46. पौल ख्रिस्ती बनता

शौल ह्यो तरणो माणूस स्तेफनाक दगडमार करणाऱ्यांचे कपडे सांभाळीत व्हतो. तो येशूर इश्वास ठेयत नाय व्हतो, म्हणान तो इश्वासू लॉकांचो छळ करीत आसायचो. यरुशलेमेत तो घराघरात जावन इश्वास ठेयणारे बायका नी बापये दोघांकाव तुरुंगात टाकीत आसायचो. महायाजकान शौलाक दिमिष्क शहरातल्या ख्रिस्ती लॉकांका पकडून यरूशलेमेक आणूक परवानगी दिल्यान व्हती.

शौल दिमिष्काच्या वाटेर प्रवास करीत आसताना, अचानक तेच्या सभवती आकाशातना प्रकाश चमाकलो नी तो जमनीर पडलो. शौलान कोणी तरी हाक मारताना आयकल्यान, "शौला! शौला! तुया माझो छळ कित्याक करतस?" शौलान इचारल्यान, "प्रभू, तुया कोण आसस?" येशून तेका म्हटल्यान, "मीया येशू आसय. जेचो तुया छळ करतस."

शौल जेळाक उठलो, तेळाक तेका काय दिसना. तेळाक तेच्या मित्रांका तेका दिमिष्काक न्हेवचा लागला. शौलान तीन दिवस कायच खावक नी पिवक नाय.

दिमिष्कात हनन्या नावाचो येक शिष्य व्हतो. देवान तेका म्हटल्यान, "शौल ऱ्हवत आसलल्या घराक जा नी तेच्यार आपले हात ठेय म्हणजे तेका परत नजर येयत." पण हनन्यान म्हटल्यान, "प्रभुजी, मीया आयकल आसय की, ह्या माणसान कसो ख्रिस्ती लॉकांचो छळ केल्यान हा."देवान तेका म्हटल्यान, "जा! कारण यहुदी लॉकांकडे नी परराष्ट्रीयांकडे माझा नाव घेवन जावक मीया तेका निवडलय. माझ्या नावासाठी ह्यो लय दुःख सोसतलो हा."

तेळाक हनन्यान शौलाकडे जावन तेच्यार आपले हात ठेयल्यान नी म्हटल्यान, "जो येशू तुका वाटेत प्रकट झालो, तेना माका तुझ्याकडे पाठयल्यान हा. हेच्यासाठी की, तुझी नजर तुका परत मिळाक व्हयी नी तुया पवित्र आत्म्यान परिपूर्ण होवक व्हयस." लगेच शौलाक परत दिसाक लागला नी हनन्यान तेका बाप्तिस्मो दिल्यान. मगे शौलान अन्न खाल्ल्यान नी तेका ताकद इली.

लगेच शौल दिमिष्कात आसणाऱ्या यहूद्यांका प्रचार करूक लागलो नी म्हणालो, "येशू ह्योच देवाचो झिल आसा." यहूद्यांका ह्या बघून मोठा आश्चर्य वाटला की, ख्रिस्ती लॉकांचो छळ करणारो आता येशूर इश्वास ठेवता नी तेचो प्रचार करता! शौलान तर्कशुध्द संभाषण करून यहूद्यांका येशू ह्यो मसीहा आसल्याचा सिद्ध केल्यान.

मॉप दिवसानी, यहूद्यांनी शौलाक मारुचो कट रचल्यानी. शौलाक मारूक तेंनी तेच्यार नजर ठेवल्यानी नी शहराच्या वेशीजवळ काय लॉकांका नेमल्यानी. पण शौलाक ह्यो कट समाजलो नी तेच्या मित्रांनी तेची सुटका करूक मदत केल्यानी. येका रात्रीक तेंनी वेशीच्या भिंतीरना येका पाटयेत (मोठ्या टोपलेत) बसवन तेका खाली सोडल्यानी. शौल दिमिष्कातना सुटल्यार येशूविषय प्रचार करूक लागलो.

शौल यरूशलेमेत शिष्यांका भेटाक गेलो, पण तेंका तेची भीती वाटली. तेळाक बर्णबा नावाच्या येका इश्वासणाऱ्यान शौलाक प्रेषितांकडे न्हील्यान नी सांगितल्यान, की कशारितीन शौलान दिमिष्कात येशूचो मोठ्या धाडसान प्रचार केल्यान. तेच्यानंतर शिष्यांनी तेचो स्विकार केल्यानी.

यरूशलेमेतल्या छळामुळाक काय इश्वासणारे लांब अंत्युखिया शहरात गेले नी थय तेंनी येशूविषय प्रचार केल्यानी. अंत्युखियातल्या लॉकांतूर जास्त यहुदी लॉक नाय व्हते. पण पयल्यांदाच, तेंच्यापैकी मॉप लॉकव इश्वासणारे झाले. बर्णबा नी शौल थयल्या नइन इश्वासणाऱ्यांका येशूविषय आजून शिक्षण देवक नी मंडळीक उत्तेजन देवक अंत्युखियाक गेले. अंत्युखियातल्या येशूर इश्वास ठेयणाऱ्यांका पयल्यांदाच "ख्रिस्ती" म्हटला गेला.

येक दिवसाक, अंत्युखियाचे ख्रिस्ती उपवास-प्रार्थना करीत आसताना, पवित्र आत्मो तेंच्यार इलो नी म्हणालो, "बर्णबा नी शौल हेंका ज्या कामासाठी मीया बोलावलय, तेच्यासाठी तेंका येगळे करून ठेया." तेळाक अंत्युखियातल्या मंडळीन शौल नी बर्णबासाठी प्रार्थना केल्यानी नी तेंच्यार हात ठेवल्यानी. मगे तेंका येगयेगळ्या जागेर येशूची सुवार्ता सांगुक पाठयल्यानी. बर्णबा नी शौल हेंनी मॉपशा येगयेगळ्या लॉकांच्या गटांका सुवार्ता सांगल्यानी नी मॉप लॉकांनी येशूर इश्वास ठेयल्यानी.