34. येशू मॉप गोष्टी शिकयता

येशून देवाच्या राज्याविषय मॉप गोष्टी सांगल्यान. उदाहरण सांगूचा तर, तेना म्हटल्यान, "देवाचा राज्य मोहरीच्या दाण्यासारख्या हा, जो कोणी येकान आपल्या शेतात पेरल्यान. तुमका म्हायत आसा की मोहरीचो दाणो ह्यो सगळ्या बियांतूर येकदम लहान हा."

पण जेळाक ह्यो मोहरीचो दाणो उगवान वाढता तेळाक बागेतल्या बाकीच्या झाडांपेक्षा ता सगळ्यात मोठा होवन येवढा वाढता की, आकाशातली पाखरा येवन तेच्या फांदयेर ऱ्हवतत."

येशून आणखीन येक गोष्ट सांगल्यान, "देवाचा राज्य खमीरासारख्या हा जा येका बायन पिठात घातल्यान नी सगळा पीठ फुगान गेला."

"देवाचा राज्य ह्या शेतात कोणीतरी लपवन ठेयलल्या गुप्त धनासारख्या हा. दुसऱ्या माणसाक ता सापडला नी तेना ता परत पुरून ठेयल्यान. तेका येवढो आनंद झालो की तेना आपली सगळी संपत्ती इकून इलल्या पैश्यांनी ता शात इकत घितल्यान."

"देवाचा राज्य येका मौल्यवान मोत्यासारख्याव हा. जेळाक मोत्यांच्या व्यापाऱ्याच्या तो नजरेक पडलो, तेळाक तेना तेची सगळी मालमत्ता इकून टाकल्यान नी इलल्या पैश्यांनी तो मौल्यवान मोती इकत घितल्यान."

तेळाक येशून काय लॉकांका येक गोष्ट सांगितल्यान जे स्वतःच्या चांगल्या कामार भरवसो ठेयत नी दुसऱ्या लॉकांका तुच्छ मानीत. तेना म्हटल्यान, "दोन माणसा प्रार्थना करूक मंदिरात गेले. तेंच्यातलो येक जकातदार नी दुसरो येक धार्मिक पुढारी व्हतो."

धार्मिक पुढाऱ्यान अशी प्रार्थना केल्यान, "हे देवा, मीया तुका धन्यवाद दितय की मीया दुसऱ्या माणसांसारखो पापी नायय. जे चोरी, अन्याय, व्यभिचार करतत तेंच्यासारखो मीया नायय नी ह्या जकातदारासारखोव नायय."

"उदाहरणार्थ, मीया आठवड्यातना दोनदा उपास करतय नी आपल्या सगळ्या उत्पन्नाचो दशांश तुका दितय."

पण तो जकातदार त्या धार्मिक पुढाऱ्यापासना लय लांब उभो व्हतो नी वर स्वर्गाकडेव बघित नाय व्हतो. त्याऐवजी, तेना आपल्या हातांनी छाती बडवून घेतल्यान नी प्रार्थना केल्यान, "देवा, माझ्या पाप्यार दया कर."

तेळाक येशून म्हटल्यान, "मीया तुमका खरा सांगतय, देवान त्या जकातदाराची प्रार्थना आयकान तेका नीतिमान ठरवल्यान. पण तेका धार्मिक पुढाऱ्याची प्रार्थना आवडाक नाय. देव प्रत्येक घमेंडी माणसाक नीच करीत नी जो स्वतःक नम्र बनवता तेका देव उंचावीत."