38. येसुंक दोका हियमळ
यह कहानी सुनें ऑडियो फ़ाइल · 6.0 MB
इस रिकॉर्डिंग के शब्द नीचे Aheri Gondi में दिए गए हैं।
यहुदि लोकुल्कु एटा दाटसि होनना पंडुगु कियुंदुर. बच्चुंगो नुह्कुना वर्सानामुन्ने ओरा एनकटा पेद्दाल्कुन पेन इजिप्त देसेमता गुलामगिरिताल पेचाह्ता. अदुना मतिते ई पंडुगु यहुदिल्क कियुंदुर. दग्गेर-दग्गेरा मूड वर्सां आसोत्तस्के येसु कुल्ला-कुल्ला कराहमळ, वेहामळ सुरुव कीतोर. येरुसलेम होंचि दाटसि होनना पंडुगु कियाना इच्चा मंता इंचि येसु ओना सिस्युल्कुंक वेहतोर. अचोने आयका अगा ओन हव्कंतुर इंचिगुडा वेहतोर.
येसुना सिस्युल्कुना लोप्पो यहुदा पोरोलतोर वरोर मनकल मत्तोर. यहुदल प्रेरितुल्कुना कोत्ताना जोरा इर्राना कबळ कियुंदुर, अस्के-अस्के ओर आ जोराताल कोत्तांगुडा तेंडकुनुंदुर. येसु, ओना सिस्युल्कु येरुसलेम एव्तस्के, यहुदुल अगाटा यहुदिरा नेतालोरगा होत्तोर. कोत्तां हीते, येसुन ओरा कय्दे पीसींतन इंचि ओर ओरतोनि करार कीतोर. येसुए किरिस्तु आंदुर इंचि यहुदि नेतालोर ओप्कुन्नुर इंचि ओनकु एरपाटे मत्ता. ओर येसुन हव्कालय पिलान कीसंतुर इंचिगुडा ओन एर्के मत्ता.
पेद्दा पेर्मल वेहताहेंका यहुदि नेतालोर येसुन ओरा कय्दे पीसि हिय्यानाहाटीं यहुदांकु मुप्पै(30) एंडि बंडिं हीतुर. पेनदा कबुरतोर येसुना बारेमते मुन्ने वेहतापे जर्गता. यहुदल ओप्कुंचि एंडि रूपें पीसि होत्तोर. येसुन दोर्का पिय्यालय यहुदिर्क सहायम कियानाहाटीं, रकारकाल्कुना मोकां ओर पह्कसेके मत्तोर.
येसु ओना सिस्युल्कुनतोनि कलियसि येरुसलेमते दाटसि होनना पंडुगु कीतोर. पंडुगुना गाटो तिननेंके येसु हारि पीसि दान तुकडा कीतोर. कीसि, “इद येतसि तिंटु, मीहाटीं नना हियाना नावा मेंदुल आंद, नावा मतिते मिमेट दीन कीम्टु,” इंचि इत्तोर. इल्हा येसु ओराहाटीं हायाना मंता इंचि वेहतोर, इत्ते, ओराहाटीं येसु ओना मेंदुलतुन बलि हींतोर.
पजा येसु, अंगुर पंडिना पानकमता उंदि गिलास पीसि, “इदुन उंटु, पेन मीवा पापाल्कुन मापि कियाना इंचि, नना मीहाटीं पोंगागोटना, पूना करारता नावा नेत्तुर आंद. मिमेट बस्के अय्ते इदुन उंटिरो, अस्के नावा मतिते, नना इंदके कियानदुन मिमेट कीम्टु,” इंचि इत्तोर.
अस्के येसु ओना सिस्युल्कुनतोनि, “मी लोप्पोटाल वरोर नाकुन पीसि हियानोर मंतोर,” इत्तोर. सिस्युल्क अदुल्कुत्तुर, अदुल्कुंचि अल्हा कियानोर बोर आंदुर? इंचि वरोंक वरोर पूसकियालय दल्गतुर. “नना ई हारि तुकडा बोन्क अय्ते हींतानो ओरे नाकुन पीसि हियानोर आंदुर,” इत्तोर. आनि आ हारि तुकडा यहुदांक हीतोर.
आ हारि तेंडकुत्तस्के यहुदाना लोप्पो देय्यम होळियता. यहुदल अगाटाल पेय्सि येसुन दोर्का पीसि हिय्यालय यहुदि नेतालोर्क सहायम कियालय ओरगा होत्तोर. अद नर्कटा वेला आंद.
