13. इस्राएली संगे महा परबु मिस्तोर

इसराएली मन लाल समुन्द्र ले हुन बाट गेलो पाचे, महा परबु हुन मन के जंगल ले ओउन सिने बोलतो डोंगरी बाट ले निलोI ए हुनी डोंगरी आय जोन थाने मूसा जलतो बीती झाड़ी के दकु रयेI हुन मन हुन डोंगरी तले रतो काजे मांडो बनाला।

महा परबु मुसा आउर सबु इसराएली लोग के बललो, "तुमके रोजे मोचो गोट मानतोर आय आउर जोन वाचा मोय तुमचो संगे बांधेनशे, हुनके नी भुलकतोर आयI यदि तुमी असन करा से, तो तुमी ईनाम ने खुबे मोल बीती धन, याजक मनचो राज, आउर गोटोक पवित्र जाति होआ सेI"

महा परबु हुन मन चो लगे एतो काजे, लोग मन कुद तीन दिन ले तीयार होलाI तेबे महा परबु सीनै डोंगरी तले उतरलोI तेबे गोटोक भूकप होली, बिजली चमकली, धुआ उठली, मोहरी तुरही चो जोरदार शब्द होलीI तेबे मूसा डोंगरी उपरे चेगलो।

तेबे महा परबु लोग मन संगे गोटक वाचा बांधलोI हुन बल्लो, "मय तुमचो महा परबु, यहोवा आयI मय ची आय जोन कि तुमके मिसर देश ले छुड़ालेI कोनी बले मुर्ति चो आराधना नी करा।

मूर्ति चो जत्रा आउर हुनचो उपासना नी करा, कसन बलले, मय महा परबु गोटक यहोवा आयI गलत विचार ले मोचो नाम के नी धराI सब्त चो दिन के पवित्र मानतो काजे सुरता कराI एचो अरथ आय, छ: दिन सब बुता करा, सातवा दिने तुमचो काजे बिछा तो आउर मोके सुरता करतो काजे आयI

आपलो माय बाप के आदर कराI काकेय मोरते नी मारतोर आयI व्यभिचार नी करतोर आय, चोरी नी करतोर आय, आपलो पड़ोसी चो बायले, हुनचो घर, नाह ले काई तीज काई समान के दरतो काजे बिचार नी कर।

तेबे महा परबु दस आज्ञा के हुन दुय गोटा पोकना थाने लिखून मूसा के देऊन दिलोI महा परबु चो मानतो काजे आउर बले खुबे व्यवस्था दिलोI आउर यदि हुन मन व्यवस्था के पालन करदे तो महा परबु हुन मन के आशीर्वाद करतो काजे प्रतीज्ञा करलोI मान्तर जोन आज्ञा के पालन नी करे हुन मन के द्डित करतो काजे बललो।

हुन लोग मनके उन मिलाप बीती तंबू चो पुरे गोटोक वेदी के बनातोर होयदेI कोनी बले महा परबु चो व्यवस्था के अपमानीत करले हुन वेदी थाने गोटोक जीवधारी के आन तोर आयI तेबे याजक हुनके जातरा करुआय आउर वेदी ने महा परबु काजे जलायदेI महा परबु बललो हुन जीवधारी चो लोउ हुन व्यक्ति चो पाप के ढाकेदे हुनी काजे महा परबु हुन पाप के नी दके। हुन माने महा परबु चो नजर ने "शुद" ठहरेदेI महा परबु मूसा चो आउर हारून चो बंश के आपलो याजक होतो काजे चुनलोI

महा परबु हुन लोग मन के जोन नियम देवून रला, हुनचो पालन करतो काजे राजी होलाI हुन मन सिर्प महा परबु चो लोग होतो काजे आउर हुन चो आराधना करतो काजे राजी होला।

खुबे दिन ले, मूसा सिने डोंगरी ने रलोI हुन महा परबु चो संगे गोटयाते रलोI मानतर लोग मन हुन चो आपस एतो काजे टाकुन-टाकुन थाकुन गेलाI हुनी काजे उन मन हारून लगे सोना दरुन इला आउर हुनचो ले गोटोक मूर्ति बनातो काजे बोलला, ताकि हुन मन महा परबु के चाडून हुन चो उपासना करुक सकोतI असन रीति ले उन मन महा परबु चो बिरुद्द पाप करलाI

हारून बाछा चो आकार ले सोना चो मूर्ति बनालोI हुन मन हुन मूर्ति चो उपासना करुक मुरयाला हारून हुन के जतरा चेगालो! हुन मन चो पाप चो कारन महा परबु हुन मन के खुबे रीस होलोI हुन मनके सत्यानाश करतो काजे होते रयेI मांतर मूसा असन नि करतो काजे, महा परबु के विनती करलोI महा परबु हुन चो विनती के सुनलो आउर सत्यानाश नी करलो।

आखरी ने मूसा सीने डोंगरी चो खाले हुन दुई पोकना चो पटिया धरून ईलोI हुन थाने महा परबु चो दस आज्ञा लिखलोर रलीI फेर हुन बीती मूर्ति के दकलोI आउर खुबे रीस होलो आउर पाटिया के चकनाचूर करुन दिलो।

फेर मूसा हुन मूर्ति के पिसुन घुंड बनान दिलो, आउर हुन घुंड के पानी ने मिलाऊंन बाती उन मनके पानी पियालोI महा परबु हुन लोग चो उपरे गोटोक बिपति पटालो आउर खुबे लोग मोरला।

जोंन पटिया के मुसा तोडून रलो हुन चो जगा धरतो काजे मूसा हुन दस आज्ञा चो पकना नुआ पटीया के बनालोI तेबे फेर हुन डोंगरी ने चेगलो आउर पारथना करलो की महा परबु हुन लोग मनके क्षमा कर बललोI

महा परबु मुसा चो पारथना के सुनलो आउर हुन मनके क्षमा करलोI आउर नुआ पटिया चो दस आज्ञा के धरून मूसा डोंगरी ले खाले ईलोI तेबे महा परबु सीने डोंगरी ले हुन मन चो किरिया चो देश तक इसराएली मन चो अगुवाई करलो।