16. तारणारे

यहोशवा मेल्यार, इस्राएली लॉकांनी परमेश्वराचा अनुकरण करूक नाय, उरलल्या कनानी लॉकांका घालवन देवक नाय नी परमेश्वराचे नियम पाळूक नाय. यहोवा खरो नी जिवंत देव हेची उपासना करूची सोडून इस्राएली लॉक कनानी देवतांची पूजा करूक लागले. इस्राएलाक राजा नाय व्हतो, म्हणान जो तो आपल्या मनाक वाटा ता करी.

इस्राएली लॉकांनी सतत परमेश्वराचे आज्ञा मोडल्यानी, म्हणान परमेश्वरान तेंका तेंच्या शत्रूच्या समोर हरवन शिक्षा दिल्यान. त्या शत्रूंनी इस्राएली लॉकांचे वस्तू चोरून न्हील्यानी, तेंच्या संपत्तीचो नायनाट केल्यानी नी तेंच्यातल्या कित्येक लॉकांका मारून टाकल्यानी. मॉप वर्सांनी, परमेश्वराचो आज्ञाभंग नी शत्रूकडना जुलूम सोसल्यार तेंका पश्चाताप झालो नी तेंनी सुटकेक परमेश्वराकडे धाव घितल्यानी.

मगे परमेश्वरान तेंका येक तारणारो पाठयल्यान जेना तेंका शत्रूपासना सोडयल्यान नी तेंच्यात शांति स्थापल्यान. पण मगे इस्राएली लॉकांका परमेश्वराचो इसर पडलो नी ते परत मूर्तिपूजा करूक लागले. मगे देवान बाजूच्या मिद्यानी लॉकांकडना तेंचो पराभव केल्यान.

मिद्यानी लॉकांनी सात वर्सा इस्राएली लॉकांचा अन्न-धान्य हडप केल्यानी. आता इस्राएली लय भियालले नी आपण मिद्यान्यांच्या हातात सापडता नये म्हणान ते गुहेत ऱ्हवाक लागले. शेवटाक आपण वाचाक व्हयव म्हणान परमेश्वराक इनंती करूक लागले.

येके दिवशी गिदोन नावाचो येक इस्राएली माणूस मिद्यान्यांनी आपला धान्य चोरता नये म्हणान गुपचूप तेंची झोडणी करी व्हतो. यहोवाचो येक दूत तेका येवन म्हणालो, "ए बलवान वीरा, देव तुझ्याबरोबर हा. जा नी इस्राएली लॉकांका मिद्यान्यांच्या हातातना सोडव."

गिदोनाच्या बापाशीन येका मुर्तेक वेदी बनयल्यान व्हती. परमेश्वरान गिदोनाक ती वेदी तोडुक सांगल्यान. पण गिदोनाक लॉकांची भिती वाटली म्हणान तो आंधार पडाची वाट बघी व्हतो. मगे तेना त्या वेदीचे फोडून तुकडे तुकडे केल्यान. मुर्तेसाठी बांधलल्या वेदीजवळ तेना जिवंत देवाक येक नयीन वेदी बांधल्यान नी तेच्यार परमेश्वराक यज्ञपशु अर्पण केल्यान.

दुसऱ्या दिवसाक त्या वेदीचो कोणीतरी नाश केलो हा ह्या बघून लॉक लय रागावले. ते गिदोनाक ठार मारूक तेच्या घराक गेले, पण गिदोनाचो बापुस तेंका म्हणालो, "तुम्ही आपल्या देवाची मदत करुचो प्रयत्न कित्याक करतास? जर तो देव हा तर तेका स्वतःचा रक्षण करूक देवा!" तेना असा म्हटल्यामुळाक तेंनी गिदोनाक मारूक नाय.

मगे मिद्यानी लॉक परत इस्राएली लॉकांचा धान्य चोरुक इले. ते येवढे जाण व्हते की, ते मोजूच्या पलीकडे व्हते. गिदोनान इस्राएली लॉकांका यकत्र बोलवन मिद्यान्यांबरोबर युद्ध करूक तयार केल्यान. गिदोनान परमेश्वर आपणाक इस्राएली लॉकांची सुटका करूक वापरणार हा हेची खात्री पटाक व्हयी म्हणान देवाकडे दोन चिन्हा मागितल्यान.

पयला चिन्ह म्हणान गिदोनान जमनीर कापड ठेयल्यान नी परमेश्वराक म्हटल्यान की, उद्या सकाळी जमनीर दव न पडता फक्त कापडारच पडाक व्हयो असा व्होवंदे. देवान तसाच केल्यान. दुसऱ्या रात्री, तेना म्हटल्यान की, जमीन भिजादे पण कपडो सुकोच ऱ्हवाक व्हयो. देवान ताव केल्यान. ह्या दोनव चिन्हांनी गिदोनाक खात्री पटली की, परमेश्वर तेचो उपयेग इस्राएलाक मिद्यान्यांपासना सोडवक करणार हा.

