37. लाजरुन येसु हातोरव्टेटाल जीवाते तेहांतोर
यह कहानी सुनें ऑडियो फ़ाइल · 3.9 MB
इस रिकॉर्डिंग के शब्द नीचे Aheri Gondi में दिए गए हैं।
लाजर पोरोलतोर वरोर मनकल मत्तोर. ओनकु रोंड अक्काह्क मत्तां, उंदान पोरोल मरियम, इंकुंदान पोरोल मार्ता. ओर अंटोर येसुना बेस दंटातोरे मत्तुर. उंदि रोजु, लाजर इरगा बिमार मत्तोर इंचि बोरो येसुंक वेहतुर. येसु अद केंजसि, “लाजरुना आ बिमारि ओना हामुरतोने मारो गानि दानहेंदाल लोकुल्कु पेनदा कदर कियालय सहायम आंता,” इत्तोर.
येसु ओना दंटातोर्कुन वेल्लेन पावरम कियुंदुर. गानि ओर अद वेलाते बगा अय्ते मत्तोर रोंड रोजकुनदाका अग्गेन आगतोर. आ रोंड आतस्के, “वटु, मनम मर्रा यहुदिया मल्सि दाकोम,” इंचि ओना सिस्युल्कुन इत्तोर. गानि सिस्युल्कु, “गानि गुरु, दीनकन्ना मुन्नेन अगाटा लोकुल्कु नीकुन हव्कालय हूळसेके मत्तुर गदा!” इंचि जवाब हीतुर. अस्के येसु, “ना दंटातोर लाजर निद्रा होंचंतोर, नाकु ओन तेहाना मंता,” इंचि इत्तोर.
अस्के सिस्युल्कु, “सामि, ओक्कला लाजर निद्रा होननय्ते ओर बेस आयानुर,” इंचि इत्तुर. अस्के मात्रम येसु ओर्कु किलियर वेहतोर, “लाजर हासोत्तोर. मिमेट नापोर्रो विस्वासम इर्रागोम इंचि नना अगा हिल्लेन, इदुनपीसि नना कूस मंतन,” इत्तोर.
येसु लाजरना नार एवतस्के, अदवेरदाकेन ओर हासि नालुं रोजकु आसि मत्ता. मार्ताल येसुंक कलियालय पलाते वासि, “सामि, ओक्कला निमे इग्गे मंचि मत्ते, नावा तम्मुर हायाकोन्नेर. गानि निमे पेनदुन बतल तल्किना अद नीकु हींता इंचि नना नम्मंतन,” इंचि इत्ता.
अस्के येसु इल्हा जवाब हीतोर, “हातोर्कुन तेहानोन आनि पिस्वर ननाने आंदुन, बोर अय्ते नापोर्रो विस्वासम इर्रांतोर, ओर हायिनागानि पिस्से मनांतोर. नापोर्रो विस्वासम इर्रानोर ओर बस्केन हायोर, निमे इदुन विस्वासम कींतिना?” इत्तोर. अस्के मार्ताल, “सामि, निमेन पेनदा मर्रि किरिस्तुन आंदिन, इंचि नना विस्वासम कींतन,” इंचि जवाब हीता.
अस्के मरियम वासि येसुना काल्कुनपोर्रो अरसि, “सामि, ओक्कला निमे इग्गे मंचि मत्ते ना तम्मुर हायाकोन्नेर,” इंचि इत्ता. अस्के येसु, “मिमेट लाजरुन बगा इरतिर?” इंचि दान पूसकीतोर. अस्के, “बोंदाते इरतोम, वा, हूळा वा!” इंचि अद वेहता. अस्के येसु अळालय दल्गतोर.
आ बोंदा उंदि बंडा सोर्रे आंद, दानकु उंदि बंडा अड्डम दोब्बिसि मत्ता. येसु आ बोंदातगा येव्सि, “बंडातुन पक्काक कीम्टु,” इंचि इत्तोर. गानि मार्ताल, “ओर हासि नालुं रोजकु आसंतां, अव्टेटाल कराब गब्बु वायार बारे,” इंचि इत्ता.
येसु ओर्कुन, “मिमेट ओक्कला नापोर्रो विस्वासम इर्रानय्ते, पेनदा ताकततुन हूळकिर इंचि, नना मीकु वेहा हिल्लेना?” इंचि इत्तोर. अदुनहाटीं ओर आ बंडातुन तेंडतुर.
अस्के येसु पोर्रो स्वर्गमतेके हूळसि इल्हा इत्तोर, “पेनबाबा, नाकुन केंजताहाटीं नना नीकु दन्यवाद कींतन. निमे नाकुन बस्केळ्क केंजांतिन इंचि नाक एर्के मंता. गानि इग्गे निल्सि मनना ई अंटोर लोकुल्कुंक सहायम कियानाहाटीं नीकुन केयतन. ईर हूळसि, नाकुन निमेन लोहतिन इंचि विस्वासम कियाना इंचि केयतन,” इत्तोर. पजा येसु, “ए लाजर, पलाते पेय्सि वा!” इंचि केयतोर.
अस्के लाजर पलाते पेय्सि वातोर. ओर इंकागुडा कपिडतेन हुट्सि मत्तोर. पजा येसु, “ई कप्पिडतुन तेंडसि ओन अव्टेटाल इळबडालय ओनकु सहायम कीम्टु,” इंचि वेहतोर. आ चमत्कारमतुन हूळसि वेल्लेन मंदि यहुदिल्क येसुनपोर्रो विस्वासम कीतुर.
गानि यहुदि नीतिमंतुल्कुना नेतालोर मात्रम येसुनपोर्रो अळुंदुर. ओन आनि लाजरुन बल्हा हव्काना इंचि पिलान कियालय ओर उंदगा जमा आतुर.
यूहन्ना 11:1-46 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।