5. प्रतिज्ञेचो झिल

अब्राम नी साराय कनान देशात पोचल्यार धा वर्सानी, आजूनव तेंची कोणच अवलाद नव्हती. म्हणान, अब्रामाची बायल सारायन तेका म्हटल्यान, "परमेश्वरान आजूनव माका अवलादीक जन्म देवक सक्षम करूक नाय आणि आता मीया अवलादीक जन्म देवक मॉप म्हातारा झालय. बघ, माझी दाशी हागार हय हा. तेच्याबरोबर लगीन कर म्हणजे माझ्यासाठी ता येक अवलाद उत्पन करीत."

शेवटाक अब्रामान हागारेबरोबर लगीन केल्यान. हागारेन यका झिलाक जन्म दिल्यान नी अब्रामान तेचा नाव इश्माएल ठेवल्यान. पण साराय हागारेर जळाक लागला. जेळाक इश्माएल तेरा वर्साचो व्हतो, परमेश्वरान परत अब्रामाबरोबर बोलना केल्यान.

परमेश्वरान म्हटल्यान, "मीया सर्व-शक्तिमान परमेश्वर आसय. मीया तुका याक वचन दितय." तेळाक अब्रामान जमनीर पडान नमन केल्यान. परमेश्वरान अब्रामाक ह्याव सांगल्यानं, "तू मॉपशा जातींचो बापुस व्हतलस. मीया तुका नी तुझ्या पोरांका कायमची जमीन म्हणान कनान देश दितलय नी मीया कायमचो तेंचो परमेश्वर व्हतलय. तुका आपल्या घरच्या सगळ्या बापयांची सुंता करुची आसा.

"तुझी बायल साराय यका झिलाक जन्म देयत - तो प्रतिज्ञेचो झिल आसतलो. तेचा नाव इसहाक ठेव. मीया तेच्याबरोबर माझो करार करीन." तेळाक परमेश्वरान अब्रामाचा नाव बदलून 'अब्राहाम' केल्यान, जेचो अर्थ हा, "मॉप जनांचो बापुस". परमेश्वरान सारेचाव नाव बदलून 'सारा' केल्यान, जेचो अर्थ "मूळ आवस".

ते दिवशी अब्राहामान आपल्या घरण्यातल्या सगळ्या बापयांची सुंता केल्यान. जवळपास येक वर्सान, जेळाक अब्राहाम १०० वर्साचो व्हतो नी सारा ९० वर्साचा व्हता, तेळाक सारान अब्राहमाच्या झिलाक जन्म दिल्यान. जसा परमेश्वरान तेंका सांगलल्यान तसाच तेनी तेचा नाव 'इसहाक' ठेवल्यानी.

जेळाक इसहाक तरणो झालो तेळाक अब्राहमाची परीक्षा घेवसाठी परमेश्वर तेका ह्या बोललो, "आपल्या यकुलत्या झिलाक घी नी तेका माझ्यासाठी बलि म्हणान मारून टाक." परत अब्राहामान परमेश्वराचा म्हणना आयकल्यान नी आपल्या झिलाक बलि करूक तयार केल्यान.

जेळाक अब्राहाम नी इसहाक बलि चढवच्या जागेच्या दिशेन जावक लागले तेळाक इसहाकान इचारल्यान, "हे पित्या, आमच्याकडे बलिक लाकडा तर आसत, पण बलि करुचो मेमनो खय हा?" अब्राहमान उत्तर दिल्यान, "अरे माझ्या झिला, परमेश्वर बलि करुच्या मेमन्याची सोय करीत."

जेळाक ते बलि चढुच्या जागेर पोचले, तेळाक अब्राहामान इसहाकाक बांधान वेदीर झोपयल्यान. तो आपल्या झिलाक मारणारच व्हतो, तितक्यात परमेश्वर बोललो, "थांब! पोराक काय दुखव नको. आता मी समजान गेलय की तू माझा भय मानतस, कारण तू आपल्या यकुलत्या झिलाकव माझ्यासाठी राखान ठेवक नाय."

बाजूकच अब्राहामान येका मेंढ्याक बघल्यान जो झालयेत अडकलो व्हतो. इसहाकाच्या बदल्यात बलि चढवक परमेश्वरान मेंढ्याची सोय केलल्यान. अब्राहामान आनंदान मेंढ्याचो बलि चढयल्यान.

तेळाक परमेश्वरान अब्राहामाक सांगल्यान, "तू सगळा काय माका देवक तयार व्हतस, आपल्या यकुलत्या झिलाकव, म्हणान मीया तुका आशीर्वाद देवची प्रतिज्ञा करतय. तुझी अवलाद आकाशातल्या ताऱ्यांपेक्षाव लय व्हतली. कारण तू माझ्या आज्ञेक पाळलस, म्हणान मीया तुझ्या बिराडापासना जगातल्या सगळ्या कुळांका आशीर्वाद देयन."