17. दाउद संग महा परबु वादा

शाउल इसराएली चो पहिला राजा रलो। हुन डेंग आउर सुन्दर रलो, जसन लोग मन चाहते रला असनी। इसराएली देश ने हुनचो राज करतो आगे, कुछ बरस तक शाउल अच्छा राजा रलो। मानतर खिंडिक बरस पाचे हुन शाउल खराब माने बनलो, हुन महा परबु चो गोट नी धरलो, हुनी काजे महा परबु गोटोक दुसर माने के चुनलो ताकि गोटोक दिने उन चो जगा ने राजा बने दे।

महा परबु दाऊद नाव चो गोटोक जुआन इसराएली माने के चुनुन बाती गोटोक दिन शाहुल चो जगा ने राजा होतो काजे हुनके तियार करुक मुरयालो। दाउद बेतलहम नाव चो नगर चो गोटोक छेरी मेंडी चरातो बिता धोरिई रलो। कई बरस पहले दाउद बाग आउर भालू दुनो के मारु रलो, कसन बले हुनचो बुआ चो छेरी मेंडी के चरातो बेरा बागआउर भालू मन खातो काजे हमला करून रला। दाउद सीदा सादा आउर धरमी माने रलो। हुन महा परबु थाने भरोसा करलो आउर हुनचो गोट के मानलो।

दाउद एबे जुवान माने ही रलो, हुन ढेंग-ठोसर गोलियत चो बिरुद ने लड्लो। गोलियत गोटोक अच्छा सैनिक रये। हुन खुबे ठोसर आउर छय हाथ गोटोक बीतता चो ढेंग रलो! मांतर महा परबु गोलियत के मारतो काजे आउर इसराएली मन के बचातो काजे दाउद के मदद करलो। हुनचो पाचे, दाउद इसराएली मन चो शत्रु मन चो उपरे खुबे हार जीतलो। दाउद गोटोक बड़े सेना बनलो, आउर हुन खुबे लड़ाई मन थाने इसराएली लोग चो अगुवाई करलो। आउर हुनी लोग मन हुन दाउद के खुबे प्रसंशा करला।

लोग मन दाउद के ईतलो मया करला कि शाउल दाउद के रिस होउक मुरयालो। आउर शाउल दाउद के मारतो काजे बिचार करलो, उनी काजे दाउद शाउल आउर हुनचो सैनिक मन ले लुकतो काजे रान भीतरे पोरालो। गोटोक दिन, शाउल आउर हुनचो सैनिक मन दाउद के खोजुक गेला, आउर शाउल गोटक रान भीतरे गेलो जोन थाने दाउद लुकु रये। मानतर शाउल नी दकलो। दाउद पाट कुती ले हुन चो लगे गेलो आउर शाउल चो फटही के खिंडीक गोंदा करलो। पाचे, शाउल उन थान ले निकरलो तो दाउद जोर ले चिचयाउन फटही के दकालो। असन प्रकार ले, शाउल जानलो कि, दाउद राजा बनतो काजे शाउल के मारतो नो इनकार करलो।

खूब दिन चो पाचे, शाउल लड़ाई ने मोरलो, आउर दाउद इसराएली देश चो राजा बनलो। हुन गोटोक अच्छा राजा रये, आउर लोग मन हुनके मया करला। महा परबु दाउद के आशीर्वाद दिलो आउर अच्छा बनालो। दाउद खुबे लड़ाई मन लड़लो, आउर महा परबु इसराएली चो शत्रु मनके पराजित करतो काजे हुन मनके सायता करलो। आउर दाउद यरूशलेम के जितुन हुनके राजधानी बनालो। आउर उन हुनि थाने रहून राज करलो। दाउद चालीस बरस तक राजा रलो। हुनी बेरा, इसराएल सामर्थी आउर धनी देश बनली शांति।

दाउद गोटोक मन्दिर बनाउक चाहते रये, जोन थाने इसराएली लोग मन सबु महा परबु चो आराधना करुक सकदे आउर हुनचो काजे जत्रा दान चेगा तो काजे। लगभग 400 बरस ले, हुन लोग मन मूसा चो बनालो मिलाप बीती तम्बू ने महा परबु चो आराधाना करते रओत, आउर हुनचो काजे जत्रा दान चेगाते रओत।

