26. यीशु पानक्ये सेवाव सुरु खय्युरे

शेतान क्ये परीक्षावला मना खयते बादे, यीशु वापस गलील क्ये इलाकाया पिय्ये। अय व्हाई जग्गा ही जाहा व्हाई कुहाने। पवित्र आत्माय आय झिक्क शक्ति बेस्या, और यीशु डा जग्गा दी दोहरो जग्गाता का और मंछला शिक्षा बा। जम्मालाय आय बारेया निक्को बतकाव चिनेसी।

यीशु नासरत बस्तीया का। अय व्हाई गाव ही जाहा व्हाई पानक्ये बचपनया कुहाने। हप्ता क्ये ध्यंग, व्हाई भक्ति जिघय जग्गाया का। यहूदी प्रधान लाय यशायाह य परमेश्वर क्ये भविष्य जिघय वालो क्ये बतकाव क्ये डा किताब जिबे। व्हाइला हुचो हाशी कि व्हाई आय दी पड़वङि। अब यीशु य आय किताब खोयनेते आय दी डा भाग मंछला खानी पड़व्वा।

यीशु य पड़व्वा, “परमेश्वर य ना पानक्ये आत्माव बेहायेरे ताकि ना निक्को समाचार क्ये प्रचार घय हाक्कोरिव। आय ना अय कारणय घाल्वाये कि केदिला क्ये आजाद घयरिव, कानाला क्ये फिर से दब्बो खानी मिके बेरिव, और आयला छुटकारा बेरीव जो दोहोरो मंछलाय कुचल्लों स्यारे। अय व्हाई समय ही जब परमेश्वर नानी उप्पर कृपा खयरिव और नानी मदद खयरिव। ”

फिर यीशु होये। जम्मा मंछलाय आय बड़िया ध्यानय दब्बो स्यासी। व्हाइला दहेनेसी कि परमेश्वर क्ये वचन जो भाग अत्तर पड़व्वा व्हाई मसीह क्ये बारिया ही। यीशु य चिनेसी कि, “जो बतकाव नाय अत्तर ननिला खानी पड़व्वा, व्हाई अय समय्या ही हायरे। ” जम्मा मंछला हेरान ही। आयला नाहे, “आय युसूफ क्ये पयाव ही। ”

तब यीशु य चिनेसी, “अय हाच्ची ही कि मंछला कोई इन्द भविष्य जिघय वालोला क्ये कभय ना पान मान्योरे जो आयला बस्ती या पल्लोते बड़ीव्हारी। अलिय्याह भविष्य जिघय वालो क्ये समय या, इस्त्राएल देहया घयनु बीधवाला ही। पर जब ह्याड़ी हुंङ बरेहे झानी ती हां हिय्ये त्ये परमेश्वर य एलिय्याह क्वो इस्त्राएल देहया कोई बिधवा क्ये मदद घय खानी हां घाल्वा। अयक्ये बदले, आय एलिय्याह क्ये कोई अलग देहया बिधवा क्ये पाहे घाल्वा। ”

यीशु नेके जारी थाहा, “और एलीशा भविष्य जिबताव वालो क्ये समय या, इस्त्राएल देहया घयनु मंछला कोड़ीला रोगीला ही। पर एलीशा य आयला कोई लय निक्को हां खय्या। आय केवल इस्त्राएल देह क्ये दुश्मन क्ये सेनापतिव नामान क्ये निक्को खय्या। ” पर जो मंछला यीशु क्ये कुन्हे हांसी व्हाइला यहूदी ला ही। अय कारणय जब आयलाय अय आय ने कुन्हाहे त्ये व्हाइला आय पर घुस्सा हिय्येसी।

नासरत क्ये मंछलाय यीशु क्ये चिहोंङे और आय भक्ति जिघय दी घसीट्योते बहारी जिगाते। व्हाइला आय हाते खानी धी चोड़े खानी डा पहाड़ क्ये टूकव्या काताहे। पर यीशु भिड़े दी तोंङे और नासरत बस्ती क्ये हाड्डोते ओक्का।

फिर यीशु जम्मा गलील क्ये इलाका लाया का, और बयना भीड़ आय पास पिय्ये। व्हाइला इन्द मंछला पितेते पिय्येसी जो बीमार और बिकलान्गला ही। आयला दी घयनु दब्बो हां हाक्कोन्याहे कुन्हे हां हाक्कोम्याहे हां दब्बो हाकोन्याहे, और यीशु य आयला निक्को खय्यासी।

अयक्ये अलावा, घयनु मंछला यीशु क्ये पाहे पिताहे जोलाया दुष्ट आत्माला ही। यीशु य दुष्ट आत्माला आयला दी तोंते गा खानी आदेस बासी और व्हाई दुष्ट आत्माला आय दी बहारी तोंङेसी। व्हाई दुष्ट आत्माला अक्सर चिल्लानेसी, “नंङ परमेश्वर क्ये पयाव चिहि!” भीड़ क्ये मंछला हेरान हीय्येसी, और आयलाय परमेश्वर क्ये गुण गान खय्याहे।

फिर यीशु य बार पयला चुन्वासी जोला आय पानक्ये खास पयावला नासी। आय खास पयावला गय आयला हाते ह्वासी और आय दी शिक्षा प्राप्त खय्याहे।