9. पेन मूसान केयंता
यह कहानी सुनें ऑडियो फ़ाइल · 5.6 MB
इस रिकॉर्डिंग के शब्द नीचे Aheri Gondi में दिए गए हैं।
युसुप हासोत्तस्के ओना अंटोर जीवातोर, इजिप्त देसेमतेन जेगा पीतुर. ओर आनि ओरा वंसमतोर बच्चुंगो वर्सनदाका इजिप्त देसेमतेन मत्तुर. ओर वेल्लेन पिलाल्कुन कंतुर, ओर्कु इस्राएलतोर इंचि पोरोल अरता.
दग्गेर-दग्गेरा नूर वर्सां आतस्के, इस्राएलतोर वेल्लेन आतुर. आनि युसुप माकु सहायम कियानाहाटीं वेल्लेन बेस कबाह्क कीतोर इंचि इजिप्त लोकुल्कु कूस मनाहिल्लुर. इस्राएल लोकुल्कु ओरकन्ना वेल्लेन आतुर इंचि ओर वेरियकुत्तुर. अदुनहाटीं अद कालमते इजिप्त देसेमते राज्येम कीसेके मत्ता पिरोन राजाल इस्राएल लोकुल्कुन इजिप्ततोरा दासुल्क कीतोर.
इजिप्त लोकुल्कु, इस्राएल लोकुल्कुनाहेंदाल वेल्लेन बंगला आनि पेद्दे-पेद्दे सहरकु दोहा वेहतुर. आ कस्टाल्कुनाहेंदाल इस्राएल लोकुल्कुना पिस्वर वेल्लेन दुक्कमते अरता. गानि पेन ओर्कु आसिर्वाद हीता, अदुनहेंदाल ओर्कु इंका वेल्लेन पिलाल्क आतुर.
इस्राएल लोकुल्कुंक वेल्लेन पिलाल्क आयानदुन पिरोन राजाल हूळतोर, अदुनहाटीं इस्राएल लोकुल्कुना मांडसा पिलाल्कुन नील बेरेटे पोहचि हव्कट इंचि ओर ओना इजिप्त लोकुल्कुंक आदेस हीतोर.
उंदि इस्राएल मुरतळ, वरोर पेडन कंता. आ पेडन ओना तल्लुर-बाबो बच्चोनो मक्किचि इरतुर.
आ पेडन इंका मुन्ने मक्किच्चि इर्रुड कुदुरो इंचि तल्लुर-बाबोंक अनपिस्तस्के, आ पेडन बल्हानना कापाळगोम इत्ता उद्देसमते, ओर आ पेडन तेलाना उंदि तट्टाते वाटसि, नील बेरेटे पोदाना नड्डुम इरतुर. आ पेडन बोरन्ना बतलन्ना कींतुरा बतला इंचि ओना पेद्दा अक्कल लक्कुटाल हूळसेके मत्ता.
पिरोन राजाना मिय्यळ आ तट्टातुन हूळसि अव्टे बतल मंता इंचि माळकिसि हूळता. अव्टे दानकु पेडल दिसतोर अय्ते अद आ पेडन दाना मर्रि इंचि येतकुत्ता. आ पेडांक पालु उहानाहाटीं अद उंदि इस्राएल मुरतटुन इरता. अल्हा इर्राका मुन्ने, आ इरता मुरतळ आ पेडाना निजम तल्लुरा-आयोना इंचिगुडा परमेरका कीसि हूळा हिल्ले. आ पेडल पेद्दोड आतोर, ओनकु इंका तल्लुना पालुना अवसरम हिल्ले. अस्के अद ओन पिरोन राजाना मिय्यळकु वापस हीता. ओना पोरोल मूसाल.
मूसाल पेद्दागा आतस्के, उंदि रोजु वरोर इजिप्त मनकल इंकावरोर इस्राएल मनकन तनानदुन हूळतोर. हूळसि ओर ओना दंटाता इस्राएल मनकन कापाळना कोसिस कीतोर.
ओन बोरे हूळसेक हिल्लुर इंचि मूसांक अन्पिस्तस्के, ओर आ इजिप्त मनकन हव्किसि ओना सेत्तातुन बोंदा दोसतोर. गानि मूसाल कीतदुन बोरो हूळतोर.
मूसाल हव्कतदुना बारेमते पिरोनुंक तेळियता, अस्के ओर मूसन हव्कालय हूळतोर, गानि मूसाल इजिप्त देसेमता केडाते पेय्सि वितुतोर. पिरोनुना सिपाइल्क ओन पह्का पर्राहिल्लुर.
इजिप्तताल वेल्लेन लक्कुने मूसाल वरोर मेहानोनलेसीं पिस्सेके मत्तोर. अगा ओर उंदि मुरतटुन मरमि आतोर. अद इव्वुर मर्कुन कंता.
मूसाल ओना मामाना गोर्रे मेहचेके मनुंदुर. उंदि रोजु, उंदि पोदा तळमि अंटसि पोतसंता गानि अद वेसि बूळ्दि आसेके हिल्ले, असोंटा पोदातुन मूसाल हूळतोर. अदुन दग्गेटाल हूळानाहाटीं मूसाल आ पोदाता दग्गेर्क होतोर. ओर पोदाक दग्गेरा होत्तस्के पेन ओन इल्हा इत्ता, “ए मूसा, नीवा काल्कुना हेरपुह्क तेंडा, निमे उंदि पवित्र जेगाते मंतिन,” इत्ता.
पेन मर्रा इल्हा इत्ता, “नना नावा लोकुल्कुना दुक्कमतुन हूळतन. अदुनहाटीं, इस्राएल लोकुल्कुन गुलामगिरिताल पलाते पीसि वायानाहाटीं नना नीकुन पिरोनुनगा लोहंतन. अब्राहाम, इसहाक आनि याकोबुंक बद देसेम हींतन इंचि अय्ते नना पोल्ले हीतनो आ कनान देसेम ओर्कु नना हींतन.” इत्ता.
अस्के, “नाकुन बोर लोहतोर इंचि लोकुल्कु जानकारि पूसकियानय्ते नना बतल वेहकन?” इंचि मूसाल इत्तोर, अस्के पेन, “नना बोन आंदुनो, ओने आंदुन, ‘ननाने आंदुन इनानोर’ नाकुन मिहगा लोहतोर,’ इंचि ओर्कु वेहा, ओर्कु इल्हागुडा वेहा गदा, ‘नना मीवा एनकटा अब्राहाम, इसहाक, याकोबना पेनदुन आंदुन,’ नावा पोरोल हमेसाताहाटीं मंता.”
मूसाकुं पिरोनुनगा होनमळ पसंद मनाहिल्ले. ओर वेरियुंदुर. बारित्ते, ओनकु बेस वळकुमळ वायो इंचि मूसांकु अनपिच्चुंदु. अदुनहाटीं पेन ओना दंटाकु, ओना तम्मुर हारूनुन ओनकु सहायम कियालय लोहता.
निर्गमन अध्याय 1-4 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।