41. देव येशूक मेलल्यातना उठयता

सैनिकांनी येशूक वधस्तंभार खिळल्यार, इश्वास न ठेवणाऱ्या यहुदी पुढाऱ्यांनी पिलाताक म्हटल्यानी, "त्या खोटारड्या येशून म्हटलल्यान की, तो तीन दिवसांनी परत उठात. कोणीतरी त्या कबरेर पहारो ठेवणा गरजेचा हा, नायतर तेचे शिष्य तेचा शरीर चोरून नेतीत नी तो उठलो हा असा म्हणतीत."

पिलातान म्हटल्यान, "काय सैनिकांका घेवा नी त्या कबरेभवती तुमच्यान व्हयत तितको चांगलो बंदोबस्त ठेवा." तेळाक तेंनी त्या कबरेच्या तोंडारल्या धोंड्यार शिक्को मारून बंद केल्यानी नी थय सैनिकांका ठेयल्यानी, हेच्यासाठी की कोणी येशूचा शरीर चोरता नये.

येशूक कबरेत ठेवल्याच्या नंतरचो दुसरो दिवस ह्यो शब्बाथ दिवस व्हतो, त्या दिवशी यहूद्यांका कबरेकडे जावची मनाई व्हती. तेळाक शब्बाथाच्या दुसऱ्या दिवशी पहाटेक काय बायका सुगंधी द्रव्या घेवन कबरेर गेली. तेंनी ती तेच्या उत्तरकार्याक तयार केलल्यानी.

तेळाक अचानक, येक मोठो भूकंप झालो. विजेसारख्या रूप आसणारो येक देवदूत स्वर्गातना प्रकट झालो. तेना कबरेच्या तोंडार आसललो धोंडो बाजूक सरकवल्यान नी तेच्यार बसलो. तेळाक त्या कबरेर पहारो करीत आसलल्या सैनिकांका लय भीती वाटली नी ते मेल्यासारखे जमनीर पडले.

जेळाक ती बायका कबरेजवळ इली, तेळाक देवदूतान तेंका म्हटल्यान, "भिया नको. येशू हय नाया. तेना सांगल्याप्रमाण तो मेलल्यातना उठलो हा! बघा, ज्या कबरेत तेका ठेवलला व्हता ती जागा." तेळाक त्या बायकांनी भुतूर जावन जय येशूचा शरीर ठेवलला व्हता, ती जागा बघल्यानी. तेचा शरीर त्या जागेर नाय व्हता!

तेळाक देवदूतान त्या बायकांका म्हटल्यान, "जावा नी शिष्यांका सांगा, 'येशू मरणातना उठलो हा नी तो तुमच्या पुढे गालीलाक जाता हा.' "

ह्या आयकान बायकांका लय भीती वाटली नी आनंदव झालो. तेंनी धावत जावन शिष्यांका ही आनंदाची बातमी सांगितल्यानी.

ती बायका शिष्यांका ही बातमी सांगूक जायत आसताना, येशून तेंका दर्शन दिल्यान नी तेंनी तेका नमन केल्यानी. येशून म्हटल्यान, "भिया नको. जावा नी माझ्या शिष्यांका गालीलात येवक सांगा. मीया तेंका थयच भेटान."