14. राने बूलाक तोर

महा परबु इसराएली लोग मनके हुन नियम के सांगतोर सारलो जोंन हुनचो करलो बादा चो कारन पालन करतोर आय। फेर हुन सिने डोंगरी चो पुरे हुनचो अगुवाई करलो। हुन हुनके बादा चो देश ने नेतो काजे चाहते रलो। उन देश के कनान बले बोलू आत। महा परबु बादरी चो खम्बा ले हुन मन चो पुरे-पुरे गेलो, आउर इसराएली मन हुनचो पाट-पाट गेला।

महा परबु अब्राहम, इसहाक आउर याकूब संगे बादा करू रये कि हुन बादा चो देश के हुन चो बंश लोग मनके देयदे, मानतर हुता खुबे जाति चो लोग रओत। हुन मनके कनानी बलते रओत। हुन कनानी लोग मन महा परबु चो आराधना नी करते रओत आउर उन मन उन चो नियम के नि मानते रहोत। हुन मन झूठा देवता चो पूजा-पाठ करते रहोत, आउर खुबे गलत बुता करते रओत।

महा परबु इसराएली मनके बललो, "जिदलदाय तुमी बादा चो देश ने जाहासे तो हुताचो सब कनानी मनले छुटकारा पाहासे। हुन मन संगे संगती नी करा। आउर हुन मन संगे बिया नी हुआ। तुमके हुनचो सब मूर्ति मनके अच्छा ले नाश करतो, यदि तुमि मोचो गोट के नी मानास तो तुमि मोचो जागा हुन मन चो देवता मन चो आराधना आउर उपासना करासे।

जिदलदाय इसराएली मन कनान चो संधि ने अमरला, मूसा इसराएली चो सब कुटम परिवार ले गोटक-गोटक बारह मनुक मनके चुनलो। हुन जाहुन देश चो हाल चाल जानतो काजे हुकुम दिलो, दकुन दका की हुन कसन देश आय। हुन मन के हुन कनानी लोग मन चो बले हाल चाल धरतोर रये, की दका की हुन मन ताकतवर असोत या कमजोर असोत।

हुन बारह लोग मन सब कनान बाटले चालीस दिन तक हिंडला, आउर फेर हुन मन आपस इला। हुन मन लोग मन के सांगला, "हुन देश खुबे उगतो भुई आय आउर फसल खुबे करलासे!" मानतर दस भेदी मन बलला, "हुन मन चो नगर खुबे मजबुत आसे आउर हुन मन खुबे लम्बा चौड़ा आत! यदि हामी हुन मन चो संगे लडूआँ तो हुन मन हामके हरादे आउर हामके मारुन देदे।"

जेटके कालेब आउर यहोशु आउर दूसरा दूय झन बलला, "ए सत्ते आय की कनान चो लोग मन लम्बा आउर शक्तिशाली आत, मानतर हामी सत्ते हुन मन के हराऊक सकुंदे! महा परबु हामचो काजे लड़दे।"

मांतर लोग मन कालेब आउर यहोशू चो नी सुनला। हुन मन मूसा आउर हारून चो उपरे रिस होला आउर बोलला, "तुमी हामके ए डरावनी जगा ने काय काजे आनलासास? हामके मिसर ने ची रतोर रये। यदि हामी हुन देश ने गेलु जाले हामी लड़ाई ने मोरुन जाऊनदे, और कनान मन हामचो बायले आउर पिला मनके कमिया बनादे।" हुन मन आपस मिसर ने नेतो काजे गोटोक दूसरा अगुवा के चुनुक चाहते रला।

जिदलदाय हुन लोग मन असन बलला तो महा परबु हुन मन के खुबे रिस होलो। हुन मिलाप चो तंबू ने ईलो आउर बललो, "तुमि मोचो बिरुद्ध धोखा करलास, हुनि काजे तुमके जंगल ने भुलका से। हर एक लोग मन जोन बीस बरस ले अधिक बरस चो लोग आत सबु मोरदे, आउर केबी बले हुन देश ने जाउक नी सकदे जोन में तुमके देयसे। केवल कालेब आउर यहोशू उन थाने जाउक सकदे।"

