14. इस्राएली लोका रा चाहली साल तणी जंगले भटकणा

इस्राएली वे त्या काईदे कानून खोजने बाद परमेश्वरे सीने पहाडा का त्या री अगुबाही करी। परमेश्वर त्या बायदे रे देशा में नीणा चाह्न्दा थी।जासु बे कनान देश भी बोला थी। परमेश्वर बादला रअ थामब बड़ाई करे त्या जेह -जेह होर त्या तेऊ पीछे -पीछे हांडी।

परमेश्वरे अब्राहम, इसहाक होर याकूबा का बायदा करू थी कि महा बायदे रअ देश थारे वंशजा वे दिणअ, पर एबा तखे बहू जाति रे लोका बसी मुके थी। त्या वे कनानी लोका बोला थी। या कनानी लोका परमेश्वरा आराधना नाँई करदे थी होर तेऊ री आज्ञा नाँई मनदे थी। त्या झूठे देऊआ री भक्ति करा थी होर त्या बहू सारे बुरे काम करा थी ।

परमेश्वरे इस्राएली लोका वे बोलू , "जेवा तमे बायदे रे देशा में नाहले तेवा तखले सारे कनानी लोका का छुटकारा पाये। त्या संघे संगत नाँई करे होर त्या संघे ब्याह नाँई करे। तमा त्या री सारी मूर्ति खत्म करे। अगर तमे मेरी आज्ञा नाई मनले, तेबा तमे माह छाडी करे, त्या रे देऊआ री की स्तुति करदे लागणा।"

जेवा इस्राएली लोका कनान री सीमा में पूजे, मूसा इस्राएली रे हर गोत्रा में का एक-एक करी करे बारह मर्द चुनी। तेउये त्या कनाना देशा रा भेदा लउणे री आज्ञा दीनी कि हेरे कि सह कैडा देश साहा। त्या कनानी रा भेद भी लउणा थी कि हेरे कि त्या ताकत आल़े साहा या कमजोर साहा।

त्याहे बारहे मर्दे सारे कनाना देशा में चाहली दिहाड़ी री यात्रा करी होर त्या तेउकी वापिस आउये। त्याये लोका वे खोजू , "कनान देश बहु उपजाऊ देश साहा होर फसला बखे हुंदा साहा !" पर त्याह बारहा लोका में का दस लोके कनानी लोका रे नगर बहु पाके आसा बोलू , "त्या रे होर त्या लोका लाम्बे -चौड़े तगड़े लोका साहा ! अगर हामे त्या पेंदे हमला करले तेबा त्या हामा जरुर हराई सका होर हामे मारी पाऊणे। "

तेबा तेवरी कालेब होर यहोशू होर होरी दुई भाई बोलदे लागे की, "यह सची साहा कि कनाना रे लोका लाम्बे होर ताकत आल़े आसा, पर हामे त्या पाके में त्या हराई सका ! किबेकी परमेश्वरा हमारी तणी लड़णा !"

पर लोके कालेब होर यहोशू री नाँई शुणी। त्या मूसा होर हारून का बखे गुसे होई होर बोलू , " ताए हामें एसा डरयाऊणी जगहा पेंदे किबे आणी ? हामा तखी मिस्रा में ही रहणे वे थी । अगर हामे कनान देशा बे नाठे तेबा हामे लड़ाई में मरने, होर कनाना रे लोका हमारी बेटडी होर शोहरू गुलाम बड़ाऊणे। " त्या लोका एकी नयुए अगुबे चुनदे लागे की सह त्या वापिस मिस्रा देशा बे नीणे।

जेवा त्याये लोके एडा बोलू तेबा परमेश्वर बखे रोष आऊआ। सह मिलापा आल़े तंबू में आउओ होर बोलू , "तमे मेरे खिलाफ बलवा करूदा साहा , तेवा तमा सभी एउ जंगले भटकणा होला। तमा में जोह बीहा साला रअ आसा या तेता का ज्यादा उमरा रअ साहा तखे मरणअ होर कधी भी तेऊ देशा में राज नाँई करी पाऊणा जोह देश हाऊ तमा वे दिंदा। तेऊ देशा में केले कालेब होर यहोशू ही नाही सका।"

