18. अलग होलो राज

दाउद राजा चालीस बरस तक राज करलो। तबे हुन मोरलो, आउर हुनचो बेटा सुलैमान इसराएली मन लगे राज करतोर शुरू करलो। महा परबु सुलैमान चो संगे गोठयालो आउर हुनके पुछलो की तुय सबले अधिक काय के मन करुवास? की महा परबु हुनचो काजे करो। सुलैमान महा परबु के मांगलो की हुन हुनके खुबे बुद्धिमान बनाउन देवो। ए गोट ने महा परबु हरिक होलो, हुनि काजे महा परबु सुलैमान के मंजपुर चो सबले अधिक बुद्धिमान मनुक बनान दिलो। सुलैमान खुबे गोट के सिकलो आउर हुन गोटोक बुद्धिमान राजा रये। आउर महा परबु हुनके खुबे धनवान बनाउन दिलो।

यरूशलेम ने सुलैमान हुन मंदिर के बनालो जेचो काजे हुनचो बुआ योजना बनाऊन रये, आउर समान आनुन रये। एबे लोग मन मिलाप चो तंबू चो जगह के छाडून मंदिर ने महा परबु चो आराधना करते रओत, आउर हुनचो काजे जत्रा दान चेगाते रओत। महा परबु एवुन मंदिर ने रते रये, आउर हुता आपलो लोग मन संगे रते रये।

मानतर सुलैमान दुसरा देश चो बायले मन के मया करलो। हुन खुबे, लगभग 1,000 बायले मन संगे बिया होउन महा परबु चो आज्ञा के नी मानलो, एता ले आदो बायले मन दुसरा देश ले ईला आउर आपलो संगे आपलो देवता मन के आनला। आउर हुनचो उपास रतो शुरु करला। तेबे सुलैमान डोकरा होलो हुन बले हुन मनचो देवता चो उपास करलो।

हुनी काजे महा परबु सुलैमान संगे रिस होऊ रये। हुन सांगलो की इसराएल देश के दुय राज्य बनातो ले दण्ड दिवाय। हुन सुलैमान चो मोरलो पाचे असनी करेदे।

सुलैमान चो मोरतो के, रह्बाम राजा बनलो। इसराएली देश चो सबु लोग मन हुनके आपलो राजा मानतो काजे रुंडला। हुन मन रह्बाम के सांगला, सुलैमान हामके खुबे डण्ड बुता करालो आउर खुबे उसिल करते रये, हुन मन रह्बाम के सांगला की हामके कम बुता कराव।

मानतर रह्बाम हुन मन के खुबे रिस ने बललो, "तुमी सांगसास की मोचो बुआ सुलैमान तुमके डण्ड बुता करालो।" मानतर मय तुमके हुनचो ले अधिक दण्ड बुता करायेंदे आउर मय तुमके हुनचो ले अधिक डण्ड करूवाय।

जिदलदाय लोग मन असन बोलतो समया सुनला तो खुबे रिस ने बिरुद करला। आउर दस कुटुम परिवार उनके छांडला; एबे उनचो संगे दुय कुटुम परिवार बाचला। हुन मन उन याहुदा चो राज बलला।

आदो दस कुटुम परिवार यारोबाम नाव चो गोटोक मनुक के आपलो राजा बनाला। ए कुटुम देश चो उत्तर दिशा ने हुन मन खुद के इसराएल चो राज मानला।

मानतर यारोबाम महा परबु चो बिरुद बुता करलो, आउर लोग मनके पाप करालो। हुन आपलो लोग मन चो द्वारा उपास करतो काजे दुय ठन मूर्ति बनालो। एमन एबे यहूदा चो राज ने यरूशलेम ने, महा परबु चो मंदिर ने आराधना करूक लाय नी गेला।

यहूदा आउर इसराएली चो राज दुश्मन बनला, आउर गोटोक दुसर चो बिरुद्ध लड़ाई करुक मुरयाला।

इसराएली चो नुवा राज ने, सबु राजा दुष्ट रओत। एमन थान ले आदो राजा मन हुन मन चो जगा ने राजा बनतो काजे होते रहोत, हुन लोग मनके दूसरा इसराएली मन चो हाथे मराला।

इसराएली राज चो सबु राजा मन आउर हुन लोग मन मूर्ति चो उपास करला। जिदलदाय हुन मन असन करला तेबे अधिक बेबिचारिनी मन संगे सोहला, आउर खुबे आउर मूर्ति मन चो लगे पिला मनके जतरा जत्रा बले करला।

यहूदा राज चो राजा, दाउद चो पुरखा चो रओत। ऐ राजा मन थानले आदो अच्छा लोग रओत, जोन अच्छा ले राज करला। आउर महा परबु चो आराधना करला, मानतर यहूदा चो आदो राजा मन दुष्ट रओत। हुन मन दुष्टता ले राज करला आउर मूर्ति मन चो उपास करला। एथाले कि एमन थानले आदो राजा मन पिला मनके झूठा देवता चो पुरे जत्रा करला। यहूदा चो आदो लोग मन बले महा परबु चो बिरुद काम करला आउर दुसरा देवता चो उपास करला।