12. इस्राएली लोका रा मिस्र देशा का बागे काहडना

इस्राएली लोका मिस्रा का निखली करी बखे खुश थी। त्या एवा गुलाम नाँई थी, होर एबा त्या बायदे रे देशा वे नाह्दे लागे थी! इस्राएली लोके जोह किछ भी मिस्री लोका का माँगु थी , मिस्रिये सह सव्हे सा दिना, अखे तणी कि सूना होर चाँदी होर बहू कीमती चिजा। दूजे देशा रे एखे लोके परमेश्वरा में विश्वास करू होर जेवा इस्राएली लोका मिस्रा का निखली तेवा भी त्याये संघे चली।

परमेश्वर धयाडी में बादला रअ एक थामअ बणी करे, होर राचके वक्ते आगी रअ थामब बणी करे मूसा, हारून होर इस्राएली लोका जेह जेह चलू। परमेश्वर सदा त्या संघे थी होर हाड्दे वक्ते तया वक्ते त्या री सहायता करा थी। त्या सीधी परमेश्वरा पीछे हांडणा थी।

थोड़े वक्ता बाद, फिरौन होर तेऊ रे लोके रा मन बदलु। त्या इस्राएली भी का आपणे गुलाम बणउणा चाहदा थी। तेवा त्याये इस्राएली लोक रा पीछा करू। यह परमेश्वर ही थी जासु त्यारे मन बदली। परमेश्वरे एडा तेवा करू किवेकी सह चाहन्दा थी कि सभे लोका जाणे कि यहोबा परमेश्वर, फिरौन का होर मिस्रियों लोका रे सारे देउआ का शक्तिशाली साहा।

जेवा इस्राएली लोके मिस्रा री सेना ईहंदी हेरी तेवा त्याये जाणू कि त्या फिरौना री सेना आसा होर लाल समुद्रा मंजे फसी। इस्राएली लोका बखे डरी होर लेरदे लागे, "हामे मिस्र किवे छाडू ? हामा मरणे का कोहे नाँई बचाई सकदे !"

मूसा इस्राएली लोक वे बोलू, "डरना बंद करा ! परमेश्वरा आज थारी तणी आपे लड़णा होर तमे बचाउणे।" तेबा परमेश्वरे मुसा वे बोलू, "याह लोका वे लाला समुद्रा में जेह नाहणे वे बोल। "

तेवा परमेश्वरे सह बादला रअ थाम्ब इस्राएली होर मिस्री रे मंजे खडअ करू होर राची सह आगि रअ थाम्ब बणु मिस्री लोका सारी राच इस्राएली लोका नेड नाँई ईछी सके।

परमेश्वरे मूसा बे समुद्रा पेंदे आपण हाथ बढ़ाउणे वे बोलू। तेउकी परमेश्वरे बागरी का समुद्र रे पाणी वे बाईं फेरा बे होर दाईं फेरा वे करु, होर समुद्रा रे बीचा में एक बात बणी।

इस्राएली लोका आपणे दोहरी तरफे पाणी री दीवारा संघे शुकी जमीन का समुद्रा होई करे हांडदे लागे।

तेवा परमेश्वरे तेसा बाता का बादल चुआकू, होर मिस्री लोका इस्राएली बची करे नाहदे हेरी। मिस्री लोके त्या ढाकणे री तणी भी आका पीछा करणा शुरू करू।

एता वाद मिस्री लोके समुन्द्रा री बाता इस्राएली लोका रा पीछा करू, पर परमेश्वरे मिस्री लोका डरयाई होर त्यारे रथ फसाई। त्या जोरे -जोरे बोलदे लागे, " ठुरा ! इस्राएली री की तरफा का परमेश्वर लड़दअ लागदअ साहा !"

सभे इस्राएली समुद्रा रे दूजी फेरा पूजे। तेवा परमेश्वरे मूसा का बोलू कि सह भी का पाणी पेंदे हाथ बढ़ाए। जेबा मूसा एडा करू , तेवा पाणी मिस्री सेना पेंदे आउआ होर समुन्द्र पहिले जेहअ होउ। तेबा सारी मिस्री सेना डूबी करे मुई।

जेवा इस्राएली लोके हेरू कि मिस्री लोका मुये, तेबा त्याहे परमेश्वरा पेंदे बुशाह करू। त्याहे बुशाह करु कि मूसा परमेश्वरा री तरफा का भविष्यद्वक्ता थी।

इस्राएली लोका तेवा भी बखे खुश थी, किबेकी परमेश्वरे त्या मारणे का होर गुलामा हुणे का बचाई थी। एवा त्या परमेश्वरा री आराधना करणे होर तेऊरी आज्ञा रा पालन करणे वे आजाद थी। इस्राएली लोके आपणी आजदी री खुशी मनाऊणे बे होर परमेश्वरा री बड़ाई करने री तणी बहु सारी गीहा बोली किबेकी परमेश्वरे त्या मिस्री सेना का बचाई थी।

परमेश्वरे इस्राएली लोका वे हर साला एक जाचा मनाउणे रा हुकम दिना, यह याद करणे वे कि कैडे परमेश्वरे इस्राएली लोका मिस्री लोका का गुलाम हुणे का बचाई थी तेबा एसा जाचा बे फसहे री जाच बोलू। एसा जाचा मनाऊणे वे तयाहे एक नरोगे गाभु री बली करी सह भूजण थीहोर तेऊ बिना खमीरा आली रोटी सगे खाण थी, सह गाभु भुजण थी।