22. यूहन्ना के जनम

अतीत मा, परमेश्वर हर अपन भविष्यवक्तामन ले गोठियाए रिहिस ताकि ओमन ओकर मनसेमन ले गोठिया सकेI तब 400 बछर तहाँ मोन धारण के समय आइस जोन मा परमेश्वर हर मनसेमन ले नी गोठियाइसI तहाँ परमेश्वर हर जकर्याह नाम के एक पुरोहित ठीन एक स्वर्गदूत ला भेजिसI जकर्याह अउर ओकर पत्नी एलिशिबा परमेश्वर के आदर करत रिहिनI ओमन बनेच बूढ़े हो गे रिहिन, अउर ओकर कोनो संतान पैदा नी होए रिहिनI

ओ स्वर्गदूत हर जकर्याह ले कहिस, ’’तोर पत्नी के एक बेटा जनम होहीI तें ओकर नाम यूहन्ना राखबेI परमेश्वर ओला पवित्र आत्मा ले परिपूर्ण करिही, अउर यूहन्ना मनसेमन ला मसीह ला ग्रहण करे बर तियार करहीI‘’ जकर्याह हर उत्तर दिस, ’’मैं अउर मोर पत्नी संतान पैदा करेबर बनेच बूढ़ा हन! मैं कइसन जानिहो की आप मोला सच कहथ?’’

ओ स्वर्गदूत हर जकर्याह ला उत्तर दिस, ’’तोर ठी इ शुभ संदेश ला लानेबर मै परमेश्वर के दुवारा भेजे गेहोंI काबर तें मोला विश्वास नी करे, इकरेबर लइका के जनम लेत तक तें बोले बर सक्षम नी होहीI‘’ जल्दी ही, जकर्याह बोले बर असमर्थ हो गिसI तब ओ स्वर्गदूत जकर्याह के लकठा ले चले गिसI इकरे बाद, जकर्याह घर लउट आइस अउर ओकर पत्नी गर्भवती होईसI

जब एलीशिबा छ:ह महिना के गर्भवती रिहिस, तो ओहीच स्वर्गदूत अचानक से एलीशिबा के रिश्तेदार पर प्रकट होईस, जेकर नाम मरियम रिहिसI मरियम कँवारी रिहिस अउर शादी होए बर युसूफ नाम के पुरुष के साथ ओकर मंगनी होगे रिहिसI स्वर्गदूत हर कहिस, ‘’तें गर्भवती होबे अउर एक बेटा ला जनम देबेI तोला ओकर नाम यीशु राखे बर हेI ओ हर सर्व-शक्तिमान परमेश्वर के बेटा होही अउर सदा बर शासन करीहीI’’

मरियम हर उत्तर दिस, ‘’ए हर कैसे होही, काबर की में त कुँआरी हां?‘’ ओ स्वर्गदूत हर समझाईस, ‘’पवित्र आत्मा तोर में आही, अउर परमेश्वर के सामर्थ तोर उपर छाया करिहीI इकरबर ओ शिशु पवित्र होही, अउर ओहर परमेश्वर के बेटा होहीI’’ जोन ओ स्वर्गदूत हर कहिस ओकर ला मरियम हर विश्वास करिसI

ए होए के तुरंत बाद, मरियम हर जा के एलीशिबा ले मुलाकात करिसI जैसे ही मरियम हर ओला परनाम करिस, एलीशिबा के शिशु ओकर भीतर उछलिसI ओकरे बर परमेश्वर हर जो करे रिहिस ओकर बारे मा ओ नारीमन एक संग आनन्दित होइनI एलीशिबा के संग तीन महिना रहे के बाद, मरियम घर लौट गिसI

इकर बाद, एलीशिबा हर आपन बेटा ला जनम दिसI जकर्याह अउर एलीशिबा हर ओ लइका के नाम यूहन्ना राखिन, जेसन की ओ स्वर्गदूत हर आदेश दे रिहिसI तहां परमेश्वर हर जकर्याह ला बोले में सक्षम करिसI जकर्याह हर कहिस, ‘’परमेश्वर की स्तुति हो, काबर की ओहर आपन मनसेमन के मदत करे खातिर स्मरण राखे हे! हे मोर बेटा, तें सर्व-शक्तिमान परमेश्वर के भविष्यवक्ता होबेI तें मनसेमन ला बताबे की ओमन कैसन अपन पाप के खातिर क्षमा प्राप्त कर सकिहीं!’’