19. अगमज्ञानी

महा परबु सब समया इसराएली मन लगे अगमज्ञानी मन के पटाते रलो। अगमज्ञानी मन महा परबु चो गोट के सुनते रला आउर लोग मनके सांगते रओत।

जिदलदाय अहाब इसराएल राज ने राजा रलो हुनी समया ने एलिय्याह अगमज्ञानी रलो। अहाब खराब माने रये, देवता के मानतो काजे लोग मनके बिबश करते रलो। हुनी काजे एलिय्याह अहाब के बललो, "महा परबु हुनलोग मनके डण्ड देतो काजे जाते रये। हुन हुनके बललो, “जिदलदाय ले पानी ऐतो काजे नी बलें तेबे तक इसराएल राज ने बरसा नी होए, आउर ना ओश बले घसरे दे।" ए गोट अहाब के इतलो रीस दिली कि हुन एलिय्याह के मारतो बिचार बनालो।

ऐइ काजे एलिय्याह के महा परबु बललो, "की जंगल ने जाऊन आहाब ले लूकुन रा। एलिय्याह हुन जंगल ने नदी लगे गेलो जोन थाने महा परबु बोलून रये। रोजे बियाने आउर सांजे कांवा मन एलिय्याह काजे रोटी आउर मांस धरून ऐते रओत। हुन बेरा आहाब चो सैनिक एलिय्याह चो पीछा करते रओत मानतर नी भेटुक सकते रोओत।

बरसा नी होतोर लागुन खिंडीक समया पाचे हुन नदी सुकून गेली। ऐइ काजे एलिय्याहह लगे चो देश ने जाते गेलो हुन देश ने गोटोक गरीब बिधवा बायले रये। जेचो गोटोक बेटा रये, हुन मन लगे खातो समान लगभग सरासरी होउन रये। कसन बल्लोने हुता काई फसल नी होऊ रये, मानतर फेर बले हुन बायले एलिय्याहह चो देक-रेक करली। एइ काजे महा परबू हुनचो आउर हुनचो बेटा मन चो जरुरत मन के पूरा करलो, एई कारन हुनचो आंटा चो भंडवा आउर हुनचो तेल डब्बा केबइ खाली नी होली, आउर पूरा भुकमरी चो समया हुनमन लगे खातो समान रये, एलिय्याहह खिंडीक बरस हुता रलो।

साढ़े तीन बरस चो पाचे, महा परबू एलिय्याहह ले बललो कि हुन फेर ले बरसा करेदे। हुन एलिय्याह के फेर ले इसराएल चो देश ने जाउन आहाब के गोटयातो काजे बललो। एइ काजे एलिय्याह आहाब लगे गेलो, जिदलदाय आहाब हुनके दकलो तो हुन हुनके बललो, "अच्छा तुय आस परेशानी उपजास करू बिता। एलिय्याह जबाप दिलो परेशानी उपजास करू बिता तो तुय आस। तुय महा परबू के छांडुन दिलीस मान्तर तुय बाल चो पूजा करुआस! ऐदाय तुके इसराएल राज चो सब लोग मन के कार्मेल डोंगरी ने धरून आनतो राय।

आउर सब लोग मन कार्मेल डोंगरी लगे गेला। आउर उन मुनुक मन बले गेला जोन बाल चो खबर के बोलते रला। ए मन बाल चो अगमज्ञानी रला। हुन सबु 450 जन रला। एलिय्याह लोग के बललो, “तुमी केबे तक ले तुमचो मन के फिराउन रउआस? यदि यहोवा महा परबु आय तो हुनचो आराधना करा! आउर अगर बाल महा परबू आय तो हुनचो उपास करा!"

तेबे एलिय्याह बाल चो अगमज्ञानी मन के बललो, "गोटोक हुन मेंढा के मारून हुनचो मांस के जतरा करून बेदी ने सांगआ, मान्तर आइग नी जलाआ। आउर हुनचो बाद मय बले उसनी ची करेंदे, आउर अलग वेदी ने मांस संगायेंदे आउर अगर महा परबु बेदी ने आइग घसरायदे तेबे तुमी जाना से की हुनी सच्चा महा परबु आय। तेबे बाल चो अगमज्ञानी मन गोटोक जतरा करतो काजे तियार करला मानतर आइग नी लगाला।

बाल चो अगमज्ञानी मन प्रार्थना करला, "हे बाल देवता आमचो सुन!" फेर पूरा दिन हुन मन प्रार्थना करला आउर चिचयावला एथाले कि खुद के खडरी संगे काटून बले दिला, मान्तर बाल जबाप नी दिलो आउर हुन आइग नी घसरालो।