मानतर हुन थाने नातान नाव चो गोटोक अगमजानी रये। महा परबु हुनके दाउद के ए सांगतो काजे पटालो: "तुई खुबे लड़ाई के लड़ली सिस, हुनी काजे तुई मोचो काजे ए मंदीर के नी बनासे।तुचो बेटा एके बनाय दे। तेब ले बले, मय तुके खुबे आशीर्वाद देंयेंदे। तुचो गोटोक बंश जुग-जुग काजे मोचो लोग मन लगे राजा चो रूप ने राज करेदे।" जुग-जुग काजे राज करतो बिता हुन दाउद चो गोटोक बंश मसीह रये। मसीह महा परबु चो चुनलो मनुक रये, जोन मंजपुर चो लोग मनके हुन मन चो पाप ले बचाय दे।

जिदलदाय दाउद नातान चो ए गोट के सुनलो तेबे महा परबु चो धन्यवाद करलो आउर हुनचो स्तुति करलो। महा परबु हुनचो मान समान के बड़ाते रये, आउर हुनके खुबे आशीर्वाद देते रये। मानतर दाउद नी जानते रये की महा परबु ए गोट मनके केबे करेदे। ए बेरा हामी जानु से की इसराएली मनके खुबे बेरा ले, लगभग 1,000 बरस तक मसीह के एतो चो बाट दकुक पड़ेदे।

दाउद खुबे बरस ले धरम ले आपलो लोग मन लग राज करलो। हुन बड़े भक्ति ले महा परबु के मानलो। आउर महा परबु हुनके आशीषित करलो। मानतर, आपलो जीवन चो आखिरी ने हुन महा परबु चो विरुद ने भयानक पाप करलो।

गोटोक दिन दाउद आपलो महल ले बाहरे निहार लो, आउर गोटोक सुन्दर बायले के नहातो बेरा दकलो। हुन मन के नी जानते रये, मानतर हुन पता करलो की हुनचो नाव बेतशेबा आय।

आपलो नजर के फिराउक छांडून, दाउद हुनके आपलो लगे आनतो काजे गोटोक मनुक के पटालो। हुन हुनचो संगे सोहलो आउर हुनके आपस घरे पटाउन दिलो। खिंडीक समाया पाचे बेतशेबा ए बोलून दाउद लगे चिटठी पटाली की हुन देहबारी आसे।

बतशेबा चो मनुक उरिय्याह नाव चो गोटोक मनुक रये। उन दाउद चो सबले अच्छा सेना मन ले एकला रये। हुन बेरा उन लड़ाई ने जाऊ रये। दाऊद उरिय्याह के लड़ाई ले आपस हाग देऊन हुन आपलो बायले संगे रतो काजे बललो। मानतर आदो सेना मन लड़ाई ने रओत, हुनी काजे उरिय्याह घरे जातो काजे मना करलो। तेबे दाऊद उरिय्याह के आपस लड़ाई ने पटालो। आउर सेना मन चो मुख्या के सांग्लो कि उन के लड़ाई चो असन जगा ने रतो काजे बललो, "जहाँ शत्रु मन सब ले ताकतवर होओत ताकि हुन लड़ाई ने मोरो।" तेबे असनी होली की उरिय्याह लड़ाई ने मोरलो।

उरिय्याह लड़ाई ने मोरलो चो पाचे, दाउद बतशेबा संगे बिया होलो। पाचे, हुन दाउद चो बेटा के जनम दिली। दाउद जोन करलो हुनचो ले महा परबु खुबे रिस होलो, हुनी काजे हुन नातान अगमज्ञानी के दाउद के ए सांगतो काजे पटालो की हुनचो पाप कितरो गलत रये। दाउद आपलो पाप चो पछताप करलो आउर महा परबु हुनके क्षमा करलो। आपलो बाचलो जीवन ने, आपलो कठिन समया ने बले दाउद महा परबु चो पाट-पाट हिंडलो आउर हुनचो गोट के मानलो।

मानतर दाउद चो बेटा मोरलो। असन रीती ले महा परबु दाउद के दण्ड दिलो। एके छाडून, दाउद चो मोरतो तक, हुनचो आपलो परिवार चो आदो लोग मन दाउद चो बिरुद्ध लड़ाई करला, आउर दाउद चो आपलो ताकत कम होऊ रये। मानतर महा परबु बिसवासयोग्य रये, आउर एबे बले हुन हुनी करलो जोन हुन दाउद के करतो काजे बादा करू रये। पाचे, दाउद आउर बतशेबा चो दुसरा बेटा जनम होलो आउर हुन मन हुन चो नाव सुलैमान संगाला।