27. बेसता सामरि मनकना वेसुडि
यह कहानी सुनें ऑडियो फ़ाइल · 3.6 MB
इस रिकॉर्डिंग के शब्द नीचे Aheri Gondi में दिए गए हैं।
उंदि रोजु, यहुदिल्कुना रिवाजकु बेस तेळियसि मत्तोर वरोर मनकल येसुनगा वातोर. येसु तप्पुड पोल्लें कराहचंतोर इंचि लोकुल्कुंक वेहना उद्देसमते ओर वातोर. अदुनहाटीं ओर, “गुरु, बस्केळ्क पिस्सना पिस्वर दोर्किच्कुननाहाटीं नना बतल कीकन?” इंचि येसुन पूसकीतोर. अस्के येसु, “पेनदा नियमाल्कुने बतल रासि मंता?” इत्तोर.
आ मनकल इल्हा वेहतोर, “अद इल्हा वेहंता, निमे नीवा पेनदुन नीवा पूरा मनसुनाल, पूरा ताकतते आनि पूरा बुद्दिते पावरम कीम. आनि नीवा पक्कातोन नीवाच्चोन पावरम कीम.” अस्के येसु, “निमे बरोबर वेहतिन, निमे इल्हा कियानय्ते नीकु बस्केळ्क पिस्सना पिस्वर दोर्कंता,” इत्तोर.
आ मनकल ओर पिस्सना पिस्वरे बरोबर मंता इंचि लोकुल्कुंक हुप्साना विचारमते मत्तोर. अदुनहाटीं ओर, “सरे! अय्ते नावा पक्कातोर बोर मरि?” इंचि पूसकीतोर.
अस्के येसु आ मनकंक उंदि वेसुडि वेहासेके इल्हा जवाब हीतोर, “वरोर यहुदि मनकल हर्रि पीसि येरुसलेमताल यरिहो ताकसि पय्नेम होंचेके मत्तोर.”
“गानि नड्डुम हर्दे बोरो दोंगाल्क ओन दोर्कापीसि इरगा तंतुर, ओनगा मत्तव अन्नि सामानतुन दोसकुत्तुर आनि ओर डुक्कुने मननेंके अग्गेन होळसि होत्तुर.”
“जेरासेप आतस्के अदे हर्रि पीसि वरोर यहुदि पेर्मल होत्तोर. आ पेर्मल अगा मनकल हिळु अरसि मत्तद हूळसि वेरे हर्रि पीसि मुन्नेळ्क पेय्सि होत्तोर. आ पेर्मल आ हिळु अरसि मत्ता मनकन हूळसिगुडा हूळवाप होत्तोर.”
“पजा जेरासेप आतस्के, वरोर लेवी मनकल अदे हर्रि पीसि वातोर. (लेवी इदु यहुदिल्कुना उंदि गोत्रम आंदु, गुळिते ईर पेर्मालोर्कुंक सहायम कींतुर.) आ लेवीगुडा वेरे हर्रि पीसि पेय्सि होत्तोर. ओरगुडा हिळ अरसि मत्ता मनकन हूळसिगुडा हूळवाप होत्तोर.”
“ओना पज्जो अद हर्रि पीसि वरोर सामरिया एरियाता मनकल वातोर. (यहुदि लोकुल्कु सामरि लोकुल्कुन हय्साकोंदुर) आ सामरि मनकल हर्दे हिळु अरसि मनना मनकन हूळतोर. हुळसि हिळु अरसि मनना मनकल यहुदि आंदुर इंचि ओर एरपाट कीतोर, अयना आ सामरि मनकंक ओनापोर्रो दया वाता. पजा ओर आ हिळ अरसि मत्ता मनकानगा वासि ओना पुनकुन साप कीसि पट्टि दोहतोर.”
“पजा आ सामरि मनकल, आ हिळ अरसि मत्ता मनकन ओना गाळदि पोर्रो वाट्सि अदे हर्रि पीसि उंदि लाजुने ओतोर. अगागुडा ओन ओर बेस हूळकुत्तोर.”
इंकुंदि रोजु आ सामरि मनकंक पय्नेम होनना मत्ता. अस्के आ सामरि मनकल आ लाजुना मेनेंजरुंकु इच्चुं कोत्तां हीसि इल्हा वेहतोर, “ई मनकन बेस हूळकुन. नना हीता ई कोत्तां हालाका नीवा कोत्तांगिंटा कर्च आयानय्ते नना मल्सि वातस्के नीकु वापस हींतन,” इंचि वेहतोर.
पजा नियमाल्कु बेस तेळियता आ मनकन येसु, “अय्ते निमे बतल इंतिन वेहा, आ मुव्वुर लोप्पोटाल, आ हिळ अरसि डुक्कुने मत्ता मनकना पक्कातोर बोर आंदुर?” इंचि पूसकीतोर. अस्के आ मनकल, “बोर अय्ते ओनपोर्रो कुरपा कीतोर ओर आंद,” इत्तोर. अस्के, “अय्ते निमेगुडा होंचि अल्हे कीम,” इंचि येसु इत्तोर.
लूका अध्याय 10:25-37 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।