42. यीशु स्वर्ग गेन हीरावा होय

जो दिन परमेश्वर नी यीशु के गोएन मिठाजाटे जीटाकेनेच डा, दियागा बारी चेलाकिंज मेरा गा गाँव गेन सेने लक्के डा। सेंदरा लठ्ठाका दिकु यीशु गा सेंग्गोन जो डाएन डा। दियागा बारेन बातो लक्के डा, दिकुन आशा डा कि डीच मसीह डा, पेनो मेटे भी डीचके गोच्केनेच डा। नका डी जापाए मंडीवा होय कि डीच डाबोलटे जीटाएन मेना होय। दिकु बान हाडाई डा कि तुनि बातो लिंजेन विश्वास दडा होना होय।

यीशु नी दिकुगा मेरान हेंडो दिकुगा सेंग्गोन सेंदरा सुरुके, पेनो दिकु डीचके चिनाडुका बाने। डीचनी कोम्बराके कि डीच चोजा बारेन बातो लक्के डा। दिकुनी डीचके ओले दिन गेन यीशु गा सेंग्गोन डाएन सेबाई घटना गा बारेन घाल्के। दिकुनी सोचातिंज्के कि दिकु तुनिका परदेशी टे बातो लक्के डा जो बान हाडाई डा कि यरूशलेम गेन चोच डाएन।

मेटे यीशु नी दिकुके समझातिंज्केकु कि परमेश्वर गा वचन मसीह गा बारेन चोच मंडीवा होय। घोनेच पेला, परमेश्वर गा कोनेटे मंडी मिंकू नी मंडीके डा कि बुरा कुरकू मसीह गा तक्लिप जेवा एठा गोजेज्बा। पेनो परमेश्वर गा कोनेटे मंडी मिंकू नी इनी भी मंडीके डा कि डीच आफाई दिन गा बादोन जीटाऊवा।

जब दिकु डी पूरा गेन आदिरजे देटेन दिकिंज बर्खिंज ठहरातिंजू चाहता डा, मेटे टाएन अंदजो टे सिंगरूप जे डा। दिकुनी यीशु के दिकुगा सेंग्गोन ठहरातिंजू गा घल्जी आमंत्रित डाके, इनिघल्जी डीच दिकुगा सेंग्गोन म्या उरा गेन ओले। हेजा सिंगरूप गा आटा के जोम गा घल्जी डीच सुबांजे। यीशु नी म्या सोकळा के साटे दियागा घल्जी परमेश्वर गा धन्यवाद जीके, एठा डाबोलटे डीके टुक्काके। अचानक टे, दिकुनी चिनाये कि डीच यीशु डा। पेनो डीका टेमो, डीच दिकुगा मेटटे ऊळातिंजे।

डी बारी कुरकिंज नी इनिज-दियाटे मंडीके, “डीच यीशु डा! इनिघल्जी जब डीचनी आलेके परमेश्वर गा वचन के समझातिंज्केमी डा मेटे आले भेबाव आरिके डा!” तुरुटोका, डीच ओटजे डो डाबोलटे यरूशलेम गेन ओले। जब दिकु आदिरजे मेटे दिकुनी चेलाकू के घाल्के, “यीशु जिटाका होय! आलेनी डीचके डोकेनेच होय!”

जब चेलाकू बातो लक्के डा, यीशु अचानक टे डी खुली गेन दिकुगा सेंग्गोन ओटजे मेना। डीचनी मंडीके, “आपेन शांति घाटायु!” चेलाकू नी सोचातिंज्के कि डीच तुनिका भूतो बाऊ डा, पेनो यीशु नी मंडीके, “आपे चोया हिघरावा होय?आपे इनी चोया बान सोचातिंज होय कि इनिज सच्चोनका इंज्का मेना, यीशु मेना? इंजा टी एठा नंगा के डोगे। भूतोकु गा मेरान येनोगो कोम्बोर बान थंदळ जैसा इंजा मेरान होय।” इनी तिटिपी गा घल्जी कि डीच तुनिका भूतो बाऊ डा, डीचनी जोम गा घल्जी चोच्का आसिवे। दिकुनी डीचके काकू गा म्या तुकडा जीके, एठा डीचनी डीके जोम्जे।

