30. हेय्युं वेय्कुना मंदिकु येसु तिंडि दोस्सा वेहंतोर
यह कहानी सुनें ऑडियो फ़ाइल · 2.7 MB
इस रिकॉर्डिंग के शब्द नीचे Aheri Gondi में दिए गए हैं।
येसु ओना सिस्युल्कुन पेनदा पोल्लें कराहलय आनि वेहालय वेरे-वेरे नाह्कुने लोहतोर. ओर येसुनगा मल्सि वातुर अस्के, ओर होंचि बतल-बतल कीतुरो अन्नि वेहतुर. अस्के येसु ओर्कुन सेरवुना हब्बेरे उंदि सांत जेगाते जेरासेपताहाटीं ओनतोनि आराम कियालय ओतोर. इल्हा ओर अंटोर उंदि डोंगाते एक्किसि सेरवुना हब्बेटा बाजुंक होत्तुर.
गानि येसु आनि ओना सिस्युल्कु डोंगाते उदसि होननेंके हूळतोर अगा वेल्लेन मंदि लोकुल्कु मत्तुर. आ लोकुल्कु ओरकन्ना मुन्ने सेरवुना हब्बेटा बाजुंक होनालय ओड्डु पीसि वित्तालय दल्गतुर. येसु आनि ओना सिस्युल्क सेरवुना हब्बेटा बाजुंक एवतस्के, अगा लोकुल्कुना उंदि पेद्दा मंदा ओरा एदुर हूळसेके मत्ता.
आ मंदाते पिलाल्क आनि मुरताह्कुन होळसि, हेय्युं वेय्कुंकन्ना (5000) एक्को मंदि मांडसे मत्तुर. ओर्कुन हूळसि येसुंक पापम अन्पिस्ता. येसुना नदरते आ लोकुल्कु मेहानोर हिलुवा गोर्रेनालेसीं आसि मत्तुर. अदुनहाटीं येसु ओर्कु पेनदा पोल्लें कराहतोर, ओरालोप्पो बिमार मत्तोर्कुन बेस कीतोर.
पोळ्द होनना वेलाक सिस्युल्क येसुन इल्हा इत्तुर, “इंदके वेल्लेन आल्सेम आता, ई जेगाक दग्गेरा बद नारगुडा हिल्ले. अदुनहाटीं ईर्कुन होनालय वेहा, अस्के ओर होंचि ओराहाटीं तिंडि तरकुंतुर.” इत्तुर.
गानि येसु, “ओर्कु तिनालय मिमेटे बतलन्ना हीम्टु,” इंचि इत्तोर. अस्के सिस्युल्क, “महगा अय्ते सिराप हेय्युं(5) हारिं आनि रोंडु(2) जिम्मां मंतां, मोमोट बल्हा ओर्कु तिनालय हिय्या पर्रांतोम?” इंचि जवाब हीतुर.
अस्के येसु, “लोकुल्कुन एबै-एबै(50-50) मंदि कीसि जाडि पोर्रो उद्दा वेहाट,” इंचि ओना सिस्युल्कुंक वेहतोर.
अस्के येसु आ हेय्युं हारिं(5) आनि रोंडु(2) जिम्मान पीसि स्वर्गमतेके हूळतोर, हूळसि अवुनाहाटीं पेनदुक दन्यवाद वेहतोर.
पजा येसु आ हारिन आनि जिम्मान तुकडां कीतोर. कीसि अवुन लोकुल्कुंक हीम्टु इंचि येसु ओना सिस्युल्कुंक वेहतोर. सिस्युल्कु आ तुकडन लोकुल्कुंक वाटसेकेन होत्तुर गानि आ तुकडां मारेन हिल्लें. लोकुल्कु पीरनिंडा तित्तुर.
अद आता पजा, मिगुल्ता तिंडितुन सिस्युल्क जमा कीतुर अय्ते अव दग्गेर-दग्गेरा पन्नेंड तट्टां निंडानच्चोन मय्सि मत्तां. आ पूरा तिंडिअंता सिराप हेय्युं हारिं आनि रोंडु जिम्मानाहेंदाले आता.
मत्ती अध्याय 14:13-21; मरकुस 6:31-44; लूका 9:10-17; यूहन्ना 6:5-15 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।