12. हिंडतो बीती

इसराएली मन मिसर ले निकरून खूबे हरिक रलाI एबे हुन मन कमिया नुवात, आउर हुन मन वायदा चो देश ने जाते रओत! जोन बले इसराएली मन मांगला, मिसरी लोग मन हुन मन के सब भानी दिला, ईतलो तक कि सोना, चांदी, आउर खुबे मोल बिती मनके दिलाI दुसरा देश चो आदो लोग मन महान परबु के विसवास करला आउर जिदलदाय इसराएली लोग मन मिसर ले निकरला तो हुन मन बले हुन मन संगे होला।

हुन दिन चो पाचे, बादरी उपरे चो गोटोक बड़े खम्बा हुन मन चो पुरे-पुरे गेलीI आउर राती बेरा हुन जोय चो खम्बा बनलीI महा परबु हुन बादरी चो खम्बा आउर जोय चो खम्बा बनुन हुन मन के राका दिलो, आउर हुन रोजे हुन मन संगे रते रये, आउर हुन मन के अगवाई करते गेलो। हुन मन के सिरप हुनचो पाट-पाट जातोर रयेI

खिंडीक दिन पाचे, फिरौन आउर हुन चो लोग मन अपलो मनके बदललाI हुन मन इसराएली मनके आउरी कमिया बनातो काजे बिचार करते रहोतI हुनि काजे हुन मन इस्राएली लोग मन चो पीछा करलाI ए महा परबु ही आय हुन मनचो मनके असन करुन दिलोI कसन बोलले, हुन मन जानोत कि, फिरौन ले आउर मिसर देश चो देव मन ले अधिक शक्तिशाली महा परबु आय।

पाचे इसराएली मन मिसर चो सेनिक मनके एतो बेरा दकला आउर हुन मन के मालुम होली कि फिरौन चो सैनिक आउर लाल समुन्द्र चो मांजी घता आसोतI आउर हुन मन खुबे डरून गेला आउर गागुक मुरयाला, हामी मिसर देश के काय काजे छाड़लु? हामी मोरुआ बे!"

मूसा बललो इसराएली मनके नी डरतोर आय, महा परबु हाम चो काजे लड़ेदे, आउर तुमके बचायदेI" तेबे महा परबु मूसा के बोल्लो, "ऐ लोग मनके लाल समुंद चो उन पाट जातो काजे सांगI"

आउर महा परबु हुन बादरी चो खम्बा के धरून इस्राएली आउर मिसरी लोग मनचो मांजी घता संगान दिलो काय कि मिसरी लोग मन इस्राएली मन के दकुक नी सकोत।

महा परबु मूसा के समुन्द्र बाटे हाथ बड़ातो काजे बललोI आउर महा परबु लेहरा आउर समुन्द्र चो पानी के दुय भाग करलो, आउर हुन समुंद तानले गोटोक बाट बनली।

इसराएली लोग मन दुनो बाटे पानी चो दीवार चो संगे सुखलो भुई ने होउन हुन मन बाट हिंडला।

आउर महा परबु हुन बाट चो बादरी के गुचान दिलो ताकि मिसरी लोग मन इसराएली लोग बचुन जातो के दकोतI मिसरी लोग मन हुन मन के धरतो काजे बिचार करला।

आउर हुन लोग मन समुन्द्र चो हुन बाट ले इसराएली मन चो पीछा करला, मांतर महा परबु मिसरी लोग मन के डराउन दिलो आउर हुन मनचो रथ के टेबान दिलोI हुन मन छीचयाऊक मुरयाला, "पोरआवा! इसराएली मन चो बाटले महा परबु लड़े से।"

सब इसराएली मन समुन्द्र चो दुसर बाटे अमरलाI तेबे महा परबु मूसा के बललो, "पानी बाटे हाथ के लामाओंI तेबे मूसा उसनी करलो, आउर पानी मिसरी लोग चो उपरे इली आउर जसन रली असनी बराबर होलीI सबु मिसरी सेना बुड़लाI

आउर इसराएली मन दकला कि मिसरी मन मोरला तो हुन मन महा परबु चो उपरे विसवास करलाI हुन मन बिसवास करला कि मूसा महा परबु बाटले आगमजानी आय।

इसराएली लोग मन खुबे हरीक रओत काय कसन बल्ले हुन मन के मरतो ने आउर कमिया होतो ले बचालोI एदाय हुन मन महा परबु चो आराधना आउर हुन चो आज्ञा के पालन करतो काजे स्वतंत्र रहोतI इसराएली मन आपलो स्वतंत्र होलो चो हरीक मनातो काजे महा परबु काजे खुबे गीत मन गा ला, कसन बल्ले हुन उन मनके मिसरी सेना ले बाचाऊ रयेI

महा परबु इसराएली मनके हर बरक ने गोटक परब मनातो काजे आदेश दिलो, ए सुरता करतो काजे कि महा परबु मिसरी मनके हरान दिलो आउर हुन मन के कमिया होतो ले बचालोI ए जोन दिन आय नुआ खाऊनी दिन बनातो काजे गोटोक अच्छा मेंडा के जत्रा करतोर रये, हुनके भूंजतोर रये, आउर हुनके बिना खमीर बीती रोटी संगे कातोर रयेI