48. येशू ह्यो अभिवचनानुसार दिललो मसीहा हा

देवान जेळाक सृष्टी बनवल्यान तेळाक सगळा काय परिपूर्ण व्हता. थय पाप नाय व्हता. आदाम नी हवा येकमेकार प्रेम करीत नी तेंचा देवार प्रेम व्हता. थय खयच्याच प्रकारचो आजार नाय व्हतो की मृत्यू नाय व्हतो. सृष्टी अशीच ऱ्हवाक व्हयी अशी देवाची इच्छा व्हती.

हवेक फसवक सैतानान सापाकडना संभाषण केल्यान. तेळाक तिना नी आदामान देवाइरुद्ध पाप केल्यान. तेंनी केलल्या पापाचो परिणाम म्हणान पृथ्वीर प्रत्येकजाण आजारी पडता नी मरण पावता.

आदाम नी हवेन पाप केल्यामुळाक आणखीन येक भयानक गोष्ट घडली. ते देवाचे वैरी झाले. म्हणान त्या येळापासना पृथ्वीर जन्म घेणारो प्रत्येक व्यक्ती पापाचो स्वभाव घेवन जन्माक येता नी तो देवाचो दुश्मनव बनता. पापामुळाक देव नी माणूस हेंच्यात आसणारो नातेसंबंध तुटलो. पण ह्यो नातेसंबंध परत जोडूक देवान येक योजना बनयल्यान.

देवान अभिवचन दिल्यान की हवेची येक अवलाद सैतानाचा डोक्या फोडीत नी सैतान तेची टाच फोडीत. अर्थात सैतान मसीहाक ठार मारीत, पण देव तेका परत जिवंत करीत नी मगे मसीहा सैतानाच्या सत्तेचो पूरो नायनाट करीत. मॉप वर्सांनी येशू ह्योच मसीहा आसा ह्या प्रकट व्हयत.

जेळाक देवान सगळी पृथ्वी पाणयाच्या व्होऊरान नष्ट केल्यान, तेळाक तेच्यार इश्वास ठेयणाऱ्यांका देवान येक तारू दिल्यान. त्याचप्रकारान, माणसांच्या पापांमुळाक प्रत्येक जाण मराक पात्र झालो, पण तेच्यार इश्वास ठेयणाऱ्यांका वाचवक (तारूक) देवान येशूक पाठयल्यान.

शेकडो वर्सा, महायाजक माणसांका आपल्या पापांची शिक्षा मरण हा ह्या दाखवक नुसते पशुबली नी होमार्पण करीत. पण त्या अर्पणानी तेंच्या पापांची क्षमा होव शकली नाय. येशू ह्यो येक श्रेष्ठ महायाजक हा. बाकीच्या याजक जा करूक शकले नाय ता येशून केल्यान, सगळ्या लोकांसाठी स्वतःचाच अर्पण केल्यान, ह्यासाठी की जे तेच्यार इश्वास ठेयतीत तेंच्या पापांची क्षमा होवक व्हयी. येशू ह्यो येक परिपूर्ण महायाजक व्हतो, कारण तेना, प्रत्येकान केलल्या पापांची शिक्षा स्वतःर घितल्यान.

देवान अब्राहामाक म्हटल्यान, "सगळ्या राष्ट्रातली कुळा तुझ्याकडनाच आशिर्वादित व्हतीत." येशू ख्रिस्त ह्यो अब्राहामाचो वंशज व्हतो.

जगातली सगळी कुळा तेच्याकडना आशिर्वादित झाली, कारण जो कोण येशूर इश्वास ठेयता तेच्या पापांची क्षमा व्हता नी तो अब्राहामाचो आत्मिक वंशज व्हता. जेळाक देवान अब्राहामाक इसहाकाचा अर्पण करूक सांगितल्यान, तेळाक देवान इसहाकाच्या बदल्यात, अर्पणाक कोकरो पुरवल्यान व्हतो. आम्ही आमच्या पापांमुळाक मरणदंडाक पात्र आसव! पण देवान येशूक देवाचो कोकरो, अर्पण म्हणान आमच्या जागेर मराक पाठयल्यान.

जेळाक देवान मिसर देशात शेवटची पीडा पाठयल्यान, तेळाक तेना प्रत्येक इस्राएलाच्या कुटुंबाक येक निर्दोष कोकऱ्याचो वध करून तेचा रकात तेंच्या घरांच्या चौकटीक लावक सांगितल्यान व्हता. जेळाक देवान ता रकात बघल्यान, तेळाक तेंचा घर वलांडान तो गेलो नी तेंच्या पयल्या जनमलल्या झिलांका तेना मारल्यान नाय. ह्या घटनेक वल्हांडण म्हणतत.

येशू ख्रिस्त ह्योच आमच्या वल्हांडणाचो कोकरो हा. तो परिपूर्ण नी निर्दोष व्हतो नी वल्हांडणाच्या सणाच्या येळेक वधलो गेलो व्हतो. जेळाक कोण येशूर इश्वास ठेयता, तेळाक येशूच्या रक्तान तेच्या पापांची खंडणी भरून देण्यात येता, नी देवाची शिक्षा त्या व्यक्तीक वलांडान जाता.

देवान इस्राएली लोकांबरोबर येक करार केल्यान व्हतो, ते तेचे निवडलेले लॉक व्हते. पण तेना आता सगळ्यांसाठी आसनारो येक नवो करार केल्यान. ह्या नव्या करारामुळाक, कोणत्याव लोकसमुदायातली कोणव येशूवरल्या इश्वासान देवाची पॉरा होव शकतत.

देवाच्या वचनाचो प्रचार करणारो मोशे ह्यो येक महान संदेष्टो व्हतो. पण येशू त्या सगळ्यांहून अधिक महान संदेष्टो हा. तो देव हा, म्हणान तेना जा काय केल्यान नी बोलल्यान ती देवाची कामा नी देवाची वचना व्हतो. म्हणानच येशूक देवाचो शब्द असा म्हणतत.

देवान दाविद राजाक अभिवचन दिल्यान व्हता की तेच्या वंशजातनाच येकजाण देवाच्या लॉकार सर्वकाळ राज्य करीत. येशू ह्यो देवाचो झिल नी मसीहा आसल्यामुळाक देवाच्या लॉकार सर्वकाळ राज्य करणारो तो दाविदाचो येक इशेष वंशज हा.

दाविद ह्यो इस्राएलाचो राजा व्हतो, पण येशू ह्यो सगळ्या इश्वाचो राजा हा! तो परत येणार हा नी आपल्या राज्यात न्यायान नी शांतीन सर्वकाळ राज्य करणार हा.