३२,००० इस्राएली सैनिक तेच्याकडे इले, पण परमेश्वरान तेका सांगल्यान की, ते मॉप आसत. म्हणान युद्धाक घाबारणाऱ्या २२,००० सैनिकांका तेना परत पाठयल्यान. परमेश्वरान गिदोनाक सांगल्यान की, ते आजूनव लय आसत. म्हणान ३०० सैनिकांका सोडून बाकी सगळ्यांका तेना घराक पाठवन दिल्यान.

त्या रात्रीक परमेश्वरान गिदोनाक सांगल्यान, "तू मिद्यान्यांच्या छावणीकडे जा नी ते काय बोलतत ता आयकान भिया नको." म्हणान त्या रात्री तो छावणीकडे गेलो नी आपल्याक पडलला सपान येक मिद्यानी सैनिक आपल्या मित्राक सांगता ता गिदोनान आयकल्यान. त्या सैनिकाचो मित्र म्हणालो, "ह्या सपनाचो अर्थ, गिदोनाचा सैन्य मिद्यानी सैन्याचो पराभव करीत असो व्हतो. गिदोनान ह्या आयकान परमेश्वराची उपासना केल्यान.

मगे गिदोन आपल्या सैनिकांकडे परातलो नी तेना प्रत्येकाक याक शिंग, याक मडक्या नी येक मशाल दिल्यान. मिद्यानी सैनिक झोपले व्हते, त्या छावणेक तेंनी घेरल्यानी. गिदोनाच्या ३०० सैनिकांनी आपले मशाली मडक्यात घालून ठेवल्यामुळाक मिद्यान्यांका तेंचो प्रकाश दिसलो नाय.

मगे येकाच येळेक गिदोनाच्या सैनिकांनी मडकी फोडल्यानी नी आपल्या मशालीचो जाळ दिसाक लागलो. तेंनी आपआपली रणशिंगा फुंकल्यानी नी गर्जना केल्यानी की, "यहोवा देवाची तलवार नी गिदोनाची तलवार!"

परमेश्वरान मिद्यान्यांका गोंधळून टाकल्यान नी म्हणान ते आपसातच येकमेकर हल्लो करून मारूक लागले. लगेच मिद्यान्यांका हाकलूक मदत करूक म्हणान तेंनी बाकीच्या इस्राएली लॉकांका तेंच्या घराकडे बोलावणा पाठयल्यानी. तेंनी तेंच्यातल्या कित्येकांका ठार मारल्यानी नी बाकीच्यांका इस्राएलाच्या जमनीतना घालवन दिल्यानी. त्याच दिवसाक १,२०,००० मिद्यानी सैनिक मेले. परमेश्वरान ह्या प्रकारान इस्राएली लॉकांची सुटका केल्यान.

लॉक गिदोनाक आपलो राजा करूक बघी व्हते. गिदोनान तेंका असा करूक नकार दिल्यान, पण तेंच्यातल्या प्रत्येकान मिद्यान्यांकडना घेतलल्या सोन्याच्या आंगठेंपैकी काय तेना मागल्यान. लॉकांनी गिदोनाक मॉप सोना दिल्यानी.

मगे गिदोनान त्या सोन्यापासना महायाजक घालत असलल्या कापडासारखो येक इशेष कापड तयार केल्यान. पण लॉकांनी त्या कापडाक मूर्ती मानून तेची ते पूजा करूक लागले. मगे परमेश्वरान इस्राएलाक परत शिक्षा केल्यान, कारण तेंनी मूर्तिपूजा केलल्यानी. परमेश्वरान तेंच्या दुश्मनांका तेंका हरवक लावल्यान. शेवटाक तेनी परमेश्वराचीच मदत मागल्यानी नी परमेश्वरान तेंका दुसरो तारणारो पाठयल्यान.

ह्या नमुन्याची मॉपदा पुनरावृत्ती झाली. इस्राएली लॉक पाप करीत, परमेश्वर तेंका शिक्षा करी, ते पश्चात्ताप करीत नी परमेश्वर तेंचा तारण करूक तारणारो पाठवीत ऱ्हवा. मॉप वर्सापासना, परमेश्वरान इस्राएली लॉकांकडे तेंका शत्रूपासना सोडवक मॉप तारणारे पाठयल्यान.

शेवटाक, लॉकांनी दुसऱ्या देशांसारखो राजा परमेश्वराकडे मागल्यानी. तेंका उंच, सशक्त नी लढाईक नेतृत्व करणारो असो राजा व्हयो होतो. परमेश्वराक ह्या आवडाक नाय, तरीव तेना तेंच्या मागणे प्रमाण तेना तेंका येक राजा दिल्यान.