9. महा परबु मूसा के बुलालो

यूसुफ चो मोरलो पाचे, उनचो लोग बाक मिसर ने बसलाI उन आउर उनचो वंश खुबे बोरोस ले मिसर ने ची रहोत आउर उन मन खुबे पिला जिला पावलाI उन मनके इस्रएली बोलला।

खुबे बोरोस पाचे, इस्रएल मन चो परिवार खुबे होलाI आउर मिसर लोग हेबे ये गोट काजे राजी नी रहोत कि उन मन चो सायता करतो काजे यूसुफ खुबे कायी जायी करु रयेI हुन मन इस्राइली मन संगे डरला, कसन बल्ले हुन मन खुबे रहोत उनी काजे उन बेरा मिसर ने राज करतो बिता फिरौन इस्राइल मनके मिसर चो खमिया बनाउन दिलो।

मिसर लोग मन इस्राइली मनके खुबे असन घर आउर खुबे नगर के बनातो काजे बोललाI "उन कठिन काम उन मन चो जिवान ने खुबे दुःख दायी बनाउन दिली, मानतर महा परबु उन मनके आशीर्वाद दिलो आउर उन मन चो खुबे पिला जिला जन्म होला।

फिरौन दखलो की इस्राएल मनके खुबे पिला जिला जन्म हो सोत, उनी काजे उन आपलो लोग मनके इस्राएल चो सोबु मनुक पिला मनके नील नदी ने फरवाउन मार तो काजे सांगलो।

गोटोक इस्राएली बायले मनुक पिला के जन्म दिली हुन आउर उन चो मनुक जितलो हुन मनके होउक सके उतलो दिन उन पिला के लुखाला।

जिदलदाय हुन पिला चो आया बुआ हुन पिला के खुबे दिन लुकाउक नि सकला, हुनी काजे हुन मन गोटोक पारतो बिती टूकना ने नील नदी रेटे छाड़ुन दिलाI हुनचो बड़े बहिन ए दकतो काजे सोचली की एचो संगे काय होयदे बोलते।

फिरौन चो बेटी हुन टूकना के दकुन हुनचो भीतरे दकलीI तेबे हुन गोटोक पिला के दकली तो हुन पिला के आपलो बेटा समझुन धरलीI आउर गोटोक इसराएली बायले के दुध पियातो बुता काजे संगालीI बिना जाने कि हुन पिला चो माय आय, जिदलदाय हुन पिला बड़े होलो हुन एबे हुनके आपलो माय चो दुध चो जरूरत नी रयेI तो हुनके फिरौन चो बेटी लगे आनुन दिली हुनचो नाव मुसा रये।

गोटोक दिन मूसा बड़े होलो तो हुन दकलो की गोटोक मिसर चो माने इसराएली माने के मारते रये, "मुसा आपलो संगवारी इसराएली माने के बचातो चो कोसीस करलो।

जिदलदाय मूसा बिचार करलो की मोके कोनी नि दकोत बोलून हुन मिसरी के मारलो आउर हुनचो लास के दफनालो, मानतर मुसा जोन करलो हुनके कोनी दकु रयेI

फिरौन के मालूम होली की मुसा ए काय करलो से हुन हुनके मारतो काजे कोशिश करलो, मानतर मुसा मिसर देश चो जंगल ने परालो फिरौन चो सैनिक मन हुनके खोजुक नी सकला।

मिसर चो दूर जंगल ने मूसा गोटोक धोरई बनलो, हुन गोटोक बायले संगे बिया होलो आउर दुई ठन पिला मनके जन्म दिला।

मूसा आपलो सत्तरा चो छेरी बोकड़ी के देक भाल करते रये, गोटोक दिन हुन डसतो रुक के दकलो, जोन भसम नी होलो नाहलो दसते रयेI हुनके दकतो काजे हुन रुक लगे गेलो तेबे हुन अधिक लगे गेलो तेबे महा परबु हुनके गोठीयालो हुन बललो ए मूसा तुचो पाव चो जूता मनके निखराहुन देस, तुई गोटोक पकिजगह ने उबली सीस।

महा परबु बोललो, "मय मोचो लोग मन चो दुःख के दकले से मय तुके फिरौन लगे पटाउवायं। तुई इसराएली मनके मिसर ले निकरावI मय हुन मन के कनान देश देयंदे, हुन देश जोन मय अब्राहम आउर इसहाक आउर याकूब के बादा करू रये।

मूसा पूछलो, "मानतर लोग मन मोके सांगदे कि, तुके कोन पटालो तो मय काय बोलेंदे; महा परबु बोललो, "जोन मय आय हुन आय" हुन मन के सांग मय आय, मोके तुमचो पुरका चो अब्राहम इसहाक आउर याकूब चो महा परबु आय मोचो ए नाव रोजे काजे आय।

मूसा डरते रये आउर फिरौन लगे जाउक नी चाहते रये, कसन बोलले, हुन बिचार करलो की हुन अच्छा ले बोलुक नी सके, हुनी काजे महा परबु मूसा चो भाई हारून के हुनचो सायता काजे पटालो।