29. दया हिलुवा जितागाना वेसुडि

उंदि रोजु पत्रु, “सामि, नावा तम्मुर नावा विरोदमते पापम कियानाय्ते, नना ओन बच्‍चुं मल्‍कां मापि कीकन? एडुं मल्‍कांगा?” इंचि येसुन पूसकीतोर. अस्‍के येसु, “एडुं मल्‍कांगे आयो गानि एडुना डेब्‍बै मल्‍कां मापि कीम,” इंचि इत्‍तोर. दीनहेंदाल येसु बतल वेहांतोर इत्‍ते, मनम बस्‍केळ्‍क मापि कियागोम. अस्‍के येसु इद उंदि वेसुडि वेहतोर.

येसु इल्‍हा वेहतोर, “पेनदा राज्येम वरोर राजानालेसीं मंता, बोर अय्ते ओना जीतागानाहेंदाल लेक्‍का वसूल कियाना विचारम कींतोर. ओना वरोर जीतागाड 2,00,000 वर्साना कूलिता बाकि तेंडकुंचि वेल्‍लेन बाकिते अरतोर.”

गानि आ जीतागाड बाकि दोहा पर्राहिल्‍लोर, अदुनहाटीं राजाल ओन, “इना बाकि नेम्‍हानाहाटीं ईन आनि ईना परिवारतोर्कुन दासुल्‍क आयानाहाटीं अम्माटु,” इत्‍तोर”

“आ जीतागाड राजाना मुन्‍ने ओना काल्‍कुनपोर्रो अरसि, “कुरपा कीसि कोन्‍नि रोजकु आगा, नीवा बाकितुन नना पुरागा नेम्‍हांतन,” इंचि इत्‍तोर. राजांक ओनपोर्रो दया वासि ओर आ जीतागाना पूरा बाकितुन मापि कीसि ओन होना वेहतोर.”

“गानि आ जीतागाड राजानागटाल होत्‍तस्‍के, ओना दंटाता वरोर जीतागाड ओन्‍कु कलियतोर. आ जीतागाड राजांकु नालूं नेल्‍कुना कूलिता बाकि मत्‍तोर. आ जीतागाड ओना दंटाता जीतागान दोर्का पीसि, “नाकु निमे हिय्याना बाकि दोहा,” इंचि इत्‍तोर.”

“आ रोंडोव जीतागाड मोदाटा जीतागाना काल्‍कुनपोर्रो अरसि, ‘कुरपा कीसि कोन्‍नि रोजकु आगा, नना नीवा पूरा बाकि नेम्‍हांतन,’ इंचि इत्‍तोर. गानि आ जीतागाड ओन मापि किय्याका ओना दंटाता जीतागान जेलने वाटसि पूरा बाकि नेम्मानादाका ओन पलाते वायाहिय्या हिल्‍लोर.”

“अगा बतल अय्ते जर्गता, अदुनंता कळमता जीतागाह्‍क हूळसि परेसान आतुर, पजा ओर राजानगा होंचि जर्गतदंता वेहतुर.”

“राजाल आ जीतागान केय्‍सि इल्‍हा पूसकीतोर, ‘अरे मुर्का जीतागा! निमे नाकु विनंति कीतस्‍के नना नीवा बाकितुन मापि किया हिल्‍लेना? निमेगुडा अल्‍हे कियामत्‍तिन.’ राजांक आ जीतागानपोर्रो इरगा होंग वासि, ओर आ जीतागान जेलने वाटसीतोर. ओर ओना बाकि पुरागा नेम्‍हानादाका ओन जेलनाल पलाते वायाहिल्‍लोर.”

अस्‍के येसु, “मिमेट मीवा दादन-तम्मुन मनसुनाल मापि कियाकोंटे, स्वर्गमते मनना नावा पेनबाबाल मीलोप्‍पोटा हरेक मनकनगुडा अल्‍हेन कींतोर.’’