39. यीशु के ऊपर नालिस चलिस

अब इहर आधी रात के बेरा रिहिस। ओ सिफाही यीशु ला बड़े धरमगुरु के घर ले आईन, काबर कि ओहर यीशु ले सवाल करे बर चाहत रिहिस। पतरस दूरिहा ले ओमनके पिछा करत रिहिस। जब सिपाही यीशु ला घर मा लेगिन, त पतरस बाहर रुक के आगी तापे लगिस।

घर के भीतर, यहूदी अगुवामन यीशु के उपर मुकदमा चलाईंन। ओमन ओकर विरुद्‍ध झूठा गोईठमन ला कहे बर बनेच झूठा साखीमन ला लेके आईन। हालाकि, ओमनके बयान एक दूसर ले मेल नी खात रिहिस, इकरबर यहूदी अगुवामन इ साबित नी कर पाईन कि ओ हर कोनो बात के दोषी रिहिस। यीशु हर कुछु नी कहिस।

आखरी मा, बड़े धरमगुरु हर सीधा यीशु ला देख के कहिस, “ हमनला बता कि का तैंच जीवित परमेश्‍वर के बेटा मसीह हस?”

यीशु हर कहिस, “मे हं, अउर तुमन मोला परमेश्‍वर के संग बईठे अउर सरग ले आत घोले देखीह।“ बड़े धरमगुरु हर आपन कपड़ा ला चीर दीस काबरकि जोन यीशु हर कहिस ओहर ओ बात ले बनेच रिसा होगे रिहिस। ओहर आने धरम गुरुमन के उपर नरियाईस, “हमनला इ बताय बर कोई अउर साखी के जरुरत नी ये कि इ मनसे हर का करिस हे! तुमन खूद हि ओला इसने कहत सूने ह कि ओहर परमेश्‍वर के बेटा एI ओकर बारे मा तुंहर मन के का राय हे?”

सब यहूदी अगुवामन हर बड़े यहुदी धरम गुरु ला जवाब दिन, “ओहर मरे के लायक हे!“ तब ओमन यीशु के आँखी मा पट्‍टी बाँध दिन, ओकर उपर थूंकिन, ओला पिटिन, अउर ओकर मजाक उड़ाईन।

अउर पतरस, जब ओहर घर के बाहर अगोरत रिहिस। तब एक नौकरानी हर ओला देखिसI ओहर ओला कहिस, “तैं घोले यीशु के संग रहे!” पतरस हर मना कर दीस। बाद मा, कोई आने लड़की हर इच बात ला कहिस, अउर पतरस हर फेन ले मना कर दीस। बाद मा आने कड़की हर इ बात ला कहिस, अउर पतरस हर फेन ले मना कर दिसI आखिर मा, कुछु मनसेमन कहिन, “हमन जानत हन कि तैं यीशु के संग रहे काबर कि तुमन दुनों गलिल ले ह।“

तहाँ पतरस हर कहिस, “अगर में इ मनसे ला जानत हं त परमेश्‍वर मोला सराप दे!’’ तुर्तेच पतरस के इसने किरिया खाय के बाद, एकठन कूकरा हर बासीस। यीशु पीछु लहूँट के पतरस ला देखिस।

पतरस ओ ठी ले चल दीस अउर बिलक-बिलक के रोईस। ओइच बेरा मा, यीशु ला पकडवाए वाला यहूदा हर देखिस कि यहूदी अगुवामन यीशु ला मृत्यु दंड दे रिहिनI यहुदा बनेच दु:खी होगिस अउर जाके अपन आप ला मार डालिस।

अभी उ देश के राजा पिलातुस रिहिसI ओहर रोमी सरकार बर काम करत रिहिस। यहूदी धरम गुरुमन यीशु ला ओकर ठी लेके आईन। ओमन चाहत रिहिन कि पिलातुस ओला मृत्युदंड दे अउर ओला मार डारे। तहाँ पिलातुस हर यीशु ले पुछिस, “का तैं यहुदी मन के राजा हस?”

यीशु हर उत्‍तर दिस, “तैंहर सच ला कहे हस। लेकिन मोर राज पाठ ईंहा पृथ्वी के नोहे। अगर होतिस त मोर सैनिकमन मोर बर लड़ाई करतिन। मैं पृथ्‍वी मा परमेश्वर के बारे मा सच बताय बर आए हों। हर ओ मनसे जोन सच ला माया करथे ओहर मोर सूनथे।“ पिलातुस हर कहिस, “त सच का हे?”

यीशु के संग गोठियाए के बाद, पिलातुस हर बाहर भीड़ करा जाके कहिस, “मैं इसने कोनों कारन नी पायें कि इ मनसे मार डाले जाय के लायक हे।“ लेकिन यहूदी धरम गुरुमन अउर भीड़ हर नरिया के कहिन, “ओला कुरुस मा चढ़ा द!“ पिलातुस हर उत्‍तर दीइस, “ओहर कुछु घोले गलत करे के दोषी नी होए।“ लेकिन ओमन अउर घोले जोर ले नरियाय लागिन। तहाँ पिलातुस हर तिसर बार कहिस, “ओहर दोषी नी ए!”

पिलातुस डर गिस कि ओ भीड़ हर हूड़दंगा शुरु कर दीहि, इकरबर ओहर अपन सैनिकमन दूवारा यीशु ला कुरुस मा चढ़ाय बर मान गिस। रोमी सिपाहीमन यीशु ला कोड़ा मारिन, अउर ओला राजा के जइसन अंगरखा पहनाईनI अउर ओकर मुड़ मा कांटा के बने मुकूट ला राखिन। तहां ओमन इ कहके ओकर मजाक उड़ाय लागिन, “देख, यहूदिमन के राजा!”