35. दयाळू बापाशीची गोष्ट

येके दिवशी, तेचा आयकाक जमलल्या मॉप जकातदार नी पापी लॉकांका येशू शिकयत व्हतो.

काय धार्मिक पुढारीव त्या जागेर व्हते नी येशू पापी लॉक नी जकातदार हेंका मित्राप्रमान वागयता ह्या तेंनी बघल्यानी नी ते तेच्यार आपसात टीका करूक लागले. तेळाक येशून तेंका ही गोष्ट सांगल्यान.

येका माणसाक दोन झिल व्हते. धाकल्या झिलान तेच्याकडे जावन म्हटल्यान, "बापाशी, माझ्या वाट्याक येणारी मालमत्ता माका आत्ता दी." म्हणान बापाशीन आपल्या संपत्तीचे दोन वाटे दोन झिलांसाठी केल्यान.

लवकरच धाकटो झिल सगळी मालमत्ता घेवन लांबच्या देशाक गेलो नी थय वायट मार्गांनी ती तेना संपवन टाकल्यान.

तेच्यानंतर, तो ऱ्हवत आसलल्या देशात भयंकर दुष्काळ पडलो नी तेका अन्न खरेदी करूक तेच्याकडे पैशे उरले नाय. तेळाक तेका येकच काम मिळाला, ता व्हता शेतात डुकरा चारूचा काम. तो यवढो गरीब नी भुकेललो व्हतो की डुकरा खायत आसलाले शेंगे खाव की काय असा तेका वाटला.

शेवटाक, त्या धाकट्या झिलान स्वतःक म्हटल्यान, "मीया हय काय करतय? माझ्या बापाशीच्या घरात नोकरचाकरांची खावची चंगळ हा नी मीया हय उपाशी मरतय. मीया आपल्या बापाशीकडे परत जायन नी तेचो येक चाकर म्हणाना ऱ्हवाक इनंती करीन."

असल्याप्रकारान तो धाकतो झिल आपल्या बापाशीच्या घराकडे जावक निघालो. तो लांब आसतानाच, बापाशीन तेका बघल्यान नी तेका तेची दया इली. तेना धावत जावन तेका मिठी मारल्यान नी तेचे मुके घेतल्यान.

झिल बोललो, "हे बापाशी, मीया देवाइरुद्ध नी तुझ्याइरुद्ध पाप केल आसय. मीया तुझो झिल म्हणवच्या लायकीचो नायय."

पण तेच्या बापाशीन येका चाकाराक बोलावन म्हटल्यान, "लवकर जा नी माझ्या झिलाक उत्तम कपडे घेवन ये नी तेच्या आंगार घाल! तेच्या हातात आंगठी नी पायात जोडे घाल. मगे येक पुष्ट वासुर मारून येक मेजवानी तयार कर नी आपण सगळे आनंद साजरो करूया, कारण माझो ह्यो झिल मेलो व्हतो, पण आता जिवंत झालो हा! हरावलो व्हतो, पण आता सापाडलो हा."

अशाप्रकारान तेंनी आनंदोत्सव सुरू केल्यानी. तेच्या आधी, थोरलो झिल शेतात कामा करून घराक इलो व्हतो. तेका नाच-गाण्याचो आवाज आयकान आश्चर्य वाटला.

जेळाक थोरल्या झिलाक कळला की, तेचो धाकटो भाव घराक इलो हा, तेळाक तो रागावलो नी भुतूर जायना. तेचो बापुस येवन तेका भुतूर येवक नी आनंदात सामील होवक इनंती करूक लागलो, पण तेना भुतूर जावक नकार दिल्यान.

थोरल्या झिलान आपल्या बापाशीक म्हटल्यान, "यवढी वर्सा मीया तुमच्यासाठी विश्वासान काम करीत इलय! मीया तुमच्या आज्ञेच्या पलीकडे काययेक केलय नाय, तरीव तुम्ही माझ्या मित्रांबरोबर आनंद करूक याक ल्हानग्यासा करडूव देवक नाय. पण तुझो ह्यो झिल तेची सगळी मालमत्ता वायट मार्गान नष्ट करून घराक परातल्यार, तुया तेच्यासाठी येक उत्तम वासुर कापलस!"

पित्यान उत्तर दिल्यान, "माझ्या झिला, तुया कायमचोच माझ्या वांगडाक आसस नी माझा जा काय हा, ता सगळा तुझाच हा. पण आता आपण आनंद करणा योग्यच आसा, कारण तुझो ह्यो भाव मेलो व्हतो, पण आता जिवंत झालो हा. तो हरावलो व्हतो, पण आता सापडलो हा!"