37. यीशु लाजर ला मरे मा ले जियांथे

लाजर नाम के एक मनसे रिहिसI ओकर दुठीन बेहनीमन रिहिन जेकर नाम मरियम अउर मार्था रिहिसI ओमन सब यीशु के घनिष्ट मित्र रिहिनI एक दिन, कोनो हर यीशु ला बताईस कि लाजर बनेच बीमार रिहिसI जब यीशु हर ए सुनिस तहाँ ओ हर कहिस, ‘’ए बीमारी मृत्यु बर नोहे बल्कि परमेश्वर के महिमा बर हे, ताकि मनसेमन परमेश्वर के आदर करिहिंI’’

यीशु अपन मित्र मन ले माया करत रिहिस, परन्तु जोन करा ओ रिहिस ओकरा ओहर दो दिन ले अगोरिसI उ दो दिन के बाद, ओहर अपन चेलामन ला कहिस, ‘’आव, वापिस यहूदा प्रदेश ला चलबोI ‘’चेलामन उत्तर दिन, “परन्तु हे गुरु, अभीच कुछु समय आघू ओठी मनसेमन तोला मार डालेबर चाहत रिहिन!’’ यीशु हर कहिस, ‘’हमर संगी लाजर हर सुतगिसे, अउर मोला ओला जगाना हेI’’

यीशु के चेलामन उत्तर दिन, ‘’हे प्रभु, यदि लाजर हर सुतत हे, त ओहर ठीक हो जाहीI‘’ तहाँ यीशु हर ओमन ला साफ साफ कह दिस, ‘’लाजर मर गिसेI मैं आनन्दित हं कि मैं ओकरा नी रहें, ताकि तू मन मोर उपर विश्वास कर सकिहI’’

जब यीशु लाजर के गाँव पहुंचिस त लाजर ला मरब चार दिन होगे रिहिसI मार्था यीशु ले भेट करे बर बाहर आइस अउर कहिस, ‘’हे प्रभु अगर तें इकरा होते त मोर भाई नी मरे रतिसI परन्तु मैं विश्वास करत हं कि जोन कुछु तें परमेश्वर ले मांगबे ओहर तोला दिहीI’’

यीशु हर उत्तर दिस, ‘’पुनरुत्त्थान अउर जीवन मैं हंI जोन कोनो मोर उपर विश्वास करथे यदि ओहर मर घोले जाही तभो ले जीहीI जोन कोनो मोर उपर विश्वास करथे ओहर कभू नी मरेI का तें इकर उपर विश्वास करथस?” मार्था हर उत्तर दिस, “हे प्रभु, मैं विश्वास करत हं कि तें परमेश्वर के बेटा मसीह हसI’’

तहाँ मरियम आईस ओहर यीशु के पाँव मा गिर के कहिस, ‘’हे प्रभु, यदि ते इकरा होते त मोर भाई नी मरे रतिसI’’ यीशु हर ओला पुछिस, ‘’तुमन लाजर ला कोन करा राखे ह?’’ ओमन ओला बताईन, ‘’कबर ठीI आ अउर देख लेI’’ तहाँ यीशु हर रोये लागिसI

ओ कबर एकठन गुफा रिहिस जेकर दुआर मा एकठन पथरा ला लुढ़काये गे रिहिसI जब यीशु कबर ठीन पहुचिस त ओहर ओमनला कहिस, ‘’पथरा ला हटा दI‘’ परन्तु मार्था हर कहिस, “ओला मरे चार दिन हो गेहेI ओमे ले दुर्गन्ध आत होहीI’’

यीशु हर उत्तर दिस, ‘’का मैं तोला नी कहे रहें कि यदि तें मोर उपर विश्वास करबे त परमेश्वर के सामर्थ ला देखबे?’’ इकरे बर ओमन पथरा ला हटा दीइनI

तहाँ यीशु हर उपर सरग अंग देख के कहिस, ‘’हे पिता, मोर सुने बर मैं तोला धन्यवाद करथोंI मैं जानथों कि तें हमेशा मोर सुनथस, परन्तु में इहर इकरा खड़े इ सब मनसेमन के सहायता करे बर कहें ताकि इमन विश्वास करिहिं कि तें मोला भेजे हसI’’ तहाँ यीशु हर नरियाइस, ‘’हे लाजर बाहर निकर आI’’

अतः लाजर बाहर निकर आइस! ओहर अभीच घोले कफन मा लपटाए रिहिसI यीशु हर ओला कहिस, ‘’इ कफन ला निकारे बर ओकर मदत कर अउर ओला आजाद करI’’ इ चमत्कार के खातिर बनेच यहूदीमन यीशु उपर विश्वास करिनI

परन्तु यहूदीमन के धार्मिक अगुवामन यीशु ले जले लागिन, इकरेबर ओमन योजना बनाये बर एक संग इकट्टा होईन कि कइसन यीशु अउर लाजर ला मार डाले जाएI