जिदलदाय लोग मन महा परबु चो असन बलते सुनला तेबे हुन मन दुखी होला कसन बलले हुन मन पाप करू रला। हुनी काजे हुन मन कनान चो लोग मनके मारतो काजे तियार होला। मूसा उन मनके नी जातो काजे सान्गलो कसन बलले महा परबु हुन मन संगे नी जाए; मानतर हुन मन हुनचो नी सुनला।

महा परबु ए लड़ाई ने हुन मन संगे नी गेलो, हुनी काजे कनानी मन हुन मनके हराउन दिला। आउर हुन मन थान ले खुबे लोग के मारला। तेबे इसराएली लोग मन कनान ने आपस इला। एतो चालीस बरस तक, हुन मन जंगल ने भूलक दे।

इसराएली लोग मन चो जंगल ने भटकतो चालिस बरस ने, महा परबु हुन मन चो जरूरत के पूरा करलो। हुन मनचो काजे सरग ले "मन्ना" बलतो बिती रोटी मन के दिलो। हुन लावा चो झुण्ड के बले हुनचो लगे पटालो ताकि हुन मन लगे खातो काजे मास हो। हुन पूरा बेरा महा परबु हुन मन चो फोटही आउर जूता के फटतो ले बचालो।

एता ले बले की महा परबु हुन मनचो पितो काजे चमत्कार करून चट्टान ले पानी निकरालो। मांतर इतलो ने बले, इसराएली लोग मन महा परबु चो बिरुद् आउर मूसा चो बिरुद् सांगला आउर लड़ला तेबे बले महा परबु विसवास योग्य रये। हुन जोन बादा करू रये की हुन अब्राहम, इसहाक, आउर याकूब चो लोग मन काजे करेदे, हुन हुनी पूरा करलो।

आउर गोटोक बेरा हुन मनचो लगे पानी नी रेए, महा परबु मूसा के बललो, "चट्टान ले गोठियाव, उन थानले पानी निकरेदे।" मानतर हुन चट्टान के बड़गा ले दुय हार मारलो। हुनी रीती ले हुन महा परबु चो गोट के नी मानलो, सब चो पितो काजे चट्टान ले पानी निकरली। मान्तर महा परबु मूसा के रिस होलो। हुन बललो, "तुई असन कसन करलीस तुई हुन बादा चो देश ने जाउक नी सकिस।"

इसराएली लोग मन चालीस बरस ले हुन जंगल ने भटकु रला, तेबे हुन मन महा परबु चो बिरुद्ध पाप करू रला हुन सब लोग मन मोरु रला। तेबे महा परबु हुन मन के फेर ले हुन बादा चो देश ने सिखाओत ले नेऊ रये। एदाय मूसा खुबे डोकरा होऊ रये, हुनी काजे हुनी महा परबु लोग मन चो अगुवाई करतो काजे हुन मन चो सायता करतो काजे यहोशू के चुनलो। महा परबु मूसा के ए बले बादा करू रये कि गोटोक दिन हुन मन लगे मूसा चो असन अगमजानी पटाएदे।

तेबे महा परबु मूसा के गोटोक डोंगरी चो चोटी ने जाउक बललो, ताकि हुन बादा चो देश के दकुक सको। मूसा हुन बादा चो देश के दकुक सकलो मानतर महा परबु हुनके हुन थाने जातो काजे नी दिलो। तेबे मूसा मरलो आउर इसराएली मन तीस दिन तक दुःख करला यहोशू गोटोक अच्छा अगुवा रये, कसन बलले हुन महा परबु के भरोसा करलो आउर हुनचो गोट के मानलो।