जेवा लोके परमेश्वर एडा बोलदअ शुणू , तेवा त्या दुखी होई किबेकी त्याये पाप करु थी। तेवा त्याये कनाना रे देशा में हमला करणे रा फैसला करू। मूसा त्या वे चताबनी दीनी तमे कनान देशा बे नाँई नाहे किबेकी परमेश्वर तमा सगे नाँई नाहण, पर त्याहे मूसा री गल नाँई शूणी।

परमेश्वर एसा लडाई में त्या संघे नाँई नाठअ थी ,तेवा कनानी लोके त्या हराई करी होर त्या में बहू सारे लोका मारी पाई। तेवा इस्राएली लोका कनाना का से वापस मुड़ी आये। आगली चाहली साला तणी ,त्या जंगले ओहरी –पोहरी भटकते रही।

जेबा इस्राएली लोका चाहली साला तक जंगला में भटकते रही। तेबा, परमेश्वरे त्यारी सारी जरूरता पूरी करी। परमेश्वरे त्या बे खाणे बे रोटी दीनी जासू बे मना बोला। परमेश्वरे त्या बे तेऊ बटेरे रे झुंड त्या रे डेरे में भेजी की त्या ज़ेह खाणे वे माँस होये। याह चाहली साला में परमेश्वरे त्या रे झीकड़े होर बूटा थोचणे नाँई दीना ।

परमेश्वरे त्या रे झुटणे बे पाणी वे चमत्कारे सगे शाफ्डा का पाणी काडू। पर एता सभी सा बाद भी, इस्राएली लोके परमेश्वरा रे खिलाफ होर मूसा रे खिलाफ शिकायत करी होर कुड़कुड़ाइ। तेउकी भी, परमेश्वर आपणे बायदे पेंदे विश्वासयोग्य थी। परमेश्वरे अब्राहम इसाहक होर याकुबा रे बंशजा बे जो बायदा करू थी सह तेऊ पूरा करू तेऊ।

एक होर वक्ते जेबरे त्या लोका सेटा पाणी नाँई थी , परमेश्वरे मूसा का बोलू , "शाफ्डा का गल्ला कर, होर तेताका पाणी निखलणा। " पर मूसा शाफ्ड़े संघे गल्ला नाई करी। बजाए तेतके ,तेऊ शोठी संघे दुई बारी शाफडे बाही। एउ सावे तेऊ परमेश्वरा रा निरादर करू। सभी वे झुटणे वे शाफ्डा का पाणी तों निख्दा , पर परमेश्वर मूसा का गुसा होउ। परमेश्वरे बोलू , " किवेकी ताई मेरी आज्ञा नाँई मनी ,तेवा तूह बायदे रे देशा में नाई नाही सकदअ। "

जेवा इस्राएली लोका चाली साला तणी जंगला में भटकी छेकी थी, तेबा जासुये परमेश्वरा रे खिलाफ बलवा करु थी त्या सबे मुये। तेवा परमेश्वर त्या लोका वे भी का तेऊ बायदे रे देशा बे नीई। एवा मूसा बखे बूढलअ होऊ थी, तेवा परमेश्वरे लोका री अगुवाई करणे मे तया री सहायता करणे री तणी यहोशू चुनु। परमेश्वरे मूसा का यह बायदा करू थी कि एकसा दिहाड़ी त्या लोका सेटा मूसा रे साही भविष्यद्वक्ता भेजण।

तेवा परमेश्वरे मूसा एकी पहाडा री चोटी में नाहणे वे बोलू की सह बायदे रे देशा हेरी सके। मूसा सह बायदे रअ देश हेरू पर परमेश्वरे तेऊ वे तेता में नाहणे री आज्ञा नाँई दीनी। तेवा मूसा मुंअ, होर इस्राएली तीह धियाडी तणी दुःख मनाऊ। तेउकी मूसा री जागहा यहोशू त्यारअ नउंअ अगुव बणू। यहोशू एक राम्बडअ अगुब थी किबेकी तेऊ परमेश्वरा में बुशाह करु होर तेऊरी गल्ला मनी।