26. येसु सेवा कबळ सुरुव कींतोर
यह कहानी सुनें ऑडियो फ़ाइल · 4.2 MB
इस रिकॉर्डिंग के शब्द नीचे Aheri Gondi में दिए गए हैं।
देय्यमताहेंदाल पट्टु हूळमळ आतस्के, येसु मर्रा मल्सि गालिल एरियाते वातोर. येसु इदे एरियाते मनुंदुर. पवित्र आत्मा ओन्कु इरगेन ताकत हिय्युंदु, ओर उंदि जेगाताल इंकुंदि जेगाक होंचि लोकुल्कुंक पेनदा पोल्लें कराहुंदुर. ओना बारेमते अंटोर बेस वळ्कुंदुर.
येसु नासरेत सहरते वातोर. येसु सिन्नगा मत्तास्के इदे नाटे मनुंदुर. नोमकेम रोजुननाडु ओर आरादना कियाना जेगाते होत्तोर. अगाटा पेद्दाल्क ओन्कु यसायाह इनना वरोर पेनदा कबुरतोर रासता उंदि पुस्तकम हीतुर. येसु अव्टेटाल हद्वाना इंचि ओर आ पुस्तकम ओन्कु हीतुर. अय्ते येसु अद पुस्तकमताल उंदि बागम तेंडसि लोकुल्कुनाहाटीं हद्वुतोर.
अद इल्हा मत्ता, “नना गरिबोरा नड्डुम होंचि बेसता कबुर वेहाना इंचि पेन नाकु दाना आत्मातुन हीता. बोर अय्ते जेलने मंतुर, ओर्कुन इळबळचाहाटीं, गुड्डोर्कुंक कळ्कु दिस्सागोटनाहाटीं आनि वेरेतोरा कय हिळु दबावते मनानोर्कुन मुक्ति हियानाहाटीं अद नाकु लोहचीता. पेन मनापोर्रो कुरपा कीसि सहायम कियाना इद वेला आंदु.”
पजा येसु हिळु उदतोर. अंटोर लोकुल्कु ओन बेस हूळसेके मत्तुर. दर्मसास्त्रमताल इंदके हद्वुता बागम किरिस्तुना बारेमते मंता इंचि ओर्क एर्के मत्ता. अस्के येसु, “नना मीवाहाटीं इंदके हद्वुता पोल्लें इद वेलाते जर्गसेक मंतां,” इत्तोर. अस्के अंटोर लोकुल्कु इचंत्रंम आसि, “ईर अय्ते योसेपुना मर्रिए गदा?” इत्तुर.
अस्के येसु मर्रा इल्हा इत्तोर, “बोर कबुरतोर अय्ते ओना सतता नाटे सिन्नास्केटाल बेर्सि पेद्दागा आतोर, असोंटा कबुरतोन लोकुल्कु ओप्कुन्नुर. एलियाह इनना वरोर पेनदा कबुरतोना कालमते इस्राएल देसेमते वेल्लेन मुंडामोस्ता मुरताह्क मत्तां. गानि मूडुनर्रा वर्सनदाका पिर्रू वायवस्के पेन एलियाहन, बदन्ना मुंडामोस्ता मुरतळ्कु सहायम कियालय इस्राएल देसेमते लोहाहिल्ले. दाना बदुलते एलियाहन बदो वेरे देसेमते उंदि मुंडामोस्ता मुरतटागा लोहता.”
येसु वळ्कसेकेन मत्तोर, “एलिसा इनना वरोर पेनदा कबुरतोना कालमते वेल्लेन लोकुल्कुंक तोल रोगम वासि मत्ता. गानि एलिसल मात्रम ओराव्टेटाल वरोनगुडा बेस कियाहिल्लोर. ओर सिराप इस्राएलतोरा पगातोरा सेनापति नामान इनानोने बेस कीतोर.” येसुना पोल्लें केंजानोर अंटोरगुडा यहुदि लोकुल्कु मत्तुर, अदुनहाटीं येसुना इसोंटा पोल्लें केंजसि ओर ओनपोर्रो इरगा होंगुंक वातुर.
नासरेत सहरता लोकुल्कु येसुन दोर्का पीसि आरादना कियाना जेगाताल इग्गिसि पलाते ओतुर. ओन पोर्रोटाल हिळु दोब्बिसि हव्कानाहाटीं ओन उंदि पेद्दा पर्पु बंडापोर्रो ओतुर. गानि येसु आ लोकुल्कुनाल तप्पिच्कुंचि नासरेत नाटुन होळसि होत्तोर.
पजा येसु पूरा गालिल एरियाते होत्तोर, वेल्लेन लोकुल्कु ओनगा वातुर. ओनगा पीसि वाता लोकुल्कुनाल वेल्ले मंदि बिमार मत्तुर, अपंग मत्तुर. ओराव्टेटाल वेल्लेन मंदि गुड्डोर्क, कुंटोर्क, सेव्टोर्क, मूकालोर मत्तुर. येसु ओर अंटोर्कुन बेस कीतोर.
अचोने आयाका ओरव्टे वेल्लेन मंदि देय्यम पीतोरगुडा मत्तुर. येसु ओराव्टेटाल आ देय्याल्कुन पेय्सि होनना आदेस हीतोर. आ देय्याल्क पेय्सि होननेंके, “निमे पेनदा मर्रिन आंदिन,” इंचि मोत्कुंचेके होनुंदु. लोकुल्कुंक इचंत्रम आसि ओर पेनदा स्तुति कियुंदुर.
पजा येसु पन्नेंड मंदि मांडसातुन पेर्सि ओर्कुन प्रेरित इंचि पोरोल दोसतोर. आ प्रेरितुल्कु येसुनतोनि होंचेके, मंचेके ओनाहेंदाल करियतुर.
मत्ती अध्याय 4:12-25; मरकुस 1:14-15, 35-39; 3:13-21; लूका 4:14-30, 38-44 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।