गाटो तिनुड आतस्के, येसु आनि ओना सिस्युल्क जय्तुन मराकुना गुट्टापोर्रो होत्तुर. अस्के येसु, “इय्याला नर्कडकु मिमेट अंटोर नाकुन होळसंतिर. बारित्ते, ‘नना मेहानोन हव्कांतन, गोर्रें अन्नि सिल्लर आसि वित्तंता,’ इंचि रासि मंता,” इत्तोर.
जवाबुने पत्रु, “अंटोर होळसिना गानि नना मात्रम नीकुन होळसोन,” इंचि इत्तोर. अस्के येसु ओन, “देय्यम मीकुन अंटोर्कुन येतकुनालय हूळसंता, गानि ए पत्रु, निमे मात्रम विस्वासमताल अर्राकोंटा मनना इंचि नना नीहाटीं पारतना कीतन. अयना इय्याला नर्का, मोदाटा गोगोड कूसाका मुन्ने निमे नाकुन एरपाट किय्योन इंचेके मूड मल्कां इनकिन,” इत्तोर.
अस्के पत्रु, “नाकु हामुर वायिनागानि, नना नीकुन एरपाट किय्योन इंचि बस्केन इन्नोन,” इंचि इत्तोर. कळमाता सिस्युल्कगुडा अल्हे इत्तुर.
पजा येसु ओना सिस्युल्कुनतोनि गेतसेमनि इनना तोटातगा होत्तोर. देय्यम सिस्युल्कुना पट्टु हूळामन्नि इंचि येसु ओर्कु पारतना कियालय वेहतोर. आनि ओर कुद्दु पारतना कियालय वेरे जेगाते होत्तोर.
येसु मूड मल्कां पारतना कीतोर, “ए नावा बाबा, ओक्कला कुदुरते ई दुक्कमतोनि निंडिसि मत्ता गिलास नाकु हियमा. गानि लोकुल्कुना पापाल्क मापि आयानाहाटीं वेरे बदे हर्रि हिलाकोंटे नीवा इच्चाए पुरा आयि,” इंचि इत्तोर. येसु वेल्लेन बादाते मत्तोर, ओना सेमटा नेत्तुरलेसीं आसि पोंगसेके मत्ता. ओनकु ताकत हिय्यालय पेन उंदि दाना दूतातुन लोहता.
ओर पारतना कियुड आतस्केनना ओर ओना सिस्युल्कुनगा मल्सि वातोर, ओर बस्के वायिना, अस्के सिस्युल्कु मींडसे मत्तुर. येसु मूडोव मल्का वातस्के, “निद्राताल तेदट! नाकुन पीसि हियानोर इग्गे वातोर,” इंचि इत्तोर.
यहुदिल्कुना नेतालोर, सिपाइल्क आनि वेल्लेन मंदितुन पीकुंचि यहुदल अगा वातोर. ओर तलवार्कु आनि गुत्पां पीसि मत्तुर. यहुदल येसुनगा वासि, “गुरु, जोहार,” इंचि ओन बुरतोर. येसुन दोर्का पियानोर्कु गुर्तु इंचि इल्हा कींतन इंचि वेहचि मत्तोर. अस्के येसु, “यहुदा, उंदि मुद्दु बुरसि नाकुन दोर्का पीसि हीसंतिना?” इत्तोर.
आ सिपाइल्क येसुन दोर्का पीसेके मननेंके पत्रु ओनगा मत्ता तलवार तेंडसि पेद्दा पेर्माना वरोन सिपाइना केव्दुन नेम्हातोर. अस्के येसु, “नीवा तलवार पजोळ्क कीम, नना इनकुत्ते नावा सहायम कियालय नावा बाबानाहेंदाल दूताना गँगुन लोहा इंचि विनंति किया परांतन, गानि नाकु नावा बाबाना पोल्ले केंजाना मंता,” इंचि इत्तोर. पजा येसु आ सिपाइना केव्दुन बेस कीतोर, अस्के अंटोर सिस्युल्क तेगा विततुर.
मत्ती 26:14-56; मरकुस 14:10-50; लूका 22:1-53; यूहन्ना 12:6; 18:1-11 से एक बाइबल की कहानी
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।