यीशु नी मंडीके, “इंजा बारेन परमेश्वर गा वचन जो चोच्काभी मंडीवा होय डी घळातिंजुवा। इंज्नी आपेके घाल्के मेना डा कि कि येनेगा डाऊ जरुरी होय।” मेटे यीशु नी दिकुके परमेश्वर गा वचन अच्छा टे समझातिंज्केकु। डीचनी मंडीके, “घोनेच पेला परमेश्वर गा कोनेटे मंडी मिंकूनी ओल्के डा कि इंज, मसीह के कासु तुटूल होना, गुजू होना एठा डाबोलटे आफाई दिन गा बादोन गोएन मिठाच जाटे जीटाऊवा।”

“डी परमेश्वर गा कोनेटे मंडी मिंकूनी इनी भी ऑल्के डा कि इंजा चेलाकू परमेश्वर गा वचन गा एलान डाएवा। दिकु हर म्याखोम के मन बबादला गा घल्जी घालेवा। अगर दिकु येनोगो दडावा होय मेटे परमेश्वर दिकुके पापो के मापोएवा। इंजा चेलाकू इनी खाबोर गा प्रचार दडा यरूशलेम टे सुरुएवा। मेटे दिकु सेबाई जगह सेबाई जाटोनौर गेन सेनेवा। आपे कुरकू इंजा हर म्या बातो एठा कामय गा गवाह होय जो इंज्नी मंडीके एठा डाके डा, एठा डी सेबाई गा भी जो इंजा सेंग्गोन डाएन।”

हेजे चालीसो दिन गा दौरान, यीशु हेजा चेलाकू लिंजेन चोटोका बार ओटजे। म्या बार मेटे डीच म्या का टेमो लिंजेन ५०० टे येठाभी कुरकू लिंजेन ओटजे मेना! डीचनी हेजा चेलाकू लिंजेन चोटोका तरीका टे साबितके कि डीच जीटा डा, एठा डीचनी दिकुके परमेश्वर गा राज्य गा बारेन शिक्षा जीके।

यीशु नी हेजा चेलाकू मंडीके, “परमेश्वर नी इंज्के स्वर्ग एठा पृथ्वी गा हर म्या कोरो लिंजेन राजो दडा गा हाक जिले होय। इनिघल्जी नका इंज आपेटे मंडीवा मेना, सेनेडो सेबाई जाटो गा कुरकू के चेला आरुकू। येनोगो दडा गा घल्जी, आपेके दिकुके बाटे, कोंटे, एठा पवित्र आत्मा गा जीमू टे बपतिस्मा जिऊ होना होय। जो चोच्काभी इंज्नी आपेके हुकूम जीके होय डी सेबाई के ममानातिंज भी आपेन दिकुके इथु होना होय। यादो डोए, इंज हमेशा आपेगा सेंग्गोन थंदळवा।”

यीशु गा गोएन मिठाच जाटे जीटाऊ गा चालीसो दिन गा बादोन, डीचनी हेजा चेलाकू टे मंडीके, “जब टाएन कि इंजा बाटे आपेके शक्ति बान जिऊ होय मेटे यरूशलेम गेन ठहरातिंज थंदळे। डीच आपे लिंजेन पवित्र आत्मा कुकूल गा द्वारा येनोगो डाएवा।” मेटे यीशु स्वर्ग गेन ओले मेना, एठा म्या बादळा नी डीचके दिकुगा नजर टे उखुके। स्वर्ग गेन यीशु सेबाई चीजो लिंजेन राजो दडा परमेश्वर गा जेवना कोनेन सुबांजे।