24. यूहन्ना यीशु क्ये तीय्या पवित्र डुबकी { बपतिस्मा } जिबे

एलीशिबा और जकर्याह क्ये पयाव युहन्ना, बयना हिते डा परमेश्वर क्ये भविष्य जिघय वालो बनिवा। व्हाई मानङया कुहाने, और मानङको मव्वे और पाट्यान्गोला जाआन्यासी , और ऊँट क्ये रोहांव क्ये बनिव्तर्या लत्ताला नेलिने।

झिक्क मंछला युहन्ना क्ये बतकाव गुन्हे खानी मानङया पिय्ये सी। आय अय नेते आयला प्रचार खय्या, “पछतावा खयनी, हान्खानी कि स्वर्ग क्ये राज्याव नजदीक व्हा!”

जब मंछलाय यूहन्ना क्ये संदेशाव कुन्हाहे, त्ये आयला दी झिक्कलाय पान पाप सिला क्ये पछताव खय्याहे, और यूहन्ना य तिय्या पवित्र डुबकी चिलाव्बासी या बपतिस्मा जिबेसी। यूहन्ना क्ये दब्बो खानी यहूदी धर्म प्रधान ला लय पिय्येसी, पर आयलाय पान पापसिला क्ये पछतावा या ग्रहण हां खय्याहे।

यूहन्ना य यहूदी धर्म वालो प्रधान नासी, “हे माबुला जोह्हो जहर वालो मंछला! पछता वा खयनी और पानक्ये व्यवहारयना बदेलोनी। परमेश्वर हर आय सिंग क्ये काटोरिव जो निक्को फल हां पितोवरे , और व्हाई अयला म्हीय्या ओड़ेङीवसी। ” जो परमेश्वर क्ये भविष्य जिघय वालोलाय नेतर्या ही यूहन्ना आय पुरो खय्या, “दब्बो, जल्दिले ना नंङ खानी पान दूत घालोरिव जो नंङ खानी योंग त्यार खयरे। ”

घयनु धर्मला प्रधान यूहन्ना होद्याहे कि हांङ व्हाई मसीह हि। यूहन्ना य जवाब जिबेसी, “ना मसीह हां ही, पर व्हाई ना बाद बिहारे। व्हाई अच्च महान वह कि ना आयक्ये जोधाव क्ये फितावला खोयनेक बराबर हां गूहा। ”

दोहोरो ध्यंङ, यीशु तिय्या पवित्र डुबकी लाव खानी यूहना क्ये पाहे पिय्ये। जब यूहन्ना य आय चेपा , त्ये आय चिनेसी, “द्ब्बोनी! परमेश्वर क्ये भेड़ाव क्ये पयाव जो दुनिया क्ये पापावला उठावते कातेरिव। ”

यूहन्ना य यीशु चिने, “ना नंङ तिय्या पवित्र डुबकी लगाव योग्य हां गूहा। अयक्ये बजाय जरूरी अय व्हा कि नंङ ना तिय्या डुबकी लाव बे। ” पर यीशु य चिने, “नंङ ना तिय्या पवित्र डुबकी लाव चाय्यो, हान्खानी कि घय खानी सही काम अय ही। ” अब यूहन्ना य तिय्या पवित्र डुबकी चिलगाव्बा, जबकि यीशु य कभय पाप हां खय हा।

तिय्या पवित्र डुबकी लगावते बादे जब यीशु ती दी बहारी तोंङे, त्ये परमेश्वर क्ये आत्माव कबूतर क्ये रुप या प्रकट हिय्ये और धी पिते आय्या रुकिव्वा। आयल समय्या, परमेश्वर य स्वर्ग या बतकाव खय्या। अय चिनेसी, “नंङ ना पयाये चिहि। ना नं हंङे प्यार घय्युरे, और ना नंङ खानी झिक्क खुश गुहा। ”

परमेश्वर य यूहन्ना नेस्या कि, “पवित्र आत्मा धी पिते कोईलाया रुकिवरी जोक्ये नंङ तिय्या डुबकी चिलगारिबाव। ” व्हाइल परमेश्वर क्ये पयाव ही परमेश्वर डाल ही। पर जब यूहन्ना य यीशु क्ये तिय्या पवित्र डुबकी लगावबा, त्ये आय परमेश्वर बब्बा क्ये बतकाव घय समय कुन्हा, पयाव परमेश्वर क्ये चेपा ,जो यीशु ही, और आय पवित्र आत्मा क्ये चेपा।