25. शेतान यीशु क्ये परिक्षा खय्युरे

यीशु क्ये तीया पवित्र डुबकी लावते बाद तुरन्त बादले, पवित्र आत्माय आय मानङया ज्याते। यीशु आय्या चालीस ध्यंग चालीस गायरे ही। आय समय अय बरत्ये खय्या, और शेतान य यीशु क्ये पाहे पिते पाप हागय खानी आयक्ये परखाव खय्या।

पय्लो, शेतान य यीशु चिने, “अगर नंङ परमेश्वर क्ये पयाव चिहि त्ये अय डूङगला क्ये लग्या पनाव बे तब नंङ ज्या स्याकोरिव!”

पर यीशु य शेतान ना, “परमेश्वर क्ये वचनावया अय लिख्खो तर्या व्हा, ‘जीवतो रहो खानी मंछ क्ये केवल लग्या क्ये जरूरी हां हीरे, पर अय हर आय बतकाव क्ये जरूरी हीरे जो परमेश्वर आयला चिनेयरे!”

तब शेतान यीशु मंदिर क्ये झिक्क उच्चो टूकोव्या जिगाते। आय अय चिने, “अगर नंङ परमेश्वर क्ये पयाव चिहि त्ये अयकोमादी धी फाट्टो ओङे, हान्खानी कि लिख्खो तर्या व्हा, ‘परमेश्वर नंङ याके खानी स्वर्ग क्ये दुतावला आदेस बेरीव कि नंङगे भागला ढुंगय ठेहेको हां लागोरिव। ’”

पर यीशु य अय हां खय्या जो शेतान य आय घय खानी नेस्या। आयक्ये बजाय, आय चिने, “परमेश्वर हर डा चिनयरे, ‘नंङ प्रभु पान परमेश्वर क्ये परिख्योको ता खय्याना। ’”

फिर शेतान य आय संसार क्ये जम्मा राज्यला चिहामटे। आय अय चिहामटे कि व्हाइला घय शक्ति वालोला व्हाई, और व्हाइला घय रुपय्या वालोला व्हाई। आय यीशु चिने, “ना नंङ अय सेहांग बेने अगर नंङ घुटनाग्ये टेक्योते ना प्रणाम खय। ”

यीशु य जवाब जिबे, “हे शेतान, ना पाहे दी घे! परमेश्वर क्ये वचनाव क्ये व्हाई मंछला क्ये आदेशाव बवसिरे, ‘केवल पानक्ये प्रभु परमेश्वर क्ये भक्ति खयनी। परमेश्वर क्ये रूप या केवल आयक्ये आदर- सम्मान खयनी। ’”

यीशु य शेतान क्ये परीक्षा दी हार हां मान्या, अय कारणय शेतन आयक्ये पाहे दी ओक्का। तब स्वर्ग क्ये दुतावला पिते यीशु क्ये सेवाव घय भंगेसी।