8. परमेश्वर यूसुफ एठा दियागा परिवार के बचातिंजेवा होय

चोटोका साल गा बादोन, जब याकूब बुड्डाएन मेना डा, मेटे डीचनी हेजा अच्छा कोण यूसुफ के दियागा डाईटे टाकू के चिचाना गा घल्जी कुल्केनेच जो जानवरकु गा घोंजा गा देखभाल दडा लक्के डा।

यूसुफ गा डाईटे टाकूनी दियाटे खीजो दोडो डा चोयाकी दिकुगा बाटे दियाटे येठाभी प्यार दोडो डा एठा इनिघल्जी भी कि यूसुफ नी सापना डोके डा कि डीच दिकुगा राजो मिठाच आरुवा। जब यूसुफ हेजा डाईटे टाकू गा मेरान हेन मेटे दिकुनी डीचके उठायेनेच एठा डीचके भाग्यकु गा व्यापार दडामिंकू के किजीकेनेच।

उरा गेन हिराटे पेला यूसुफ गा डाईटे टाकूनी यूसुफ गा कपळे के चिराटे सिळी गा पचना गेन बेल्लाके। डाबोलटे दिकुनी डी कपळे हेजा बाटे के टिपीके ताकि डीच इनी सोचातिंजेवा कि तुनिका डोंगोर जानवर नी यूसुफ के घोच्केनेच होय। याकूब भेबाव नराजोके डा।

भाग्यकु गा व्यापार दडामिंकू डी कुरकू यूसुफ के मिस्र गेन साईय्येनेच। नील गडा गा धुरान सुबांके मिनी मिस्र म्या खाट एठा शक्तिशाली देशो डा। डी भाग्यकु गा व्यापार दडामिंकू नी यूसुफ के म्या लकपाती सरकारी अधिकारी के भाग्य गा रुपो गेन किजीकेनेच। यूसुफ नी हेजा स्वामी गा अच्छा खिजाटे सेवा डावे, एठा परमेश्वर नी यूसुफ के आशीष जीके।

दियागा स्वामी गा जापाएटे नी यूसुफ गा सेंग्गोन गिटिच गा कोशिश डावे, पेनो यूसुफ नी इनी रिती टे परमेश्वर गा खिलाफ पापो दडा टे बान मेंके। डीच खिजोएन एठा यूसुफ लिंजेन लाबाळ आरोप येंडाके, इनिघल्जी डीचके जेलेन केटकेनेच। येटे टाएन कि जेलेन भी, यूसुफ परमेश्वर गा प्रति सच्चो थंदळके, एठा परमेश्वर नी डीचके आशीष जीके।

बारी साल गा बादोन, यूसुफ आएभी जेलेंके डा, भलाका डीच निर्दोष डा। म्या राटो, फिरौन, जैसा कि मिस्री कुरकू इकुगा राजाकु के हाको डा, फिरौन नी बारी सापना डोके दिकुनी डीचके ठायका बिचारेन बोचोकेनेच। दियागा तुनिकभी सलाहकार डीचके डी सापना गा मतलब बान घालडुका।

परमेश्वर नी यूसुफ के सापना गा मतलब घागल गा शक्ति जीके डा, इनिघल्जी फिरौन नी यूसुफ के जेलाटे हेजा मेरान हाकोकेनेच। यूसुफ नी डीचके डी सापना गा मतलब घाल्के एठा मंडीके, “परमेश्वर भेट्टिके अनोजो मिंकूके याई साल गा बादोन सुकाल गा याई साल कुले लक्के मेना होय।”

फिरौन यूसुफ टे येटो खुशेन मेना कि डीचनी डीचके मिस्र गा दूसरा सेबाई टे शक्तिशाली कोरो ठहरातिंज्केनेच।

यूसुफ नी कुरकू टे अच्छा अनोजो मिनी याई साल गा दौरान घोनेच आटा के घोगाला गा घल्जी मंडीके। जब याई साल गा सुकाल हेन मेटे यूसुफ नी कुरकू के डी आटा किजीके ताकि मेरान जोम गा घल्जी घाटायु होना।

डीच सुकाल बस मिस्र गेन का बाने, पेनो कनान गेन भी भयंकर डी देटेन याकूब एठा दियागा परिवार थंदळ डा।

इनिघल्जी याकूब नी हेजा सेबाई टे खाट कोण के आटा मोलाटे सा गा घल्जी मिस्र देशो गेन कुल्केनेच। जब डीच आटा मोलाटे सा गा घल्जी यूसुफ गा सम्मान टेंगेंजे मेटे डी डाईटे टाकिंज नी यूसुफ के बान चिनाडुका। पेनो यूसुफ नी दिकुके चिनायेकु।

इनी मालूम दडा गा घल्जी कि चोच डीच बदलातिंजे होय दिकुगा जाँच दडा गा बादोन, यूसुफ नी दिकुटे मंडीके, “इंज आपेगा डाई यूसुफ मेना! हिघरा बाकी। जब आपेनी इंज्के भाग्य मेंटो किजिकेमी डा मेटे आपेनी बुरा दडा गा बिचारवे डा, पेनो परमेश्वर नी डी बुराई के भलाई गा घल्जी उपयोग डाके! हेजे एठा मिस्र गेन थंदळे ताकि इंज आपेगा एठा आपेगा परिवारनौर गा घल्जी आटा गा सोए डाकि होना।

जब यूसुफ गा डाईटे उरान डाबोलटे हिराके एठा हेजा बाटे याकूब के घाल्के कि यूसुफ आए भी जिटाका होय मेटे डीच भेबाव कुशोएन मेना डा।

हालाकि याकूब म्या बुड्डा कोरो डा तोभी हेजा पूरा परिवार गा सेंग्गोन मिस्र गेन ओले मेना, एठा दिकु डेनेन थंदळ लज्जे। याकूब गा गुजू टे पेला, डीचनी हेजा हरेक कोण के आशीष जीके।

वादा गा डी वायदा जो परमेश्वर नी अब्राहम टे डाके डा डी इसहाक लिंजेन एठा डेगा बादोन याकूब, एठा डेगा बादोन दियागा बारह कोणकु एठा दिकुगा परिवारनौर लिंजेन हेन मेना डा। डी बारह कोणकु गा पिढी इस्राएल गा बारह पिढी आरोएन।