10. पदि (10) तिप्पल्क
यह कहानी सुनें ऑडियो फ़ाइल · 3.9 MB
इस रिकॉर्डिंग के शब्द नीचे Aheri Gondi में दिए गए हैं।
पिरोन राजाल हेक्कड आंतोर इंचि पेन मूसाल आनि हारूनुंकु वेहचि मत्ता. पजा ओर पिरोनुनगा होंचि, “नावा लोकुल्कुन होनाहीम इंचि, इस्राएलतोरा पेन वेहंता,” इंचि इत्तुर. गानि पिरोन ओरा पोल्ले केंजा हिल्लोर. उलटा इस्राएल लोकुल्कुन होना हियाकोंटा इरसि ओर्कु इंका एक्को कस्टम कियालय वेहतोर.
इस्राएल लोकुल्कुन बस्के होळसा इनिनागानि पिरोन ओर्कुन होळसोन इनुंदुर. अदुनहाटीं पेन इजिप्त देसेमतोरपोर्रो पदि कतरनाक तिप्पल्क लोहता. आ तिप्पल्क लोहचि पेन पिरोनुंक हुपिस्ता गदा, इस्राएलतोरा पेन इजिप्ततोरा पेनकुंकन्ना एक्को ताकतवार मंता इंचि.
नील बेरेटुन पेन नेत्तुरते मारियागोटता. अयनागानि पिरोन इस्राएल लोकुल्कुन होना हियाहिल्लोर.
पूरा इजिप्त देसेमते पेन पन्नेन लोहता. आ पन्नेन ओरागटाल लक्कु कियानाहाटीं पिरोन मूसांक विनंति कीतोर. गानि अन्नि पन्नें हासोत्तस्के पिरोन मर्रा ओना मनसुन हेक्कड कीकुत्तोर. आनि इस्राएलतोर्कुन ओरा देसेम पेय्सि होना हियाहिल्लोर.
अदुनहाटीं पेन कुटकिना तिप्पलतुन लोहता. दाना पज्जो नुल्लेना तिप्पलतुन लोहता. अस्के पिरोन मूसान आनि हारूनुन केयसि, ‘ई तिप्पल्कुन आपानय्ते इस्राएलतोर इजिप्त देसेमतुन होळसि होना परांतुर,’ इंचि ओर्कुन इत्तोर. मूसाल पारतना कीतस्के पेन नुल्लेना तिप्पलतुन होनागोटता. गानि पिरोन मात्रम ओना मनसुन मर्रा हेक्कड कीसि, इस्राएलतोर्कुन अगटाल पेय्सि होना हियाहिल्लोर.
पजा, पेन इजिप्त देसेमतोरा अन्नि जिवरासिन रोगम वायागोटसि हासि होनागोटता. गानि पिरोन मात्रम ओना मनसुन हेक्कड कीसि, ओर इस्राएलतोर्कुन पेय्सि होना हियाहिल्लोर.
पजा पिरोनुना मुन्ने वळिते बूळ्दि विसरालय पेन मूसांक वेहता. मूसाल पेन वेहताप कीतस्के, इजिप्त देसेमता अंटोर लोकुल्कुना मेंदुलपोर्रो वेल्लेन बादा आयानसोंटा पुनकु आतां, गानि इस्राएलतोर्कुंक मात्रम बतले आयाहिल्ले. पेन पिरोनुना मनसुन हेक्कड कीसि इरता, आनि पिरोन बारे इस्राएलतोर्कुन पेय्सि होना हियाहिल्लोर.
पजा पेन इरगा बंडां अराहचि इजिप्त देसेमतोरा वेल्लेन पंटातुन नासडेम कीता आनि बोर अय्ते अव्टेटाल पलाते अरतुर ओर्कुन हव्किसि पोहता. अस्के पिरोन मूसान आनि हारूनुन केय्सि इल्हा इत्तोर, “नना पापम कीतन, मिमेट होना पर्रांतिर,” इंचि इत्तोर. पजा मूसाल पारतना कीतस्के, मब्बुनाल बंडां अरमळ आगिसोत्ता.
गानि पिरोन मर्रा पापम कीसि, ओना मनसुन हेक्कड कीकुत्तोर. ओर इस्राएल लोकुल्कुन पेय्सि होना हियाहिल्लोर.
पजा पेन इजिप्त देसेमते गोल्लाबामाना मंदान लोहता. अव वासि बंडां अरतस्के नासडेम आयवा पंटातुन तिंचि नासडेम कीतां.
पजा पेन मूड रोजकुनदाका हिर्रू हीकट कीसि इरता. आ हीकट इच्चोन कतरनाक मत्ता गदा, मूड रोजकुनदाका इजिप्त लोकुल्कु ओरा लोह्कुनाल पलाते पेय्सा पर्राहिल्लुर. गानि इस्राएल लोकुल्कु मत्तागा मात्रम वेल्गु मत्ता.
ई तोम्मिदि (9) तिप्पल्क वासि होनिनागानि पिरोन मात्रम इस्राएलतोर्कुन पेय्सि होना हियाहिल्लोर. बारित्ते पिरोन बच्चोन वेहिनागानि केंजाहिल्लोर. अदुनहाटीं पेन इंकुंदि आकिर तिप्पलतुन लोहना पिलान कीता. आ पिलान पिरोनुना मनसुन मारियागोटंता.
निर्गमन अध्याय 5-10 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।