16. छुडातो बिता

यहोशू चो मरलो पाचे, इसराएली मन महा परबु चो आज्ञा के उलघन करला। हुन मन महा परबु चो नियम के पालन नी करला, आउर हुन मन हुन बादा चो देश ने बाचलो कनानियो मनके बाहरे नी निकराला। इसराएली मन आपलो सत महा परबु यहोवा के छाडून कनानि मन चो देवता मन चो उपवास करतो शुरू करला। इसराएली मन लगे कोनी राजा नी रये, हुनी काजे जोंन सत लागली हुनी करला।

महा परबु चो गोठ नी मानलो कारन इसराएली मन गोटोक नियम के शुरू करला जोंन के खुबे हार दोहरालोर रये। हुन नियम असन परकार ले चलते रये: खिंडीक बरस तक इसराएली मन महा परबु चो नियम के नी मांदे, तेबे हुन उन मन के आपलो दुश्मन मन ले हारान बाती दण्ड देयदे। हुन दुश्मन मन इस्राएली मन चो तीज के लुट पाट करदे, हुनचो धन के नाश करदे आउर हुताले खुबे लोग मनके मारुन देदे। फेर इसराएली मन चो शत्रु हुन मन थाने खुबे बरस तक आत्याचार करदे, हुनचो पाचे इसराएली मन आपलो पाप चो पछताप करदे आउर महा परबु ले बाचतो काजे पारथना करदे।

सबु हार जिदलदाय इसराएली मन पछताप करदे तेबे महा परबु हुन मन के बचाय दे। हुन गोटोक बचातो बिताचो द्वारा असन करेदे। गोटोक असन माने हुन मन चो शत्रु चो बिरुद्ध लड़ेदे आउर हुनके हारायदे। तेबे देश ने शांति होयदे, आउर हुन बचातो बिता हुनचो उपरे अच्छा ले राज करेदे। महा परबु हुन लोग मनके बचातो काजे खुबे असन बचातो बिता मन के पोटालो। महा परबु लगले गोटोक शत्रु जाती मिधानी मन चो द्वारा इसराएली मनके हरातो ले असन करला।

मिधयानी मन सात बरस तक इसराएली मन चो खेती बाड़ी चो फसल के काटला। इसराएली लोग मन खुबे डरु रला, आउर हुन मन करपन ने लुकला की मिधयानी लोग मन खोजुक नी सकदे बोलून। मानतर हुन मनके बचातो काजे महा परबु के विनती करला।

गिदोन नाव चो गोटोक इसराएली मनुक रये। गोटोक दिन, हुन सुनसान जगा ने गेहू पीटते रये ताकि मिद्दानी लोग मन चोरुख नी पावोत। महा परबु चो सरगदूत मन गिदोन लगे एउन हुनके बलला, "की ए शूरवीर सुरमा, महा परबु तुचो संगे आसे। जा आउर इसराएली मनके मिद्दानि लोग मन ले बचाव।"

गिदोन चो बुआ लगे गोटोक मूर्ति काजे वेदी रये। सबले पहला काम जोन के महा परबु गिदोन के करतो काजे सांगू रये हुन वेदी के टूटातो रये। मानतर गिदोन लोग मन चो ले डरते रये, हुनि काजे हुन राती होतो काजे टाकू रये। तेबे हुन उन वेदी के टुटाउन बाती गोंदा-गोंदा करलो। हुन महा परबु काजे गोटोक नुआ वेदी बनालो आउर हुता महा परबु काजे जतरा चेगालो ।

दूसर दिन बियाने लोग मन दकला की कोनी हुन वेदी के टुटान गोंदा-गोंदा करून दिला से, हुनी काजे हुन मन खुबे रिस होला। हुन मन गिदोन के मारतो काजे हुनचो घरे गेला, मानतर गिदोन चो बुआ बललो, "तुमि काय काजे तुमचो देवता चो सायता करतो काजे होयसास? यदि हुन सत्ते देवता आय आले हुन आपलो देख भाल खुद करुक दियास!" हुन असन बललो हुनी काजे लोग मन गिदोन के नी मारला।

तेबे इसराएली मनके झीका उड़मा करतो काजे मिद्दानी लोग मन फेर ले इला। हुन मन खुबे लोग रओत की हुन मन के गिनुक बले नी होते रये। गिदोन हुन मन चो बिरुद्ध लड़तो काजे इसराएली मनके गोटोक संग हाग दिलो। गिदोन मापरु के दूई चिन मांगलो कसन बलले हुनके विसवास होओ महा परबु सते हुनके इसराएली मनके बचातो काजे संगे रये।

पहला चीन काजे, गिदोन मेंड़ी चो ऊन के भुई ने संगाउन महा परबु के बललो, की बियान चो ओस केवल मेंढी चो ऊन थाने पड़ो आउर भुई ने नी पड़ो। महा परबु असनी करलो। दूसरा राती, हुन महा परबु के बललो, "भुई गिला होवो मांतर मेंढी चो ऊन सुकु रहो। महा परबु असन बले करलो। ए दुय चीना चो कारन गिदोन विसवास करलो की महा परबु सते चाहा आऊ आय की हुन इसराएली मनके मिद्दानी मन ले बचाय दे।