बाल चो अगमज्ञानी मन पूरा दिन प्रार्थना करला। आउर आखरी ने हुन मन प्रार्थना करतोर बंद करला। मानतर एलिय्याह दुसर बैला चो मांस के महा परबु चो बेदी ने संगाउन दिलो। आउर हुनचो पाचे, हुन लोग मन के पानी चो बड़े भांडवा के हुन जत्रा चेगालो बीती ने रिकाक बललो, जिदलदायले कि मांस आउर दारु आउर एथाले कि बेदी चो लगे लगे चो पुइतराय भुई भिजुन नी गेली।

तेबे एलिय्याह प्रार्थना करलो हे यहोवा अब्राहम,इसहाक, आउर याकूब चो महा परबू, आमके दकाव कि तुय इसराएल चो महा परबू आस आउर ये कि मय तुचो दास आंय मोके जबाप देस कि ये जानदे कि तुय सत महा परबू आस।

तुरते बादरी ले आइग घसरली आउर हुन मांस, दारु गोटी माटी आउर एथाले कि बेदी चो लगे लगे चो पानी के बले जलान दिली जिदलदाय लोगमनये दकला भुई ने घसरून पड़लाआउर बलला यहोवा ची महा परबू आय, यहोवा ची महा परबू आय।

तेबे एलिय्याह बललो बाल चो गोटोक बले अगमज्ञानी बाचुन नी जाऊक सको, एइ काजे लोगमन बाल चो अगमज्ञानी मन के धरला, आउर हुनमन के हुता ले अलग नेउन हुनमन के मारला।

तेबे एलिय्याह आहाब राजा के बललो, "झटके आपलो घरे पराव कसन बल्लोने बरसा होतो बीती झटके बादरी ढाकेसे।" आउर घोर बरसा शुरू होली, यहोवा हुन सुखा के ख़तम करते रये एचो ले परकट होली कि यहोवा ची सत महा परबू आय।

जिदलदाय एलिय्याह हुनचो बुता के सारलो, तो महा परबु एलिशा नाव चो गोटोक मुनुक के हुनचो अगमज्ञानी होतो काजे चुनलो। महा परबु एलिय्याह चो माध्याम ले खुबे चमत्कार करलो। गोटोक चमत्कार नामान संगे होली, आउर हुन शत्रु चो सेनिक चो सरदार रलो। मातर हुनके चामड़ी चो गोटोक रोग होउन रली! नामान एलीशा चो बारे ने सुनुन रलो। हुनी काजे हुन एलीशा लगे ईलो आउर हुनके चंगा करतो काजे बिनती करलो। एलीशा नामन ले बललो, यर्दन लंदी चो पानी ने सात हार बुडून निकर।

नामान रिस होलो, हुन असन करतो काजे मना करलो कसन बल्लो ने ये हुनके बोया मन चो बुता माहा लागते रये। मान्तर पाचे हुन आपलो मन के बदललो,आउर जाउन यरदन लंदी चो पानी ने सात हार बुडून निकरलो। जिदलदाय हुन आखरी दाय पानी ले बाहर निकरलो तो महा परबू हुनके चेंगा करलो।

महा परबु इसराएल चो लोग मन चो लगे खुबे अगमज्ञानी मन के पटालो। हुन मन मूर्ति मन चो आराधना बन्द करतो काजे बलला। एचो पलटा हुनमन के गोटोक दुसर संगे अच्छा ले बरताव करतोर आय। आउर गोटोक दुसर उपरे दया करतोर आय, हुन अगमज्ञानी मन लोग मन के चेताला कि हुन मन के गलत काम मन करतोर छांडून देतो राय। आउर एचो बदला ने महा परबू चो गोट मन चो पालन करतोर आय। अगर हुन लोग मन असन नी करदे तो महा परबू हुनमन के दोषी मानून हुनमन चो नियाय करेदे आउर हुनमन के डण्ड देयदे ।

खूब समया तक हुन लोग मन महा परबू चो गोट के नी मानला। हरमेशा हुनमन अगमज्ञानी मन संगे गलत बेबार करला, ये थाले कि केबे-केबे हुनमन के मारून देओत, एक हर हुनमन यिर्मियाह अगमज्ञानी के सुखा चूआं ने घसराला आउर हुनके हुता मोरतो काजे छांडून दिला। हुन चूआं ने तले चिकल ने धसलो, मान्तर राजा के जिदलदाय हुनचो उपरे दया इली आउर हुन आपलो सेनिक मन के बललो कि यिर्मियाह चो मोरतोर ले पयले हुनके चूआं ले बाहरे झीका।

आगमज्ञानी मन महा परबू चो बाटले बोलतोर नी छांडला। भले लोग मन हुनमन के रिस होला। हुनमन लोगमन के चेताला कि अगर हुनमन नी पासतादे, तो महा परबू हुनमन के नाश करून देयदे। हुनमन लोगमन के ये बले सुरता दियाला। कि महा परबू हुनमन लगे मसीह के पटातो काजे बायदा करलो से।