13. इस्राएली लोके सगे परमेश्वरा री बाचा

इस्राएली लोका बे लाल समुन्द्रा पार नीणे बाद, परमेश्वरे तया जगला मेजा का होई करे सीने ना री जोता बाथी नीई थी। यह सहे जोत थी जखे मूसा जलदी होछी शाणी हेरी थी। इस्राएली लोके तेसा जोता थाई आपु बे तम्बू पाई|

परमेश्वरे मूसा का होर इसराइला रे सभी लोका बे बोलू, "अगर सदा तमे मेरी आज्ञा मनले होर मेरी आज्ञा रा पालन करले, तेबा सभी लोका में का तमे ही मेरे कीमती लोका हुणे। यह सारी धरती मेरी आसा होर तमे मेरी नजरा में मेरे याजको रा राज्य होर एक पवित्र जाति हूँणी।

चीई धयाडी तणी त्या आपणे शुद करदे रही की परमेश्वर त्या सेटा ईछे तेबा परमेश्वर सीने पहाडा का उन्दे आऊओ होर् जेबा सह उन्दे आऊओ तेबा जाजरी होई, बिजली चमकी, काले बादल इनदे लागे होर नरशीगे री जोरा री छेड शूणदी लागी तेऊ पहाडा पेंदे नाहणे री इजाजत सीधी मूसा थी होर मूसा पहाडा पेंदे चढू।

तेबा परमेश्वरे लोका सगे एक बाचा बाँनी। तेऊ बोलू , "हाऊ थारअ परमेश्वर यहोबा साहा। हाऊ सहे आसा जासुए तमे मिस्रा री गुलामी का छाडी। तमे महा छाडी कासु होरी साहा री पूजा नाँई करे। "

तमे "मूर्ति बणाई करे तेत्की आराधना नाँई करे , किबेकी हाऊ थारअ होर ना तया री पूजा करे, किबेकी हाऊ यहोबा एके थारअ परमेश्वर साहा। तमे मेरा ना गलत कामा री तणी नाँई लए। होर सब्ता री धयाडी पवित्र मनणे री तणी याद डाहे। तमे छह धीयाडे में आपणा सारा काम करे, साती धयाड तमा बे आराम करने बे होर मेरी आराधना करने बे हुणी। "

तमे आपणे आमा बापू रा आदर करे। होर कासी री हत्या नाँई करे।होर कासी सगे व्यभिचार नाँई करे। कासी री चोरी नाँई करे। तमे आपणे ग्राई री लाडी , या तेसके घरा रा, कासी भी समाना चकणे रा लालच नाँई करे । "

तेबा परमेश्वरे दस आज्ञा पाथरा री दुई पाटी में लिखी करे मूसा बे दीनी। परमेश्वरे तयाह बे होर बहु सारे नियमा रा पालन करने बे बोलू होर त्या सगे यह बाचा बानी की अगर तमे याहा नियमा रा पालन करले तेबा महा तमा बे आशीष दीणी होर थारी रक्षा करनी पर आगर तमे याह नियमा रा पालन नाही करू तेबा महा तमा बे सजा दीणी ।

परमेश्वरे इस्राएली लोका बे एक एक बडअ तम्बू बडाऊणे बे बोलू – जासू बे मिलापा आलअ ताम्बू भी बोला। तेऊ त्या बे बोलू की यह तम्बू केडह बणाऊण आसा, होर तेता महीतर कुणा चीजा डाहणी। परमेश्वरे तया बे तेऊ तम्बू में दुई कमरे होर एक बड़े पर्दे लाऊणे बे बोलू। परमेश्वरा तेऊ पिछले आल़े तम्बू रे कमरे में इहणा, होर तखे रहणा। तेऊ कमरे में नाहणे री आज्ञा सीधी महा याजका बे हूणी थी।

परमेश्वरे तया लोका बे बोलू कि तेऊ मिलापा आल़े तम्बू रे सामने एक बेदी बणाऊणा। परमेश्वरे त्याबे यह भी बोलू कि जोह मेरी आज्ञा चोडलअ सह एसा बेदी पेंदे एक बलि चढ़ाऊणे बे एक जानबर आणे। तेबा महा याजका तेऊरे पापा री तणी तेऊ जानबरा री बलि चढ़ाऊणी , होर बेदी पेंदे तेऊ जानबरा मेरी तणी बे बलि रे रूपा में जलाऊलअ। तेऊ जनबरा रे लोहू सगे तेऊ मणशा रे पाप दूर हुणे। एउ साबे एबा, महा सह पाप याद नाँई करना सह मणश मेरी नजरा में शुद हुणअ परमेश्वरे मूसा रे भाई हारूना होर हारुना रे बंशजा बे आपणे याजक बड़ाऊणे बे चुनी।

तेबा परमेश्वरे तया लोका बे जोह नियम दीने थी तया तेता मनणे बे राजी होई। त्या सीधी परमेश्वरा रे लोका हुणे बे होर सीधी तेउरी स्तुति करने बे सहमत होई।

कई धयाडी तणी, मूसा सीने ना री जोता में परमेश्वरे सगा गला करद रहू। पर त्या लोका मूसा रा बापिस निहालदे-निहालदे थकी थी। तेबा तया लोके हारुना सेटा बे सुना आणु होर हारुना का सुने री एक मूर्ति बणाऊणे बे बोलू ,की त्या परमेश्वरा छाडी करे तेसा मूर्ति री पूजा करे । एउ साबे तयाहे परमेश्वरा रे विरोधा में बडा पाप करू।

हरुने बाछू रे रूपा में एक सुने री मूर्ति बणाई। तेउकी तयाहे लोके तेसा मूर्ति री पूजा करनी शुरू करी शुरू करी होर तेसा बे बलि चढ़ाई ! तयारे एउ पापा रे बझा कअ परमेश्वरा बहु गुसा आऊआ । परमेश्वर तया खत्म करना चहान्दा थी। पर मूसा परमेश्वरा का बिनती करी की याह लोका नाँई मारे होर तेऊ मूसा री बिनती शूणी होर त्या लोका नाश हुणे का बची |

जेबा मूसा सीने ना री जोता का उन्दे आऊओ। तेऊए त्या पाथरा री दूई पाटी हाथे डाही दी थी जासु में परमेश्वरे दस आज्ञा लिखी दी थी, तेउकी मूसा जेबा सह मूर्त भाली तेबा सह एथर गुसे होऊ की तेऊ त्या पाटी चोडी पाई, जोह कुछ त्याहे लोके करू सह परमेश्वरा री त्या दस आज्ञा रा बिरोध थी ।

तेउकी मूसा तेसा मूर्ति रा पिशी करे बरुदा बणाऊ, होर तेऊ बरुदे रा पाणी मिलाई करे त्या लोका बे सह पाणी झूटणे बे दीना। परमेश्वरे त्या बे एक बिमारी भेजी होर तेता सगे बहु सारे लोका मुए।

जो पाटी मूसा चोडी थी तयाहा री जागहा मूसा दस आज्ञा री पाथरा री नई पाटी बणाई। तेउकी मूसा भीआका जोता बे नाठअ होर प्राथना करी की त्या लोका बे माफ करे। परमेश्वरे मूसा री प्रार्थना शूणी होर तया माफ करी। तेउकी मूसा नई पाटी पेंदे दस आज्ञा लिखी करे जोता का उन्दे आऊओ। तेबा परमेश्वरे सीने जोता का बायदे रे देश तक एस्राएली लोका री अगुबाही करी ।