17. दाऊदा संघे परमेश्वर री वाचा

शाऊल इस्राएला देशा रअ पहिलअ राजअ थी। सह लामअ होर शोभलअ थी, जेडा राजअ इस्राएली लोका चाह्न्दा थी त्या तेडअ ही राजा भेटअ। इस्राएल देशा में राजा करने का पहिले कुछ साला तणी शाऊल राम्बड राजा थी। पर बादा में सह एक दुष्ट मनश बणू होर तेऊ परमेश्वरा री आज्ञा नाँई मनी, तेवा परमेश्वरे तेऊ री जगहा होर राजा चुनु।

परमेश्वरे एक जुआन इस्राएली मर्द चुनू जासका ना दाऊद थी की सह शाऊला री जागहा राजा बणी सके। दाऊद बैतलहम नगरा रअ फुआल थी। सह आपणे बापू री भेडा चारा थी, तेऊ एक बारी शेर होर एकसा बारी भालू मारी पाई थी किवेकि त्याहे तेऊरी भेडा मारनी लाई थी। दाऊद एक नम्र होर धर्मी मनश थी। तेऊ परमेश्वरा में भरोसा करु होर तेऊ री गल्ला मानी।

जेवा दाऊद एबरे जुआन मर्द ही थी, तेऊ लाम्बे -चौड़े गोलियत रे खिलाफ लड़ाई लड़ी। गोलियत एक बहु खतरनाक सैनिक थी। सह बहु ताकता आलअ होर लगभग चिण मीटर लाम्मअ थी सपाही थी ! पर परमेश्वरे गोलियत वे मारणे होर इस्राएला बचाउणे में दाऊद री सहायता करी थी। एता बाद, दाऊदे इस्राएला देशा रे शत्रु पेंदे कई बारी जीत करी । दाऊद एक बड़अ सैनिक बणु, होर तेऊ बहु लड़ाई में इस्राएली सेना री अगुवाई करी। लोके तेऊ री बहु सराहना करी।

इस्राएली लोके दाऊदा सगे ऐतरा प्यार करू कि शाऊला तेऊ रा रोष लागा। शाऊल तेऊ दाऊदा मारणा चाहदा थी, तेवा दाऊद तेऊ का होर तेऊ रे सैनिका का गोजणे वे जंगला बे ठुरू। एक धयाडी जेवा शाऊल होर् तेऊ रे सैनिक दाऊदा लोडदे लागे थी तेवा शाऊल एकी गुफा में नाठाअ। यह सहे गुफा थी जासु में दाऊद गजूदअ थी, पर शाऊले सह नाँई हेरू। दाऊद शाऊला पीछे-पीछे तेऊ बहू नेड नाठअ होर तेऊ रे झीकड़े का एक टुकड़ काटू। बाद में, जेवा शाऊल तेसा गुफा का निखदअ तेवा दाऊदे सह काटू दअ टुकड रीहाऊ। तेबा शाऊला पता चलू की दाऊद राजा बणने री तणी महा मारना नाँई चाहंद।

थोड़े वक्ता बाद, शाऊल लड़ाई में मारू, होर दाऊद इस्राएला देशा रअ राजा बणू। सह एक राम्बडअ राजा थी, होर लोका सगे प्रेम डाहन्दा थी। परमेश्वरे दाऊद बे आशीर्वाद दीना होर सह सफल बणाउ। दाऊदे कईये लड़ाई लड़ी, होर परमेश्वरे इस्राएला का दुश्मणा हराउणे में दाऊदा री सहायता करी। दाऊदे यरूशलेम नगरा जीती करे सह आपणी राजधानी बणाई, होर तखे रही करे तेऊ राज करू। दाऊद चाहली साला तणी एक राजा रहू। तेऊ वक्ते, इस्राएल देश बहु ज्यादा सामर्थी होर ताकता आलअ होर सेठ बणू।

दाऊद एक मंदिर बनाउणा चाहदा थी जखे सारे इस्राएली लोका परमेश्वरा री आराधना करी सकें होर तेऊ वे बलिदान चढ़ाइ सकें। इस्राएली लोका लगभग 400 साला का मूसा रे बणाई दे मिलाप आल़े ताम्बु में परमेश्वरा री आराधना करदा थी होर तेऊ वे बलि चड़ाउदा थी।

पर तखे नातान ना रअ एक भविष्यद्वक्ता थी। परमेश्वरे सह दाऊदा सेटा वे एडा बोलणे वे भेजू : "ताई बहु सारी लड़ाई लड़ी, तेवा ताए माह वे एक मंदिर नाई बणाऊ। मनिदर तेरे शोहरू यह तेरी शोहरी बणाउण। तेवा भी, माह ताह बे ज्यादा आशीष दीणी। तेरे वंशजा सदा वे मेरे लोका में राजा रे के रूपा में राज करणा।" सदा वे राजा करण आल़अ सह दाऊदा रअ एक मात्र वंशज मसीह आसा। मसीह परमेश्वरा रअ चुनू दअ जन आसा जोह संसारा रे लोका त्या रे पापा का बचाऊदा।

