31. येसु एतापोर्रो ताकंतोर

हेय्युं वेय्‍कुना मंदिकु तिंडि दोसमळ आता पजा, येसु ओना सिस्युल्‍कुन डोंगाते होंचि उद्‍दालय वेहतोर. ओर्कुन सेरवुना हब्‍बेटा बाजुंक होनालय वेह्‍चि ओर मात्रम जेरासेपताहाटीं अग्‍गेन आगतोर. सिस्युल्‍क पेय्‍सि होत्‍तुर, येसु लोकुल्‍कुना मंदातुन लोन होनालय वेहतोर. पजा येसु पारतना कियानाहाटीं उंदि गुट्‍टापोर्रो एक्‍किसि होत्‍तोर. अगा ओर वरोरे मत्‍तोर, वेल्‍लेन नर्का आयनदाका ओर अगा पारतना कीतोर.

सिस्युल्‍कु ओरा डोंगातुन ताकिच्‍चेके होंचेके मत्‍तुर, गानि वळि मात्रम ओरा अड्‍डमते इरगा वासेके मत्‍ता. अदुनहेंदाल वेल्‍लेन नर्का आयिनागानि ओर सेरवुना नड्‍डुमे मत्‍तुर.

अद वेलाते येसु ओना पारतना कियमळ महाचि, मल्‍सि ओना सिस्युल्‍कुनेके होनालय पेय्‍सतोर. डोंगातेके होनालय येसु एतापोर्रो ताकसेके पेय्‍सतोर.

अस्‍के सिस्युल्‍कु येसुन हूळतुर. बूतम वासंता इनकुंचि ओर इरगा वेरियतुर. ओर वेरियतुर इंचि येसुंक तेळियता, अदुनहाटीं ओर सिस्युल्‍कुंक आवाज हीसि, “वेरियमट, ननाने आंदुन,” इत्‍तोर.

अस्‍के पत्रु येसुन, “सामि, ओक्‍कला निमेन आयानय्ते, नाकुन एतपोर्रो ताकसेके निहगा वायाना आदेस हीम,” इंचि इत्‍तोर. अस्‍के, “अय्ते वा,” इंचि येसु इत्‍तोर.

अय्ते पत्रु डोंगाताल रेय्‍सि एतपोर्रो ताकसेके येसुनगा होनालय पेय्‍सतोर. गानि इच्‍चुर लक्‍कु होत्‍त‍स्‍के पत्रु, येसुनाहेंदाल नदर तप्‍पिच्‍चि, तडानाहेके आनि इरगा वायाना वळिताहेके तिराहतोर.

अस्‍के पत्रु वेरियसि एते मुळ्‍गालय दल्‍गतोर. “सामि, नाकुन कापाळा,” इंचि मोत्‍कुनालय दल्‍गतोर. येसु अस्‍केन कय हाह्‍चि ओन अंदकुत्‍तोर. पजा येसु ओन, “निहगा विस्वासम वेल्‍लेन तक्‍को मंता, नना नीकुन कापाळा परांतन इंचि, निमे नापोर्रो बारि विस्वासम कियाहिल्‍लिन?” इंचि इत्‍तोर.

पजा येसु आनि पत्रु डोंगाते एकतुर आनि अस्‍केटद अस्‍केन वायाना वळिगुडा आगता, एरगुडा सांत आता. सिस्युल्‍कु इचंत्रम आसि येसुना मुन्‍ने टोंगरां ऊनसि, ओना आरादना कीतुर, कीसि, “निमे निजमे पेनदा मर्रिन आंदिन,” इंचि इत्‍तुर.