब जीके, “डीच चोच्काभी गलत दडा गा दोषी बाऊ होय।” पेनो दिकु एठा भी ऊँचा आवाज गेन चिल्लातिंजू लज्जे। मेटे पिलातुस नी आफाई बार मंडीके, “डीच दोषी बाऊ होय!”

पिलातुस हिघराएन कि डीच गर्दी दंगा सुरुवात किवा, इनिघल्जी डीच हेजा सैनिककु द्वारा यीशु के क्रूस लिंजेन पेपेळेज गा घल्जी मनातिंजे। रोमी सैनिककु नी यीशु के बल्खा मुंडाके, एठा डीचके राजा गा कपळे उरिके, एठा दियागा कपरा लिंजेन जनोम टे आरुके मुकूट डोके। मेटे दिकु इनी मंडीटे दियागा मजाक उळातिंज लज्जे, “डोगे, यहूदी कुरकू गा राजा!”