जेवा दाऊदे नाताना रा यह संदेश शुणू तेवा तयूये परमेश्वर रा धन्यवाद करू होर तेऊ री स्तुति करी। परमेश्वर दाऊदा री ईजता बडाउदअ लागअ थी होर तेऊ वे बहू सारी आशीष दीनदअ लागअ थी। पर, दाऊद नाँई जाणदअ थी कि परमेश्वरा या गल्ला केबरे पूरी करणी। एउ वक्ते हामे हामे जाणा कि इस्राएली लोका, लगभग 1,000 साला तणी मसीहा रे इहणे री इंतजार करणा आऊआ।

दाऊदे कईये साला तणी आपणे लोका पेंदे राज करु। तेऊ ईमानदारी संघे परमेश्वरा री आज्ञा रा पालन करू होर परमेश्वरे तेऊबे आशीष दीनी। हालाँकि, तेऊ आपणी जिंदगी रे आखरी में परमेश्वरा रे बिरोधा में बहु खतरनाक पाप करू थी।

एकसा दिहाड़ी दाऊदे आपणे सारे सैनिक दूर लड़ाई करदे नाठे थी। तेबा दाउद आपणे मैहला का बागे आऊअ होर तेऊ एक शोभली बेटड़ी नेहूदी हेरी। पर तेसा तेसा का आपणी नाँई ओरी पोरी नाँई करी, दाऊद तेसा बेटड़ी नाँई जाणद थी। पर तेऊ पता करू की तेसा बेटड़ी रा ना बतशेबा आसा।

ेदाऊदे तेसा आपु बे आडने बे आपण एक सैनिक तेसा सेटा बे भेजू। दाऊदे तेसा सगे गलत काम करू होर तेऊकी सह वापिस घरा वे भेजी। थोड़े वक्ता बाद बतशेबा ने यह बोली करे दाऊदा सेटा वे फयाडा भेजू की सह सुईदी साहा है।

बतशेबा ऊरिय्याह ना रे एकी सैनिका री बेटड़ी थी। सह दाऊदा रे रामबड़े सैनिका मेंजा का एक थी। तेऊ वक्ते सह लड़ाई लड़ने री तणी बागा बे चालु दअ थी। दाऊदे ऊरिय्याहा लड़ाई का वापस शदाई करे तेऊ आपणी बेटड़ी संघे रहणे वे बोलू। पर होरा सैनिक लड़ाई में थी तेवा ऊरिय्याह घरा वे नाहणे वे नाँई करू । तेवा दाऊदे ऊरिय्याह वापस लड़ाई करद भेजू होर सेनापति का बोलू तेऊ लड़ाई में एहडी जगहा डाहणे वे बोलू जखे शत्रु सभी का शक्तिशाली होये ताकि सह मरे। होर तेता बाद एडा ही होऊ कि ऊरिय्याह लड़ाई में मारू।

जेबा ऊरिय्याह रे लड़ाई मारी पाऊ तेबा दाऊदे बतशेबा संघे ब्याह करु। बादा में, तेसे दाऊदा रे शोहरू वे जन्म दिना। दाऊदे जोह पाप करू तेता का परमेश्वरा बखे रोष आऊआ, तेवा परमेश्वरे नातान ना रअ भविष्यद्वक्ता दाऊद वे यह खोजने वे भेजू की दाऊदा रा पाप केतरा बुरा थी। दाऊदे आपणे पाप मनु होर परमेश्वरे सह माफ भी करू। आपणे बाकी बचिदे जीवना में, आपणे मुश्किल वक्ता में भी दाऊद परमेश्वरा रे पीछे-पीछे हाण्डू होर तेऊ री गल्ला मानी।

पर दाऊद रअ शोहरू मुअं। एउ सावे परमेश्वरे दाऊद रे पापा री सजा दीनी। एतके अलावा, दाऊदा रे मरणे तणी, तेऊ रे आपणे टवरे तेऊ सगे लड़ाई करी,होर दाऊद हर तरहा का कमजोर होऊ थी। पर परमेश्वर बुशह लाईक थी, होर परमेश्वरे एबा भी सहे करू जोह तेऊ दाऊदे सगे बायदा करू दा थी, पर तेऊ परमेश्वरा री आज्ञा नाँई मनी पर बाद में दाउद होर वतशेबा रे दूजी ओलाद पैदा होई होर तयाहे तेऊ रा ना सुलेमान डाहू।