तेबे गिदोन सेना मन के अपलो लगे हाग दिलो आउर 32,000 मनुक इला। मानतर महा परबु बललो ऐ मन खुबे आसेत। हुनि काजे गिदोन 22,000 लोग मन के घरे आपस पटालो। जोन मन लड़तो काजे डरते रओत। महा परबु गिदोन के फेर बललो की ए मनुक मन एबे बले खुबे आधिक असोत। हुनी काजे गिदोन 300 सेना मनके छड़लो आउर हुन सब के घरे पठालो।

हुन राती महा परबु गिदोन के बललो, "मिद्दानी मन चो छावनी ने जा आउर हुन मन चो गोटया तो के सुन। कि हुन मन काय-काय गोटियादे, तुय सुनसे तो हुन मन के मारतो ले नी डरसे।" हुनी काजे हुनि राती, गिदोन खाले हुन मन चो छावनि ने गेलो; आउर गोटोक मिद्दानी सेना के आपलो संगवारी के हुन गोट सांगतो बेरा सुनलो जोन के हुन सपना ने दखु रये। ऐ सपना चो अर्थ आय की गिदोन चो सेना हामी मिद्दानी मन के हारा दे!" जिदलदाय गिदोन ए सुनलो तो हुन महा परबु चो धन्यवाद करलो।

तेबे गिदोन आपलो सेना मन लगे इलो, आउर हुता ले सबके गोटोक-गोटोक नरसिंगा, गोटोक माटी चो पात्र, आउर गोटोक मशाल दिलो। हुन मन उन छावनि के घेरला जोन थाने मिद्दानी सेना मन सोते रओत। गिदोन चो 300 सेना मन आपलो मशाल के माटी चो पात्र ले ढाकलोर रये, हुनी काजे मिद्दानी लोग मन हुन मशाल चो उजर के नी दकुक सकला।

तेबे गिदोन चो सब सेना मन आपलो पात्र के गोटोकी बेरा ने टुटाउन उदापड़े मशाल चो जोय के दकाऊन दिला। हुन मन आपलो-आपलो नरसिंगा मन के फुंकला आउर चिचयावला यहोवा चो बाटे गिदोन चो तलवार।"

महा परबु मिद्दानी मनके डराउन दिलो, हुनि काजे हुन मन गोटोक दुसर के मार-काट करते रहोत। जेटके ले, गिदोन खबर देतो बीता मन के खुबे दुसर इसराएली मनके मिद्दानि मन चो पीछा करतो काजे हुन मन चो सायता करतो काजे हाग देतो काजे पटायलो। हुन मन हुन लोग मन ले खुबे लोग मारुन दिला आउर बाकी लोग मन चो पीछा करून हुन मन के इसराएली देश ले निकराउन दिला। हुन दिन 1,20,000 मिद्दानी के मारला असन परकार ले महा परबु इसराएली के बाचालो।

हुन मन गिदोन के आपलो राजा बनाउक चाहते रला, मानतर गिदोन असन होउक नी दिलो, मांतर हुन उन मन ले सोना चो आभूषण के मांगलो; जोन कि सबु लोग मन मिद्दानि मन ले लुटू रहोत। हुन मन गिदोन के खुबे सोना दिला।

तेबे गिदोन सोना के पिनतो बीती वस्त्र बनालो जसन कि महाराजा मन पिन्दते रहोत। मांतर लोग मन हुनचो पूजा पाठ करुक मुरयाला, जसन की मूर्ति असन। तेबे महा परबु इसराएली मन के फेर दंड दिलो, कसन बलले हुन मन मूर्ति चो उपासना करु रला। महा परबु हुन मन चो शत्रु मनके जीत तो काजे मदद करलो। आउर हुन मन फेर ले महा परबु ले सायता काजे पारथना करला, आउर महा परबु हुन मन के बचातो काजे आउर फेर छुड़ातो काजे गोटोक माने के पटालो।

ए गोट खुब हार घटली, इसराएली मन पाप करदे, महा परबु हुन मन के दण्ड देयदे, हुन मन पश्चाताप करदे, आउर महा परबु हुन मन के छुड़ातो काजे कोनी माने के पटायदे। कई बरस तक, महा परबु खुबे बाचातो बीता मन के पटालो जोन कि इसराएली मनके हुनचो शत्रु मन ले बचाला।

आखिर ने, हुन लोग मन दुसर देश चो असन महा परबु ले आपलो काजे गोटोक राजा चो मांग करला। हुन मन गोटक असन राजा के चाहते रला की उन शक्तिशाली आउर ढेंगा हो, आउर लड़ाई ने हुन मन के अगुवाई करो। महा परबु के ए गोट पसंद नी इली, मांतर उन हुन मनके असनी राजा के दिलो, जसंन राजा हुन मन चाहते रला।