36. मारियमळ
यह कहानी सुनें ऑडियो फ़ाइल · 2.4 MB
इस रिकॉर्डिंग के शब्द नीचे Aheri Gondi में दिए गए हैं।
उंदि रोजु येसु, पत्रु, याकोब आनि योहानुन ई ओना मुव्वुर सिस्युल्कुन ओनतोनि पीसि ओतोर.(इव्टे मनना योहान, येसुंकु बापतिस्मा हीता योहान आयोर.) पारतना कियानाहाटीं ओर उंदि एत्तु गुट्टापोर्रो एक्किसि होत्तुर.
अगा येसु पारतना कियनेंके ओना मोकोम पोळ्दुनालेसीं जग्गरा आता. बूमिपोर्रो बोरे अच्चोन तेल्लगा किया पर्रोर अल्हा ओना कपडिं वेलगुनालेसीं तेल्लगा आतां.
अस्के अगा मूसाल आनि एलियाहल ई पेनदा कबुरतोर दिसतुर. बच्चुंगो नुह्कुना वर्साना मुन्ने ई मनकालोर बूमिपोर्रो मत्तुर. येसुना हामुरता बारेमते ओर ओनतोनि वळ्कतुर. बारित्ते बिरानेन येसु येरुसलेमते हायाना मत्तोर.
मूसाल आनि एलियाहल येसुनतोनि वळ्कसेके मननेंके पत्रु येसुन, “मनम इग्गेन मत्ते बच्चोनो बेस मनंता, मोमोट मना मुव्वुराहाटीं इग्गे मूड गुळसें वाटंतोम, उंदि नीहाटीं, उंदि मूसानाहाटीं आनि उंदि एलियाहनाहाटीं,” इंचि इत्तोर. गानि पत्रु बतल वळ्संतोरो ओनद-ओनके तेळिया हिल्ले.
पत्रु वळ्कसेकेन मत्तोर, अच्चोटेन उंदि मब्बु तेर्पे वासि ओरपोर्रो नीडा कीता. अस्के मब्बुनाल उंदि अल्किर वातद ओर केंजतुर. आ अल्किर इल्हा मत्ता, “ईर नावा मर्रि आंदुर, नना ईन पावरम कींतन. नना ओनतोनि कूस मंतन. ओर वेहानद केंजट,” इत्ता. अद केंजसि ओर मुव्वुर सिस्युल्कगुडा वेरियसि हिळ अरतुर.
अस्के येसु ओर्कुन इट्सि, “वेरियमट, तेदट,” इंचि ओर्कुन तेहतोर. ओर तेदसि नालुं मूलां हूळते ओर्कु सिराप अगा येसु वरोरे दिसतोर.
पजा येसु आनि ओना मुव्वुर सिस्युल्कु गुट्टापोर्रोटाल हिळु रेय्सि वातुर. अस्के येसु ओर्कुन, “इंदके इग्गे बतल अय्ते जर्गतानो, अदुना बारेमते मिमेट बग्गेने वळ्कानायो. नना बिरानेन हासि दांतन, आनि मर्रा जीवाते तेदांतन. अस्के मिमेट लोकुल्कुंक वेहा पर्रांतिट,” इंचि इत्तोर.
मत्ती अध्याय 17:1-9; मरकुस 9:2-8; लूका 9:28-36 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।