11. दाटसि होनना पंडुगु
यह कहानी सुनें ऑडियो फ़ाइल · 2.5 MB
इस रिकॉर्डिंग के शब्द नीचे Aheri Gondi में दिए गए हैं।
इस्राएल लोकुल्कुन होनाहीम इंचि वेहालय पेन मूसान आनि हारूनुन पिरोनुनगा लोहता. ओर होंचि, ‘निमे इस्राएल लोकुल्कुन होना हियाकोंटे इजिप्त देसेमता लोकुल्कुना आनि ओरा जिवरासिना तोल्सूर पुटतदुन पेन हव्कंता,’ इंचि ओनकु वेर्रे वेहतुर. अल्हा वेहिनागानि ओर पेनदापोर्रो विस्वासम इर्रा हिल्लोर, ओरा पोल्ले केंजा हिल्लोर.
पेन दानापोर्रो विस्वासम इर्रानोर ओर बोरे आयिर ओरा तोल्सूर पुटतोन कापाळनाहाटीं उंदि उपायम कीता. दानहाटीं हरेक परिवारतोर दोसेम हिलुवा उंदि गोर्रेतुन बलि हियाना मत्ता.
आ बलि हीता गोर्रेता नेत्तुरतुन ओरा लोह्कुना दारसाकांकु होकाना इंचि पेन इस्राएल लोकुल्कुंक वेहता. इंका आ गोर्रेता हव्वितुन बोळसि पुल्लगा आयवा पिंडिता हारिनतोनि तिनना मत्ता. पजा ओरा तिनुड आतस्के इजिप्त होळसि होननाहाटींगुडा तयार मनालय वेहता.
पेन बल्हा अय्ते कियालय आदेस हीतानो अल्हेन इस्राएल लोकुल्कुगुडा बोत्तिगा तयारिं कीतुर. नडजाम नर्का आतस्के, पेन हरेक तोलसूर मर्रिन हव्कसेके इजिप्तता नड्डुमताल पेय्सि होत्ता.
इस्राएल लोकुल्कुना हरेक लोता गलमाकु नेत्तुर होकिसि मत्ता, अदुनहाटीं पेन ओरा लोह्कुन होळसीता. ओरा लोह्कुना लोप्पो मत्तोर्कु बोर्के बतले आयाहिल्ले. गोर्रे नेत्तुर होकताहेंदाल ओर पिस्तुर.
गानि इजिप्त लोकुल्क मात्रम पेनदापोर्रो विस्वासम कियाहिल्लुर, दाना आदेसकुन परकारम ताका हिल्लुर. अदुनहाटीं पेन ओरा लोह्कुन होळसा हिल्ले, ओरा हरेक लोता तोल्सूर मर्रिन पेन हव्कुता.
जेलने मत्ता कैदिल्कुना तोल्सूर मर्कुनगटाल अय्ते, पिरोनुना तोल्सूर मर्रिनदाका, हरेक तोल्सूर मर्रि हासोत्तोर. वेल्ले बादा अन्पिच्चि इजिप्त लोकुल्कु इरगा अळसेके, मोत्कुंचेके मत्तुर.
अदे नर्का, मूसान आनि हारूनुन पिरोन केयतोर. केय्सि, “इस्राएल लोकुल्कुन पीसि इजिप्तताल बिराना पेय्सि होंटु,” इंचि इत्तोर. इजिप्त लोकुल्कुगुडा इस्राएल लोकुल्कुन बिराना पेय्सि होनालय विनंति कीतुर.
निर्गमन अध्याय 11:1-12:32 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।