40. यीशु के क्रूस लिंजेन पेळेजेच्बा होय।

यीशु गा मजाक उळातिंजा गा बादोन, सैनिक डीचके क्रूस लिंजेन पेपेळेज गा घल्जी साईंय्येनेच। दिकुनी डी क्रूस के डीचकेका तुटूळ होळाकेनेच डे लिंजेन डीच गुजूवा।

डी सैनिक यीशु के डी जागान साटे हेन जो “डोबळे” मेंबा होय एठा दियागा टी एठा नंगा के क्रूस लिंजेन ठोकातिंज्के। पेनो यीशु नी मंडीके, “हे बाटे, इंकुके मापोकेकु, चोयाकी इंकू बान हाडाई कि इंकू चोच दडा लक्के होय।” दिकुनी म्या तख्ती के भी दियागा कपार गा मठान टंगातिंज्के। डे लिंजेन ओल्के डा, “यहूदी कुरकू गा राजा।” पिलातुस नी दिकुटे इनी ओल गा घल्जी मंडीके डा।

मेटे सैनिककु नी कपळे गा घल्जी चिठ्ठीनौर येंडाके। जब दिकुनी येनोगो डाके टासो मेटे दिकुनी डी भविष्यवाणी के पूरा डाके जो मंडीवा होय, “दिकुनी इंजा कपळे के इकुका खातिंजे, एठा इंजा कपळे गा घल्जी चिठ्ठीनौर येंडाके।”

देटे जगान डाकू किंज भी डा, दिकुके सैनिककु नी डीका टेमो लिंजेन क्रूस लिंजेन पेळेचकेकु डा। दिकुनी दिकुके यीशु गा बारी भी कोनेन डोकेकू डा। दिकु तालाटे म्या डाकू नी यीशु गा मजाक उळातिंज्के, पेनो दूसरा नी मंडीके, “चोच आम बान हिघरा कि परमेश्वर आमके दण्डो जेवा? आले घोनेच्का बुरा कामयनौर के दडा गा दोषी होय, पेनो इनी कोरो निर्दोष होय।” डाबोलटे डीचनी यीशु टे मंडीके, “जब आम अमा राज्य गेन हेन टासो मेटे कृपया इंज्के यादो डोकेमी।” यीशु नी जवाब जीके, “टाइंज का आम इंजा सेंग्गोन स्वर्गलोक गेन थंदळवा।”

यहूदी अगुवाकु एठा गोंजा गा अलग्गो कुरकू नी यीशु गा उळातिंज्के। दिकुनी दियाटे मंडीके, “अगर आम परमेश्वर गा कोण होय, मेटे क्रूस टे इटान अगुरोए एठा खुद के बचातिंजा! मेटे आले अमा लिंजेन विश्वास डाएवा।”

मेटे डी सेबाई देशो गा बादळा पूरा खिजाटे केंडेन, भला कि डी दिन गा डया गा टेमो डा। इनी डया गा टेमो केंडेन मेना डा एठा आफाई घंटा टाएन येनोगोका थंदळके डा।

मेटे यीशु नी हाकोटे मंडीके, “डाएन मेना! हे बाटे, इंज इंजागा आत्मा अमा टी गेन जेवा मेना।” मेटे डीचनी हेजा कापर के झुकातिंज्के एठा हेजा जान के आराके। जब डीच गोएन मेटे म्या भूकंपा हेन। डी खाट पर्दा जो परमेश्वर गा थंदळ गा जगा टे कुरकू के अलग्गोकु डा मठा टे इटा गा कोने टयान डो बारी भागोएन।

हेजागा गुजू गा द्वारा, यीशु नी कुरकू गा घल्जी परमेश्वर गा मेरान हेजे गा कोरा खुल्लाके। जब यीशु गा निगरानी दोडो मिठाच म्या सैनिक नी जो चोच्का डाएन डा इनी सेबाई डोके मेटे डीचनी मंडीके, “पक्का रुपोटे, इनी कोरो निर्दोष डा। इनिज परमेश्वर गा कोंटे होय।”

मेटे यूसुफ एठा नीकुदेमुस जीमू गा बारी यहूदी अगुवाकिंज हेन। दिकु विश्वास दडा डा कि यीशु का मसीह डा। दिकुनी पिलातुस टे यीशु गा कोम्बोर के आसिके। दिकुनी दियागा कोम्बोर के कपळे टे उगुरके। मेटे दिकु डीचके फाटा तालाटे गेटटे आरुके मिनी कब्र गेन सालेनेच एठा डेगा तालान डोकेनेच। मेटे दिकुनी डी कब्र गा दरोजो के बंदो दोडो गा बादो दडा घल्जी म्या `गोटा उगुरके।