25. देय्यम येसुना पट्टु हूळंता
यह कहानी सुनें ऑडियो फ़ाइल · 2.5 MB
इस रिकॉर्डिंग के शब्द नीचे Aheri Gondi में दिए गए हैं।
येसुना बापतिस्मा आता आयुडे, पवित्र आत्मा ओन केडाते ओता. येसु अगा नल्पै रोजकु आनि नल्पै नर्कां मत्तोर. अगा मत्ताचुं रोजकु येसु उपासम मत्तोर, देय्यम ओन पापमते अराहनाहाटीं ओना दग्गेर्क वासि ओना पट्टु हूळता.
मोदाला देय्यम, “निमे ओक्कला पेनदा मर्रिन आते, निमे तिननाहाटीं ई बंडान हारिने मार्सा,” इंचि येसुन इत्ता.
गानि येसु, “मनकल पिस्सि मननाहाटीं ओन्कु सिराप हारिना अवसरमे हिल्ले, पेन ओन्कु वेहना हरेक पोल्लेता अवसरम ओन्कु मनंता, इंचि पेनदा पुस्तकमते रासि मंता,” इंचि देय्यमतुन इत्तोर.
अस्के देय्यम, येसुन गुळिता कोस्सा कोड्डिपोर्रो एत्तु जेगाते ओता. अगा ओसि, “निमे पेनदा मर्रिन आते, इग्गेटाल हिळु दुनका, बारित्ते, नीवा काल्कुंक नोप्पि आयाकोंटा नीकुन पोर्रेन पीकुनालय पेन दाना दूतान लोहंता इंचि पेनदा पुस्तकमते रासि मंता,” इंचि येसुन इत्ता.
गानि येसु मात्रम देय्यम वेहता बदे कबळ किया हिल्लोर. अल्हा कियाकोंटा ओर देय्यमतुन, “पेन अंटोरतोनि वेहंता, निमे नीवा सामि आता पेनदा पट्टु हूळमा,” इंचि इत्तोर.
पजा देय्यम दुनियाता अन्नि देसेल्कुन येसुंकु हुपिस्ता. अव देसेल्क बचोन बेस आनि ताकतवार मंतां इत्ताप देय्यम ओन्कु हुपिस्ता. अद येसुन, “निमे टोंगरां ऊनसि नाकुन मोळ्कानाय्ते नना इवन्नि नीकु हींतन,” इत्ता.
अस्के येसु, “ए देय्यमतुना, निमे नहागटाल लक्कु होन! पेनदा पोल्ले अंटोर्कुंक वेहंता गदा, ‘सिराप निमे नीवा सामि आता पेनदुने मोळ्काना, सिराप पेनदुने कदर कियाना,’” इंचि देय्यमकु जवाब हीतोर.
देय्यम बच्चूं तीरकुने येसुना पट्टु हूळिनागानि येसु वेरियाहिल्लोर, अदुनहाटीं देय्यम ओनागटाल पेय्सोत्ता. अस्के पेनदा दूतां वासि येसुना सेवा कियालय दल्गतां.
मत्ती अध्याय 4:1-11; मरकुस 1:12-13; लूका 4:1-13 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।