8. महा परबु यसुफ आउर हुन चो परिवार के बचालो

खुबे बरस पाचे, याकूब डोकरा होऊ रये, तेबे हुनचो लाडरा बेटा यूसुफ के आपलो भाई मन चो जांच करतो काजे पटालो जोन जीवधारी मनके देकरेक करते रओत।

युशुफ चो भाई मन हुनके ईर्ष्या करते रओत, कसन बल्ले उन मन चो बुआ उनके अदिक लाड करते रये। आउर हुनी काजे बले यूसुफ सपना दकु रये की हुन मोन चो अधिकारी होयदेI जिदलदाय यूसुफ हुनचो भाई मन लगे गेलो हुन मन हुनके बंदी बनाला आउर हुन मन कमिया मन चो बेबार करतो लोग मन लगे बिकुन दिला।

घरे बोहडून एतोर पहले यूसुफ चो भाई मन यूसुफ चो फोटही के चिरून बोकड़ा चो लहू ने भीजाउन दिलाI फेर हुन मन सब फोटही के आपलो बुआ के दकाला की हुन असन सोचो कि जंगल चो जीवधारी मन यूसुफ के मारला याकूब खुबे निराश रये।

कमिया मन चो बेबार करतो लोग मन यूसुफ के मिसर देस ने नीला, आउर नील नदी चो लगे बोसलो मिसर देश गोटोक खुबे बड़े, आउर शाक्तिशाली देश रये, हुन कमिया मन चो बेबार करतो लोग मन यूसुफ के गोटोक धनी सरकारी अधिकारी चो कमिया चो रूप ने बिकुन दिलाI यूसुफ आपलो सोवकार चो अच्छा ले सेवा करलो, आउर महा परबु यूसुफ के आशीर्वाद दिलो।

हुनचो राजा चो बायले यूसुफ संगे सोतो काजे कोशिश करते रये, मानतर यूसुफ असन रीती ले महा परबु चो बिरुद पाप करुक नी चाहते रये, हुन बायले रिस होली आउर यूसुफ के झूटा आरोप लगालीI हुनि काजे यूसुफ के मार पेट करतो काजे जेलखाना ने नीला जेल ने बले यूसुफ महा परबु चो परति सत ने रये, आउर महा परबु हुनके आशीर्वाद दिलो।

दुय बरस चो पाचे, यूसुफ एबले बले जेल ने रये, मानतर हुन निर्दोष रये। गोटोक राती फिरौन जसन की मिसरी लोग मन आपलो राजा के हाग देते रओत, हुन दुठान सपना द्कलो, हुन बिती हुनके अधिक भयभीत करलीI हुनचो कोनी सलहाकार हुन सपना चो अरथ नी सांगुक सकला।

महा परबु यूसुफ के सपना चो अरथ सांगतो काजे शक्ति दिलो, हुनि काजे फिरौन यूसुफ के जेलखाना ले आपलो लगे हाग दिलोI यूसुफ हुनके हुन सपना चो अरथ सांगलो आउर बोललो, "महा परबु भरपुर धान-पान कामलोर सात बरस पाचे, सात बरस तक आकाल आनु आयI

फिरौन यूसुफ के इतलो अकसकलो की हुनके मिसर चो दूसरा सबूले शक्तिशाली मनुक बोलुन नियुक्त करलो।

यूसुफ हुन लोग मन चो अच्छा खेती बाड़ी चो सात बरस के खुबे असन धन माल सन्गातो काजे सान्गलोI जेबे सात बरस चो आकाल इली, तो यूसुफ हुन लोग मन लगे आपलो धन के बिखलो कसन बल्ले, हुन लोग मन काजे खुबे खातो काजे रहो।

हुन आकाल मिसर ने ची नुवाय, कनान ने बले बिख्ट रये, जोन थाने याकूब आउर हुन चो परिवार रओत।

हुनी काजे याकूब आपलो बोड़े बेटा मन के खातो काजे गेनुक मिसर ने पटालोI जिदलदाय हुन मन गेनुक यूसुफ चो पुरे ठिया उठला तो हुन मन युसुफ नि चितालाI मानतर यूसुफ हुन मन के चीतलो।

ए मालुम करतो काजे की काय हुन मन बदलला से, हुनचो जांच करलो पाचे यूसुफ हुन मनके बललो, "मय तुमचो भाई यूसुफ आय! नी डराI जिदलदाय तुमि मोके कमिया चो रूप ने बिखु रलास तो तुमि गलत करतो उवाट करू रलास, मानतर महा परबु हुन गलत के अच्छा काजे चुनलो; 'हिया आउर मिसर ने रहा कसन बोलले, "मय तुमचो आउर तुमचो परिवार काजे खातो काजे देऊक सकेंदे।"

जिदलदाय यूसुफ चो भाई मन आपस गेला, आउर आपलो बुआ याकूब के संगला की यूसुफ एबे बले जीव आसे तो हुन खुबे हरिक होलो।

मानतर याकूब डोकरा होऊ रये, "तेबे बले हुन आपलो परिवार संगे मिसर ने गेला आउर हुता बसला याकूब चो मोरतो चो पहले हुन आपलो सब बेटा मनके आशीर्वाद दिलो।

वायदा चो हुन किरिया जोन महा परबु अब्राहम के करू रये फेर इसहाक के आउर हुनचो पाचे याकूब, आउर हुनचो पाचे हुनचो बारह जन बेटा आउर हुनचो परिवार लगे इली हुन बारह बेटा मन चो बोंश इसराएल चो बारह गोत्र बनला।