28. सिरमंत लेय्या अदिकारि
यह कहानी सुनें ऑडियो फ़ाइल · 3.4 MB
इस रिकॉर्डिंग के शब्द नीचे Aheri Gondi में दिए गए हैं।
उंदि रोजु, वरोर सिरमंत लेय्या अदिकारि येसुनगा वासि, “गुरु, निमे अंटोर्कन्ना बेसतोन आंदिन. नाकु बस्केळ्क पिस्सना पिस्वर गावाले इत्ते नना बतल कीते बेस?” इंचि पूसकीतोर. येसु ओन्कु इल्हा वेहतोर, “निमे नाकुन अंटोर्कन्ना बेसतोर इंचि बारि इंतिन? सिराप पेन उंदे अंटोर्कन्ना बेसतद आंद. गानि नीकु ओक्कला बस्केळ्क पिस्सना पिस्वर गावाले मत्ते, निमे पेनदा नियमाल्कुने वेहताप ताका,” इंचि वेहतोर.
“नना बव-बव आदेसकुना परकारम ताकते बेस मनंता?” इंचि ओर पूसकीतोर. अस्के येसु, “बोने हव्कुमा, व्यबिचारम कियमा, दोंगातनम कियमा, आबद्दम वळ्कुमा, नीवा तल्लुर-बाबोना कदर कीम आनि नीवद निमे पावरम कीताप नीवा पक्कातोनगुडा अच्चोने पावरम कीम,” इंचि वेहतोर.
गानि आ लेय्योड, “नना अय्ते नावा सिन्नास्केटाले इव अन्नि आदेसकुन पीसि ताकसेके वातन. अय्ते नाकु बस्केळ्क पिस्सना पिस्वर गावाले इत्ते इंका वेरे बतल किया पिय्यार?” इंचि पूसकीतोर. येसु ओन बेस हूळसि ओन पावरम कीतोर.
येसु ओन्कु इल्हा जवाब हीतोर, “नीकु ओक्कला पुरागा आयाना मनसु मत्ते, निमे होंचि नीवा दनम-संपत्तितुनंता अम्मिसि वाता कोत्तन गरिबोर्कुंक पंचि हीम, अस्के नीकु स्वर्गमते दनम दोर्कंता. पजा वासि नावा पज्जो ताका,” इत्तोर.
येसु इल्हा वेहतदुन केंजसि आ लेय्योड इरगा नाराज आतोर, बारित्ते ओर वेल्लेन सिरमंत मत्तोर, ओना दनम-संपत्तितुन बोर्के हियमळ ओन्कु इस्टम हिलाका मत्ता. अदुनहाटीं ओर येसुनगटाल तिरियसि मल्सि होत्तोर.
अस्के येसु ओना सिस्युल्कुन इल्हा इत्तोर, “सिरमंत लोकुल्कु पेनदा राज्येमते होळियमळ इत्ते वेल्लेन कस्टम मंता. हाँ, वरोर सिरमंत मनकल पेनदा राज्येमते होळियमळ कन्ना सूदी बोंगाताल उंदि लोटापेटा होळियमळे अल्कगा मनंता,” इत्तोर.
येसु वेहतदुन केंजसि सिस्युल्कुंक इचंत्रम आता, अदुनहाटीं ओर, “अय्ते, पेन बोर्कुन पिसागोट्टार मरि?” इंचि इत्तुर.
येसु सिस्युल्कुनहेके हूळसि, “मनकल ओनद ओरे मुक्ति दोर्किच्कुनमळ बस्केन आयापर्रो. गानि पेन मात्रम अन्नि किया पर्रंता,” इंचि इत्तोर.
अस्के पत्रु, “नीवा सिस्युल्क आता मोमोट, मावा अन्निट्तुन होळसि नी पज्जो वातोम, अय्ते माकु बतल दोर्कार मरि?” इंचि इत्तोर.
येसु इल्हा जवाब हीतोर, “नाहाटीं बोर अय्ते ओना लोन, दादाल-तम्मुह्कुन, अक्कल-सेल्लेन, तल्लुर-बाबोन, पिलाल्कुन इंका दनम-संपत्तितुन होळ्सतोर, ओन्कु ओर होळ्सीता दानकन्ना नूर अंताल्क एक्को दोर्कार आनि ओन्कु बस्केळ्क पिस्सना पिस्वरगुडा दोर्कार. गानि बोर अय्ते इंदके मुन्ने मंतोर, ओर अस्केळ्क पज्जो अर्रानुर आनि बोर इंदके पज्जो मंतोर ओर अस्केळ्क मुन्ने अर्रानुर,” इत्तोर.
मत्ती अध्याय 19:16-30; मरकुस 10:17-31; लूका 18:18-30 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।