39. येसुनपोर्रो कारवाई आंता

अद नडजाम नर्कटा वेला मत्‍ता. येसुन सवाल्‍क पूसकियाना मत्‍ताहाटीं, आ सिपाइल्‍क ओन पेद्‍दा पेर्माना लोन ओतुर. पत्रु लक्‍कुटाल येसुना पज्‍जो-पज्‍जो होंचेके मत्‍तोर. सिपाइल्‍क येसुन लोतालोप्‍पो ओतस्‍के, पत्रु पलाते तळमि सेका कासेके मत्‍तोर.

लोतालोप्‍पो, यहुदि नेतालोर येसुनपोर्रो कारवाई कीतुर. येसुना विरोदमते आबद्‍दम गवाइ वेहानाहाटीं आ नेतालोर बचटूरो गवाइदार्कुन पीसि वातुर. अयना वाता आ गवाइदारकुना पोल्‍लें वरोनद-वरोंक कलिया हिल्‍लें. अदुनहाटीं येसु दोसि इंचि यहुदि नेतालोर रुजुव कीसि हुप्‍सा पर्राहिल्‍लुर. गानि येसु बतले वळका हिल्‍लोर.

आकिरते, कुद्‍दु पेद्‍दा पेर्मले येसुन, “अय्ते माकु वेहा, जीवाते मनना पेनदा मर्रि, किरिस्‍तुन निमेन आंदिना?” इंचि पूसकीतोर.

अस्‍के येसु, “ननाने आंदुन, इंका नाकुन पेनदा पक्‍काते उद्‍दिसि मत्‍तद आनि स्वर्गमताल वायनद मिमेट हूळकिर,” इंचि इत्‍तोर. येसु वळ्‍कता पोल्‍ले पेद्‍दा पेर्मंक नच्‍चुवाहेंका इरगा होंग वासि, ओर ओना कपडिं हराहकुत्‍तोर. पजा, “ईर मनकल बतल कीतोर इंचि इंका वेरे गवाइदारकु वेहना अवसरम मनाकु हिल्‍ले! ओर कुद्‍दे पेनदा मर्रि आंदुर इंचि वेहानेंके मिमेट अंटोरगुडा केंजतिर, अय्ते ईना बारेमते मीवा निरनायम बतल मंता?” इंचि पेद्‍दा पेर्मल वेरे नेतालोरा पोर्रो मोत्‍कुत्‍तोर.

अस्‍के यहुदिल्‍कुना अंटोर नेतालोर, “ओर हामुर सिक्‍साता लायक मंतोर,” इंचि पेद्‍दा पेर्मांक जवाब हीतुर. अस्‍के ओर येसुना कळकुंक पट्‍टि दोहातुर, ओनपोर्रो उस्‍कुतुर, ओन तंतुर, आनि ओना कारेड्‍डाल्‍क कीतुर.

लोता पलाताल पत्रु एदुर हूळसेके मत्‍तोर. अस्‍के उंदि दासि पोरि ओन हूळसि, “निमेगुडा येसुनतोनि मत्‍तिन,” इंचि इत्‍तास्‍के पत्रु, “नना मनाहिल्‍लेन,” इत्‍तोर. पजा इंकुंदि बदो पोरिगुडा अदे पोल्‍लेतुन इत्‍ता, अस्‍केगुडा पत्रु नना मनाहिल्‍लेन इत्‍तोर. आकिरते, इच्‍चुर लोकुल्‍कगुडा, “निमे येसुनतोनि मत्‍तिन, माक एरपाटे, बारित्‍ते मिमेट इव्‍वुरगुडा गालिलतोरे आंदिर,” इत्‍तुर.

अस्‍के पत्रु, “ओक्‍कला ननागिंटा ई मनकन एरपाट कियानय्ते पेन नाकु सिक्‍सा हिय्यिकांटी!” इंचि इत्‍तोर. पत्रु अल्‍हा इत्‍ता इनुडे उंदि गोगोड कूसता. अस्‍के येसु पजोळ्‍क तिरियसि पत्रुनेके हूळतोर.

पत्रु अगाटाल पलाते होंचि इरगा अळतोर. अदे वेलाते, यहुदि नेतालोर येसुंक हामुर सिक्‍सा हीतुर इंचि, येसुन दोर्का पियालय सहायम कीता यहुदल हूळतोर. यहुदांक इरगा दुक्‍कम वाता, अस्‍के ओर होंचि ओनद-ओरे हासोत्‍तोर.

अस्‍के अद देसेमते पिलातुस इनानोर राज्यपाल मत्‍तोर. ओर रोम सरकारहाटीं कबळ किय्युंदुर. यहुदि नेतालोर येसुन ओनगा पीसि ओतुर. पिलातुस येसुंक हामुर सिक्‍सा हीसि ओन हव्‍कागोम इंचि ओरा मनसु मत्‍ता. अस्‍के पिलातुस येसुन, “निमे यहुदिरा राजान आंदिना?” इंचि पूसकीतोर.

अस्‍के येसु इल्‍हा जवाब हीतोर, “निमे निजमे इत्‍तिन. गानि इग्‍गे बूमिपोर्रो ना राज्येम हिल्‍ले. ओक्‍कला मंचि मत्‍ते नावा दासुल्‍क नाहाटीं लडाइ कीसि मन्‍नेर. पेनदा बारेमते सत्‍तेम वेहालय नना ई बूमिपोर्रो वातन. सत्‍तेमतुन पावरम कियाना हरेक मनकल नना वेहातदुन केंजंतोर,” इत्‍तोर. “अय्ते सत्‍तेम बतल मरि?” इंचि पिलातुस इत्‍तोर.

येसुनतोनि वळ्‍कमळ आतस्‍के, पिलातुस पलाते लोकुल्‍कुना गर्दितगा होचिं, “ई मनकंक हामुर सिक्‍सा हियानालायक, ईनगा बतल कारनम नाकु दोर्काहिल्‍ले,” इंचि इत्‍तोर. गानि यहुदि नेतालोर आनि लोकुल्‍कु, “ओन कुस्रुनपोर्रो वेलाड वाटा,” इंचि मोत्‍कुत्‍तुर. अय्ते पिलातुस, “ओर बतले तप्‍पु कियाहिल्‍लोर गदा,” इंचि इत्‍तोर. अयनागानि ओर इंका पेद्‍दा आवाजते मोत्‍कुंचेके मत्‍तुर. अस्‍के पिलातुस, “ओर बतल दोसेम कियाहिल्‍लोर,” इंचि मूडोव मल्‍का इत्‍तोर.

लोकुल्‍कु इंका गडबड कियानुर बारे इनकुंचि पिलातुस वेरियतोर, अदुनहाटीं ओर ओना सिपाइल्‍कुनहेंदाल येसुन क्रुसुनपोर्रो वेलाड वाटालय ओप्‍कुत्‍तोर. रोमि सिपाइल्‍क येसुन मोल्‍लाना पोट्‍टेते तंतुर, ओनकु राजाल केर्राना अंगि केराहतुर आनि ओना तल्‍लक हाह्‍कुना किरिटम कडाह्तुर. पजा ओर, “हुळाट, यहुदिल्‍कुना राजाल!” इंचि कारेडाल्‍क कियालय दल्‍गतुर.