35. बेसता बाबोना वेसुडि
यह कहानी सुनें ऑडियो फ़ाइल · 4.0 MB
इस रिकॉर्डिंग के शब्द नीचे Aheri Gondi में दिए गए हैं।
उंदि रोजु येसु, ओना पोल्लें केंजालय ओनगा जमा आता लोकुल्कुंक पेनदा पोल्लें कराहसेके मत्तोर. ओरा लोप्पो कर वसुल कियानोर आनि मूसाना नियम वेहताप ताकाना कोसिस कियवा वेरे लोकुर मत्तुर.
येसु ओरतोनि दंटातोर मत्ताप मनानद, इच्चुर नीतिमंतुल्क हूळतुर. अदुनहाटीं ओर वरोनतोनि वरोर, येसु तप्पु कीसंतोर इंचि वळ्कमळ सुरुव कीतुर. येसु ओर अल्हा वळ्कानेंके केंजतोर, अदुनहाटीं ओर्क ई वेसुडि वेहतोर.
“वरोर मनकांकु इव्वुर मर्क मत्तुर. सिन्ना मर्रि ओना बाबोन, ‘बाबा, नावा पालु नाकु इंदके हीम,’ इत्तोर. अय्ते बाबाल ओना इव्वुर मर्कुंक ओना संपत्तितुन सेरसगोम पंचि हीतोर.”
“सिन्ना मर्रि बिरानेन ओना पालुंक वातदुन जमा कीकुंचि बदो लक्कु देसेम पेय्सि होत्तोर. होंचि पापि पिस्वर पिसमळते ओना अन्नि संपत्तितुन पाड कीकुत्तोर.”
“कोन्नि रोजकु आतस्के, आ सिन्ना मर्रि मत्ता देसेमते पेद्दा करवु अरता. तिंडि अस्सि तिनालय ओनगा कोत्तांगुडा हिलाकोंटा आतां. अदुनहाटीं ओन्कु पद्दिं मेहाना उंदि कबळ दोर्कता. ओर इच्चोन करवुने आनि दुक्कमते मत्तोर गदा, पद्दिं तिनना तिंडि तिंचि ओर पीर निहुंदुर.”
“आकिरते, आ सिन्ना मर्रि ओनद-ओर इल्हा इत्तोर, ‘असल नना बतल कीसंतन? ना बाबानगा कबळ कियाना जीतागाह्कुनगा अय्ते तिनालय वेल्लेन तिंडि मंता, गानि नना अय्ते इग्गे इरगा करवुंक हासंतन. नना ना बाबानगा मल्सि दांतन, होंचि ओना वरोर जीतागानलेसीं नाकुन इर्रा इंचि विनंति कींतन.’”
“अय्ते आ सिन्ना मर्रि ओना बाबाना लोताहेके वायालय पेय्सतोर. ओर इंका लोन एव्वानदे मत्तोर, गानि ओना बाबाल ओन लक्कुटाले हूळसि ओन्कु मर्रिनपोर्रो दया वाता. ओर वित्सि होंचि मर्रिन सातिकु अदुमकुंचि ओन पावरमते बुरतोर.”
“आ मर्रि, ‘बाबा, नना नी विरोदमते आनि पेनदा विरोदमते पापम कीतन. नीवा मर्रि इंचि वेहकुनना लायकगुडा नना हिल्लेन,’ इंचि इत्तोर.”
“गानि बाबो मात्रम वरोन जीतागान केय्सि, “बिराना होंचि बेसता कपडिं पीसि तच्चि ना मर्रिंकु केरहट, ओना वेलुंकु उंगरम आनि काल्कुंक हेरपुह्क केरहट. पजा उंदि मंचिगा बल्स्ता कुर्रातुन कोय्सि मनम अंटोरम कुसिते तिंचेके पंडुगु कीकोम, बारित्ते ना मर्रि हासोंचि मत्तोर, गानि इंदके ओर जीवाते मंतोर, ओर तप्सोंचि मत्तोर गानि इंदके ओर माकु दोर्कतोर,’ इंचि वेहतोर.’’
“अस्के लोकुल्कु पंडुगु कियालय दल्गतुर. जेरासेप आतस्के, पेद्दा मर्रि नेदाल कबळ कीसि लोन वातोर. ओर अगा पाटां, एगराना सप्पुड केंजसि ‘इगे बतल जर्गसंता? इंचि इचंत्रम आतोर.”
“पजा, ओना तम्मुर लोन वापस वाताहेंका ई पंडुगु जर्गसंता इंचि आ पेद्दा मर्रिंक तेळियतस्के ओनकु इरगा होंग वासि ओर लोप्पो होळिये हिल्लोर. ओना बाबाल पलाते वासि अंटोरतोनि कलियसि पंडुगु कीम इंचि ओन बतिमलाडतोर, गानि ओर केंजाहिल्लोर.”
“आ पेद्दा मर्रि ओना बाबान इल्हा इत्तोर, ‘इच्चुं वर्सानाल नना नीहाटीं इमानदारते कबळ कीतन. निमे वेहता हरेक पोल्ले केंजतन. गानि निमे मात्रम, नना नावा दंटातोरतोनि कलियसि पार्टि कियालय, नाकु बस्केन उंदि सिन्ना एटि पोरिगुडा हिय्या हिल्लिन. गानि नीवा ई मर्रि नीवा दनमतुनंता पापि कबाह्कुने पोळागोटसि वाते, निमे ओनाहाटीं पंडुगु कियालय अन्निटकन्ना बेस बल्स्ता कुर्रातुन कोयतिन!’”
“अस्के बाबाल इल्हा जवाब हीतोर, ‘कोको! निमे बस्केळ्क नातोने मत्तिन, बतल अय्ते नावद, अद अन्नि नीवदे आंद. गानि नी तम्मुर हासि मत्तोर, ओर इंदके जीवाते मंतोर, ओर तप्सोंचि मत्तोर, गानि इंदके ओर मनाकु दोर्कतोर, अदुनहाटीं मनम पंडुगु कियमळते तप्पु हिल्ले.’’’
लूका अध्याय 15:11-32 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।