43. मसीह गा मण्डली गा सुरुवात डाऊवा होय

यीशु गा स्वर्ग टे हिरागा बादोन, चेलाकू यरूशलेम गेन का रुकातिंजे जैसा कि यीशु नी दिकुके दडा गा हुकूम जीके डा। डेगा विश्वासी कुरकू टाऊ लगी म्या सेंग्गोन प्रार्थना दडा गा घल्जी गोलाऊ लक्कू डा।

हरेक साल, फसह गा तिवार गा ५० दिन गा बादोन, यहूदी कुरकू पिन्तेकुस्त जीमू गा म्या कास दिन के ममानातिंज लक्कू डा। पिन्तेकुस्त डी टेमो डा जब यहूदी कुरकू गुं गा हिर के ममानातिंज लक्कू डा। सेबाई दुनिया टे यहूदी कुरकू पिन्तेकुस्त गा दिन के म्या सेंग्गोन ममानातिंज गा घल्जी यरूशलेम गेन हेन डा। इनी साल, पिन्तेकुस्त ममानातिंज गा टेमो यीशु गा स्वर्ग गेन सेने गा अंदाजोटे म्या हप्ताह गा बादोन हेन डा।

जो टेमो सेबाई विश्वासी कुरकू म्या सेंग्गोन गोलाएन डा, मेटे जो उरा गेन दिकु डा अचानक टे देटेन तेजो हवा गा आवाज टे भेट्टेन। मेटे सिंगेल गा अफो गा खिजा डुगू मिनी अदा सेबाई विश्वासीकु गा कपार गा मठान ओटजे। दिकु सेबाईकु पवित्र आत्मा टे भेट्टेन एठा दिकुनी अलग्गो भाषानौर गेन परमेश्वर गा स्तुति डाके। इनी डी भाषानौर डा डीके मंडी गा घल्जी दिकुके पवित्र आत्मा नी पक्काकेकु डा।

जब यरूशलेम गेन थंदळ मिंकू कुरकू नी डी आवाज के आजुम्के, मेटे डी गर्दी गा रुपो इनी दोडो गा घल्जी म्या सेंग्गोन हेन कि चोच डाऊ लक्के डा। दिकुनी विश्वासीकु के परमेश्वर गा द्वारा डाके मिनी खापेट-खापेट कामय गा एलान दडा लठ्ठाका आजुम्के। दिकु बिना ध्यान गा डा चोयाकी दिकु डी कामय के इकुगा भाषानौर गेन आजुम लक्के डा।

इंकू तालाटे अदा कुरकू नी मंडीके कि डी चेलाकू नशा गेन डा। पेनो पतरस टेंगेंजे एठा दिकुटे मंडीके, “इंजा बातो आजुमे! इनी कुरकू नशा गेन बाऊ होय! येनेगा बजाए, जो आपे दोडोवा होय जो योएल परमेश्वर गा कोनेटे मंडी मिठाच नी मंडीके डा कि डाऊवा, परमेश्वर नी मंडीके, ‘आखरी दिन गेन, इंज आपना आत्मा उखीळेबा।’”

“हे इस्राएली कोरोकु, यीशु म्या येनोगो कोरो डा डीचनी इनी तिटीपि गा घल्जी डाके कि डीच जे डा घोनेच्का अचम्बो कामय डाके डा। डीचनी परमेश्वर गा शक्ति टे अचम्बो कामय के डाके डा। आपे इनी हाडाई होय, चोयाकी आपेनी इनी कामयनौर के डोके होय। पेनो आपेनी डीचके क्रूस लिंजेन पेळेच्केनेच!”

“यीशु गोएन मेना पेनो परमेश्वर नी डीचके गोएन मिठाच जाटे जीटाकेनेच। इनिज नी डी बातो के पुराके डीके म्या परमेश्वर गा कोनेटे मंडी मिठाच नी ओल्के डा, ‘आम अमा पवित्र कुरकू के कब्र गेन सळातिंज डाए बाने।’ आले गवाह होय कि परमेश्वर नी यीशु के डाबोलटे जीटाकेनेच।”

“परमेश्वर बाटे नी नका यीशु के डाखुरी कोनेन सुबांके डीचके आदर जीके होय। एठा यीशु नी आलेगा घल्जी पवित्र आत्मा कुल्के होय जैसा कि डीचनी वादा डाके डा कि डीच कुलेवा। पवित्र आत्मा का डी कामयनौर के डा डाए लक्के होय डीके आपे दोडो लक्के एठा आजुम लक्के होय।”

“आपे नी डी कोरो, यीशु के क्रूस लिंजेन पेळेचके। पेनो पक्का रुपोटे चिनाया कि परमेश्वर नी यीशु के सेबाई चीजो लिंजेन प्रभु एठा मसीह बर्खिंज भी ठहरातिंज्के होय!”

पतरस गा आजुम मिंकू कुरकू दियागा द्वारा मंडीके मिनी बातो टे ताला टाएन ओखेंजे डा। इनिघल्जी दिकुनी पतरस एठा चेलाकू टे कोम्बराके, “हे डाईचो, आलेन चोच दडा होना?”

पतरस नी दिकुके जवाब जीके, “आपे तालाटे हर म्याखोम आपना पापो गा घल्जी मन बदलाए ताकि परमेश्वर आपेगा पापो के मपोकी, एठा यीशु मसीह गा जीमू टे बपतिस्मा सेगे। मेटे डीच आपेके वरदान रुपोटे पवित्र आत्मा भी जेवा।”

(पतरस नी जो मंडीके दिया लिंजेन अंदाजोटे ३,००० कुरकू नी विश्वास डाके एठा यीशु गा चेलाकू आरोएन। दिकुनी बपतिस्मा सावे एठा यरूशलेम गा मसीह गा मण्डली गा हिस्सा आरोएन।

जब कलमके मिंकू चेलाकू नी दिकुके शिक्षानौर जीके मेटे विश्वासीकु नी टाऊलगी आजुम्के। दिकु अक्सर मिलातिंजू डा एठा म्या सेंग्गोन आटा जोम लक्कू डा, एठा दिकुनी अक्सर इनिज-दियागा घल्जी प्रार्थना डाके। दिकुनी बेल्लाटे परमेश्वर गा स्तुति डाके एठा जो चोच्काभी दिकुगा मेरान डा दिकुनी इनिज-दियागा सेंग्गोन घल्के। पूरा गा हर म्या कोरो दिकुगा घल्जी अच्छा बिचार दोडो डा। हारेक दिन, जादा-जादा टे कुरकू विश्वासी आरु लज्जे।