24. यूहन्ना यीशु ला बतिस्मा देथे

एलीशिबा अउर जकर्याह के बेटा यूहन्ना, बड़े होके एक भविष्यवक्ता बन गिसI ओ जंगल मा रहत रिहिस, अउर जंगली मंदरस अउर टिड्डीमन ला खात रिहिस, अउर ऊंट के बाल ले बने कपड़ा ला पहनत रिहिसI

बनेच मनसे यूहन्ना के गोठ ला सुने बर जंगल मा निकर आइनI ओहर ओमन ला इ कह के प्रचार करिस, ‘’पश्चाताप करव, काबर कि सरग के राज निकट हे!‘’

जब मनसेमन हर यूहन्ना के संदेश ला सुनिन, त ओमन ले बनेच झन आपन पापमन ले पश्चाताप करीन, अउर यूहन्ना हर ओमन ला बतिस्मा दीसI यूहन्ना ला देखे बर बनेच धार्मिक अगुवामन घोले आइन, परन्तु ओमनहर आपन पापमन ला पश्चाताप या स्वीकार नी करिनI

यूहन्ना हर धार्मिक अगुवामन ला कहिस, ‘’हे जहरीले सांपमन पश्चाताप करव अउर आपन व्यवहार ला बदलवI परमेश्वर सब ओ रुख ला काट डारिही जोन अच्छा फल नी लाए, अउर ओ हर ओमन ला आगि मा झोंक दिहीI‘’ जो भविष्यवक्ता मनहर कहे रिहिन यूहन्ना हर ओला पूरा करिस, ‘’देख, जल्दी ही में तोर आघू मा आपन संदेशवाहक ला भेजिहों जोन तोर बर रस्ता ला बनाहीI‘’

कुछु धार्मिक अगुवामन यूहन्ना ले पूछीन का ओ मसीह हे? यूहन्ना हर उत्तर दिस, ‘’मैं मसीह नी हों, परन्तु ओहर मोर बाद आवत हेI ओहर इतकी महान हे कि मैं ओकर जूता के फीता ला घोले खोले के योग्य नी होंI’’

आने दिन, यीशु बतिस्मा ले बर यूहन्ना ठी आइसI जब यूहन्ना हर ओला देखिस, त ओहर कहिस, ‘’देखव! परमेश्वर के मेमना जोन संसार के पापमन ला उठा के लेजाहीI‘’

यूहन्ना हर यीशु ला कहिस, ‘’मैं तोला बतिस्मा दे के योग्य नी ओंI बजाए इकर आवश्यक हे कि तें मोला बतिस्मा देI‘’ परन्तु यीशु हर कहिस, ‘’तोला मोला बतिस्मा देबर होही, काबर कि करे के खातिर सही काम एहर एI” अतः यूहन्ना हर ओला बतिस्मा दिस, जब कि यीशु हर कभू पाप नीं करे रिहिसI

बतिस्मा देय के बाद जब यीशु पानी ले निकर के बाहर आइस, त परमेश्वर के आत्मा पेरुआँ के रूप माँ प्रगट होईस अउर तरी उतर के ओकर मा रुक गिसI ओइच बेरा, परमेश्वर हर सरग ले गोठीयाईसI ओहर कहिस, ’’तें मोर बेटा असI मैं तोला माया करथों, अउर में तोर ले बनेच खुश होंI”

परमेश्वर हर यूहन्ना ला कहे रिहिस, ‘’पवित्र आत्मा निचे आके काकरो ठी ठहर जाही जोन ला तें बतिस्मा देबेI वही परमेश्वर के बेटा हेI’’ परमेश्वर एक हीच हेI परन्तु जब यूहन्ना हर यीशु ला बतिस्मा दिस, तो ओहर परमेश्वर पिता ला गोईठ करत सुनिस, बेटा परमेश्वर ला देखिस जोकि यीशु हे, अउर ओहर पवित्र आत्मा ला देखिसI